Bullet Train Recruitment 2026: नॅशनल हाय-स्पीड रेल कॉर्पोरेशनमध्ये 237 तांत्रिक पदांसाठी मेगा भरती; मासिक पगार किती?

NHSRCL Recruitment 2026: देशातील पहिल्या आणि अत्यंत महत्त्वाकांक्षी मुंबई-अहमदाबाद हाय-स्पीड रेल्वे प्रकल्पात काम करण्याची सुवर्णसंधी तांत्रिक क्षेत्रातील उमेदवारांसाठी चालून आली आहे. नॅशनल हाय-स्पीड रेल कॉर्पोरेशन लिमिटेडने (NHSRCL) विविध तांत्रिक विभागांमध्ये एकूण 237 टेक्निशियन पदांसाठी मेगा भरती प्रक्रिया सुरू केली आहे. या भरतीसाठी इच्छुक आणि पात्र उमेदवारांना 5 ऑगस्ट 2026 पूर्वी ऑनलाइन पद्धतीने अर्ज सादर करावा लागणार आहे. अंतिम निवड झालेल्या उमेदवारांना NE-2 वेतनश्रेणीअंतर्गत 35,000 रुपयांपासून ते 1,10,000 रुपयांपर्यंत आकर्षक मासिक वेतन आणि इतर शासकीय भत्ते दिले जातील.

रिक्त पदांचा सविस्तर तपशील
या भरती मोहिमेअंतर्गत प्रामुख्याने इलेक्ट्रिकल आणि सिग्नलिंग विभागातील पदे भरली जाणार असून, एकूण जागांचा तपशील पुढीलप्रमाणे आहे:
इलेक्ट्रिकल टेक्निशियन – 77 पदे
सिग्नलिंग आणि टेलिकॉम टेक्निशियन – 63 पदे
सिव्हिल/ट्रॅक फिटर – 18 पदे
सिव्हिल/ट्रॅक मेकॅनिक – 16 पदे
रोलिंग स्टॉक इलेक्ट्रिशियन – 13 पदे
रोलिंग स्टॉक फिटर – 10 पदे
याशिवाय सिव्हिल/ट्रॅक ड्राफ्ट्समन, सर्व्हेयर, वेल्डर, प्लंबर, पेंटर, मशिनिस्ट आणि RAC टेक्निशियन अशा विविध रिक्त जागांचाही यात समावेश आहे. नियुक्त उमेदवारांना गरजेनुसार प्रकल्पाच्या कोणत्याही कार्यक्षेत्रात पोस्टिंग दिली जाऊ शकते.

हेही वाचा – Bank Recruitment: बँकेत नोकरीची मोठी संधी! आयबीपीएस पीओअंतर्गत 6715 जागांसाठी मेगा भरती सुरू, जाणून घ्या अर्ज करण्याची शेवटची तारीख

शैक्षणिक पात्रता आणि अनुभवाचे कडक निकष
उमेदवारांची वयोमर्यादा आणि अनुभवाची गणना 30 जून 2026 या तारखेच्या आधारे केली जाणार आहे. अर्ज करणाऱ्या उमेदवारांचे कमाल वयोमर्यादा 35 वर्षे निश्चित करण्यात आली असून आरक्षित वर्गातील उमेदवारांना शासनाच्या नियमांनुसार सवलत लागू असेल. शैक्षणिक पात्रतेसाठी उमेदवाराने मान्यताप्राप्त बोर्डातून 10 वी उत्तीर्ण केलेली असावी, सोबतच संबंधित ट्रेडमधील ITI, शिकाऊ उमेदवारी (Apprenticeship) किंवा संबंधित अभियांत्रिकी शाखेतील 3 वर्षांचा डिप्लोमा असणे बंधनकारक आहे. या शैक्षणिक पात्रतेसोबतच उमेदवाराकडे भारतीय रेल्वे, मेट्रो रेल किंवा RRTS च्या ऑपरेशन आणि मेंटेनन्स विभागात किमान 2 वर्षांचा कामाचा वैध अनुभव असणे आवश्यक आहे.

निवड प्रक्रिया आणि अर्ज शुल्क
NHSRCL कडून ही संपूर्ण भरती प्रक्रिया पारदर्शक पद्धतीने ऑनलाइन आणि ऑफलाइन टप्प्यांत राबवली जाणार आहे:
निवड पद्धत: उमेदवारांना सर्वप्रथम संगणक-आधारित परीक्षा (CBT) द्यावी लागेल. त्यानंतर कागदपत्रांची पडताळणी आणि अंतिम टप्प्यात वैद्यकीय तपासणी केली जाईल. सर्व पदांसाठी CBT परीक्षा एकाच दिवशी आणि एकाच वेळी आयोजित केली जाईल.
परिविक्षा कालावधी: अंतिम निवड झालेल्या उमेदवारांना सुरुवातीला 1 वर्षाचा प्रोबेशन पिरियड पूर्ण करावा लागेल.
अर्ज शुल्क: सामान्य, ओबीसी आणि ईडब्ल्यूएस प्रवर्गातील उमेदवारांसाठी 400 रुपये फी निश्चित करण्यात आली आहे. अनुसूचित जाती (SC), अनुसूचित जमाती (ST) आणि महिला उमेदवारांना अर्ज शुल्कातून पूर्ण सवलत देण्यात आली आहे. इच्छुक उमेदवार NHSRCL च्या अधिकृत संकेतस्थळावर जाऊन अर्ज प्रक्रिया पूर्ण करू शकतात.

हेही वाचा – ITI Admission Maharashtra : मुसळधार पावसाचा ITI प्रवेशाला फटका; पहिल्या फेरीत हजारो जागा रिक्त, मुदतवाढीची मागणी