नीरव मोदीला आणखी एक झटका; UK उच्च न्यायालयाने फेटाळला जामीन अर्ज
लंडन: फरार हिरे व्यापारी नीरव मोदीला पुन्हा एकदा मोठा धक्का बसला आहे. यूके उच्च न्यायालयाच्या किंग्ज बेंच डिव्हिजनने त्यांचा जामीन अर्ज फेटाळला आहे. नीरव मोदीचा हा आतापर्यंतचा दहावा प्रयत्न होता, जो न्यायालयाने फेटाळला. पंजाब नॅशनल बँक (पीएनबी) शी संबंधित 6,498.20 कोटींच्या घोटाळ्यातील नीरव मोदी हा प्रमुख आरोपी आहे. मार्च 2019 पासून तो यूकेच्या तुरुंगात आहे. सीबीआय त्याला भारतात आणून त्याच्यावर खटला चालवू इच्छित आहे.
CBI च्या युक्तिवादांसमोर याचिका निष्फळ –
सीबीआयच्या म्हणण्यानुसार, या सुनावणीदरम्यान, क्राउन प्रॉसिक्युशन सर्व्हिसने (सीपीएस) न्यायालयात जामिनाला जोरदार विरोध केला. लंडनमध्ये सीबीआयचे एक पथकही उपस्थित होते, ज्यात तपास अधिकारी आणि कायदेतज्ज्ञांचा समावेश होता. सीबीआयने एक निवेदन जारी करून म्हटले आहे की, आमच्या पथकाने न्यायालयात जोरदार युक्तिवाद सादर केले, ज्यामुळे जामीन अर्ज फेटाळण्यात आला. तथापि, ब्रिटिश न्यायालयाने नीरव मोदीच्या भारतात प्रत्यार्पणाला आधीच मान्यता दिली आहे, परंतु मोदी कायदेशीर मार्गांचा अवलंब करून वारंवार प्रक्रियेला विलंब करत आहे.
हेही वाचा – PNB बँक घोटाळ्यातील फरार आरोपी मेहुल चोक्सीला बेल्जियममध्ये अटक
PNB घोटाळा काय आहे?
PNB घोटाळा हा 2018 मध्ये उघडकीस आला. या मोठ्या बँकिंग घोटाळ्याने संपूर्ण देशाला हादरवून टाकले होते. तपासात असे आढळून आले की काही पीएनबी अधिकाऱ्यांनी सुमारे 13000 कोटींचे बनावट अंडरटेकिंग लेटर (एलओयू) जारी केले होते. या घोटाळ्यामागील मुख्य आरोपी नीरव मोदी आणि त्याचा काका मेहुल चोक्सी असल्याचे आढळून आले. घोटाळा उघडकीस येताच, नीरव मोदी देश सोडून पळून गेला आणि काही महिन्यांनंतर मार्च 2019 मध्ये त्याला लंडनमधून अटक करण्यात आली.
हेही वाचा – विजय माल्या आणि नीरवला मोदी सरकारचा दणका
ED ची कारवाई –
या घोटाळ्यानंतर, अंमलबजावणी संचालनालयाने (ईडी) नीरव मोदी आणि मेहुल चोक्सी यांच्याविरुद्ध मनी लाँड्रिंगचा गुन्हा दाखल केला आणि देशभरातील अनेक ठिकाणी छापे टाकले. या काळात हिरे, सोने आणि मौल्यवान दगड जप्त करण्यात आले. डिसेंबर 2022 मध्ये, यूकेच्या सर्वोच्च न्यायालयानेही नीरव मोदीच्या भारत प्रत्यार्पणाविरुद्धची याचिका फेटाळून लावली. असे असूनही, जामीन आणि प्रत्यार्पण टाळण्यासाठी नीरव मोदी वारंवार न्यायालयीन प्रक्रियेचा अवलंब करत आहेत.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.