जयपूर : राजस्थानमधील जयपूर जिल्ह्यात रामपुरा कंवरपुरा गावातील एका सरकारी शाळेला भेट देण्यासाठी गेलेल्या ‘कॉकरोच जनता पार्टी’च्या (CJP) पथकाला स्थानिक लोकांच्या हिंसक विरोधाचा सामना करावा लागल्याने शुक्रवारी तणाव निर्माण झाला. या पथकातील सदस्यांनी आपल्याला मारहाण झाल्याचा आणि आपल्या वाहनांची तोडफोड केल्याचा आरोप केला आहे. सरकारी शाळांची स्थिती तपासण्यासाठी आणि विद्यार्थी व शिक्षकांशी संवाद साधण्यासाठी CJP तर्फे राबवल्या जाणाऱ्या ‘स्कूल ठीक करो’ (शाळा सुधारा) मोहिमेचा एक भाग म्हणून हे पथक गावात गेले होते. CJP च्या कार्यकर्त्यांच्या म्हणण्यानुसार, स्थानिक लोकांच्या एका गटाने या पथकाला अडवले आणि त्यांच्यावर दगडफेक करण्यासोबतच काठ्यांचा वापर केला, तसेच सदस्यांना धक्काबुक्की केली. ही घटना पूर्वनियोजित होती आणि या हल्ल्यामागे भाजपचे कार्यकर्ते होते, असा आरोपही CJP ने केला आहे.
घटनास्थळावरून प्रसारमाध्यमांशी बोलताना CJP चे कार्यकर्ते आशुतोष रांका यांनी पोलिसांवर हस्तक्षेप न केल्याचा आरोप केला. तसेच, 48 तासांच्या आत दोषींना अटक करण्याची आणि सरकारी शाळांना भेटी देण्यावर राजस्थान शिक्षण विभागाने घातलेले निर्बंध मागे घेण्याची मागणी त्यांनी केली. “आज संपूर्ण देशाने भाजपची गुंडगिरी थेट पाहिली. तिथे आधीच दगडफेक सुरू होती, पण पोलीस मात्र मूक प्रेक्षक बनून राहिले. पोलिसांनी सांगितले की ते काहीही करणार नाहीत. हे सर्व मदन दिलावर यांच्या सांगण्यावरून घडवून आणले गेले आहे. आमच्या स्वयंसेवकांचे हात मोडले गेले. आमच्या गाड्यांची तोडफोड करण्यात आली. इथे दगडफेक झाली. वृद्ध लोकांनी आमच्या टीममधील महिलांवर दगडफेक केली आणि त्यांचे फोन तोडले. हे सर्व पूर्वनियोजित होते. या सर्व गुंडांना 48 तासांच्या आत अटक केली जावी आणि तो आदेश मागे घेतला जावा. अन्यथा, हे आंदोलन आता केवळ शिक्षणापुरते मर्यादित न राहता मदन दिलावर यांच्या विरोधातही विस्तारले जाईल. तुम्हाला तुमची लाज वाटली पाहिजे.
All levels of disgust have been crossed today. रामपुरा, कंवरपुरा में पिछले काफ़ी सालों से स्कूल भैंसों के तबेले में चल रहा है। लेकिन जब हम वहाँ निरीक्षण करने पहुंचे तो सरेआम मारपीट, पत्थरबाजी की गई। कारों के शीशे फोड़े गए, टीम पर पत्थर बरसाये गए। कपड़े फाड़े गए। ट्यूब में पत्थर… pic.twitter.com/H15osb1ODA — Ashutosh Ranka (@AshutoshRanka) August 21, 2026
ही शाळा गेल्या एका वर्षापासून म्हशींच्या गोठ्यात चालवली जात आहे. आम्हाला तिची दुरुस्ती करायची आहे. तिथे भाजपचे गुंड उपस्थित होते. राजस्थानच्या लोकशाहीसाठी हा एक काळा दिवस आहे,” असे ते म्हणाले. ‘एक्स’ वरील एका पोस्टमध्ये, CJP चे संस्थापक अभिजीत दीपके यांनी आरोप केला की राजस्थान पोलिसांनी ही घटना घडू दिली. खिडकीची काच फुटलेल्या एका कारचा व्हिडिओ शेअर करत दिपके म्हणाले, “राजस्थानमध्ये भाजपच्या गुंडांनी आशूवर हल्ला केला आहे. आशू आणि CJP च्या इतर स्वयंसेवकांना मारहाण करण्यात आली असून ते जखमी झाले आहेत. @PoliceRajasthan ने हे घडू दिले आहे.”
Ashu has been attacked by BJP goons in Rajasthan. Ashu and other volunteers of CJP were beaten up and have been injured.@PoliceRajasthan has allowed this to happen. pic.twitter.com/pc7c3GCAfV — Abhijeet Dipke (@abhijeet_dipke) August 21, 2026
CJP च्या पथकातील सदस्य संजू यांनी असाही आरोप केला की, जेव्हा हे पथक शाळेची पाहणी करण्यासाठी पोहोचले, तेव्हा त्यांच्यावर हल्ला करण्यात आला. “आम्ही रामपुरा येथील शाळेला भेट देण्यासाठी आलो होतो. आमच्या सहकाऱ्यांनी याआधीही, म्हणजे एका वर्षापूर्वी, येथे भेट दिली होती; तेव्हा शाळा एका म्हशींच्या गोठ्यात चालवली जात होती. तीच परिस्थिती पुन्हा पाहण्यासाठी आम्ही आलो होतो. तिथे आधीच भाजप-आरएसएसचे गुंड उपस्थित होते. त्यांनी आम्हाला काठ्यांनी मारले, धक्का-बुक्की केली आणि आमच्यावर दगडफेकही केली. त्यांनी मला जमिनीवर पाडले आणि काठीने मारहाण केली. माझ्या हाताला दुखापत झाली आहे. खूप वेदना होत आहेत,” असे ते म्हणाले.
सरकारी शाळांमध्ये अनधिकृत प्रवेश, प्रसारमाध्यमांचा प्रवेश आणि चित्रीकरण यांवर राजस्थान शिक्षण विभागाने अलीकडेच घातलेल्या निर्बंधांमुळे निर्माण झालेल्या वादाच्या पार्श्वभूमीवर CJP चे हे आरोप समोर आले आहेत. CJP ने यापूर्वी केलेल्या पाहणीनंतर हे निर्बंध लागू करण्यात आले होते. शाळांची दयनीय अवस्था लपवण्याचा प्रयत्न राज्य सरकार करत असल्याचा आरोप CJP ने केला आहे.
