Paresh Rawal : ‘धुरंधर 2′ खरोखरच कौतुकास्पद.. पण मला आयुष्यात पहिल्यांदा वाटलं..’ दिग्गज अभिनेते परेश रावल यांची प्रांजळ कबुली
Paresh Rawal on Dhurandhar 2 : आदित्य धर दिग्दर्शित ‘धुरंधर: द रिव्हेंज’ या चित्रपटाने सध्या संपूर्ण देशात एक वेगळीच क्रेझ निर्माण केली आहे. बॉक्स ऑफिसवर यशाचे नवनवीन विक्रम प्रस्थापित करणाऱ्या या चित्रपटाने केवळ प्रेक्षकांनाच नव्हे, तर चित्रपटसृष्टीतील दिग्गजांनाही भुरळ घातली आहे. बॉलिवूडचे ज्येष्ठ अभिनेते परेश रावल यांनी हा चित्रपट पाहिल्यानंतर आपली प्रतिक्रिया देताना एक मोठी खंत बोलून दाखवली आहे. "आयुष्यात पहिल्यांदाच मला असं वाटतंय की मी या चित्रपटाचा भाग असायला हवा होतो," अशा शब्दांत त्यांनी चित्रपटाच्या दर्जाचे कौतुक केले. या चित्रपटाने केवळ कलाकारांचेच नव्हे, तर सचिन तेंडुलकर आणि विराट कोहली यांसारख्या क्रीडा क्षेत्रातील महान खेळाडूंचेही लक्ष वेधून घेतले आहे.
परेश रावल यांची प्रांजळ कबुली
परेश रावल यांनी आदित्य धर यांच्यासोबत 'उरी: द सर्जिकल स्ट्राइक'मध्ये काम केले होते, त्यामुळे त्यांना या दिग्दर्शकाच्या कामाच्या पद्धतीची पूर्ण कल्पना आहे. 'धुरंधर'च्या यशाबद्दल बोलताना ते म्हणाले की, "मी या चित्रपटाचा पहिला भाग 2 वेळा पाहिला आहे आणि आता दुसरा भाग एकदा पाहून झाला आहे. मात्र, मला हा चित्रपट पुन्हा एकदा पाहायचा आहे. ज्या पद्धतीने कथा मांडली गेली आहे आणि मोठ्या पडद्यावर तिचे सादरीकरण झाले आहे, ते खरोखरच कौतुकास्पद आहे. यात मी असतो तर खूप मजा आली असती, अशी भावना त्यांनी व्यक्त केली."
बॉक्स ऑफिसवर कमाईचा धुमाकूळ
'धुरंधर 2' ने कमाईच्या बाबतीत अनेक बड्या चित्रपटांना मागे टाकले आहे. प्रदर्शनानंतर अवघ्या 19 दिवसांत या चित्रपटाने जगभरात तब्बल 1,500 कोटी रुपयांचा गल्ला जमवला आहे. भारताच्या विचार केला तर देशांतर्गत बाजारपेठेत या चित्रपटाने 1,000 कोटींच्या क्लबमध्ये दिमाखात प्रवेश केला आहे. या भव्य चित्रपटात रणवीर सिंह, संजय दत्त, आर. माधवन, अर्जुन रामपाल आणि राकेश बेदी यांच्यासारखी तगडी स्टारकास्ट असून, प्रत्येक कलाकाराने आपल्या भूमिकेला पूर्ण न्याय दिला आहे.
विराट कोहली आणि सचिन तेंडुलकरही प्रभावित
केवळ बॉलिवूडच नव्हे तर क्रिकेट जगतातूनही या चित्रपटावर कौतुकाचा वर्षाव होत आहे. विराट कोहलीने सोशल मीडियावर एक विशेष पोस्ट लिहित आपला अनुभव शेअर केला. "भारतात पहिल्यांदाच मला असा सिनेमॅटिक अनुभव मिळाला आहे. जवळपास 4 तास मी क्षणभरही जागेवरून हललो नाही, इतका हा चित्रपट प्रभावी आहे," असे विराटने म्हटले. त्याने विशेषतः रणवीर सिंहच्या अभिनयाचे कौतुक करताना तो एका वेगळ्याच उंचीवर पोहोचला असल्याचे नमूद केले. तर सचिन तेंडुलकरने ज्येष्ठ अभिनेते राकेश बेदी यांना फोन करून त्यांच्या अभिनयाची दाद दिली.
सिनेमॅटिक अनुभवाचा नवा स्तर
आदित्य धर यांच्या दिग्दर्शनाखालील या चित्रपटाने भारतीय चित्रपटसृष्टीचा दर्जा एका वेगळ्या पातळीवर नेऊन ठेवला आहे. चित्रपटातील व्हीएफएक्स (VFX), कथानक आणि कलाकारांचा परफॉर्मन्स यांमुळे हा चित्रपट प्रेक्षकांच्या पसंतीस उतरला आहे. सारा अर्जुन आणि राकेश बेदी यांच्यासारख्या कलाकारांच्या महत्त्वाच्या भूमिकांनी चित्रपटाला अधिक उंची मिळवून दिली आहे. परेश रावल यांच्यासारख्या चोखंदळ अभिनेत्याने व्यक्त केलेली ही खंत या चित्रपटाच्या यशाची सर्वात मोठी पावती मानली जात आहे.
हेही वाचा – Dhurandhar 2: दाऊद इब्राहिम समजून व्हायरल झालेला फोटो निघाला फेक; फोटोतील व्यक्ती कोण? धक्कादायक सत्य समोर
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.