Heavy Rainfall : पावसाचा हाहाकार! दिल्लीसह 4 राज्यांत जनजीवन विसकळीत; विविध ठिकाणी पूर आणि भूस्खलनामुळे मोठे नुकसान

Heavy Rainfall in different States in India : देशभरात मान्सून पूर्णपणे सक्रिय झाला असून मान्सूनने आता संपूर्ण देश व्यापला आहे. गुरुवारी झालेल्या मुसळधार पावसामुळे उत्तर भारतासह अनेक राज्यांतील लहान-मोठी शहरे आणि गावांमध्ये रस्ते पाण्याखाली गेले असून झाडे उन्मळून पडल्याने मोठे नुकसान झाले आहे. राजधानी दिल्लीमध्ये या पावसाळ्यातील आतापर्यंतचा सर्वाधिक पाऊस नोंदवला गेला असून हवामान विभागाने गुरुवारी दिवसभर 'रेड अलर्ट' जारी केला होता. दिल्लीच्या सफदरजंग भागात 24 तासांत 72.6 मिमी, तर खजुरीमधील तुखमिरपूर येथे तब्बल 160 मिमी इतका सर्वोच्च पाऊस नोंदवला गेला. पंजाब आणि हरियाणातही पावसाचे आगमन झाल्याने परिस्थिती बिकट बनली आहे.

उत्तराखंड आणि हिमाचलमध्ये नद्यांना पूर, पूल गेला वाहून
डोंगराळ राज्यांमध्ये मुसळधार पावसामुळे नैसर्गिक आपत्ती ओढवली असून उत्तराखंडच्या 7 जिल्ह्यांमध्ये 'रेड अलर्ट' घोषित करण्यात आला आहे. येथे ठिकठिकाणी झालेल्या भूस्खलनामुळे सुमारे 107 रस्ते बंद झाले असून गंगा, यमुना या प्रमुख नद्यांनी धोक्याची पातळी ओलांडली आहे. सुरक्षेचा उपाय म्हणून डेहराडूनसह 4 जिल्ह्यांतील पहिली ते बारावीचे वर्ग पूर्णपणे बंद ठेवण्यात आले आहेत. दुसरीकडे, हिमाचल प्रदेशच्या किन्नौर जिल्ह्यात अचानक आलेल्या भीषण पुरामुळे तब्बल 100 फुटी लोखंडी पूल पाण्याखाली वाहून गेला आहे, ज्यामुळे तेथील लिप्पा गावाचा संपर्क इतर जगाशी पूर्णपणे तुटला आहे.

हेही वाचा – Telangana Road Accident: पोटाची खळगी भरण्यासाठी दुसऱ्या राज्यात गेले, पण अपघातात गमावले प्राण; तेलंगणात चंद्रपूरच्या 4 मजुरांचा अंत, 27 जण जखमी

गुजरातमध्ये पाणीच पाणी; वायनाड भूस्खलनात 6 बळी
दक्षिण आणि पश्चिम भारतातही पावसाची स्थिती गंभीर असून केरळच्या वायनाड येथे झालेल्या भूस्खलनातील मृतांची संख्या आता 6 वर पोहोचली आहे. गुरुवारी शोधमोहिमेदरम्यान ढिगाऱ्याखालून आणखी 3 परप्रांतीय कामगारांचे मृतदेह हाती आले असून त्यांची ओळख पटली आहे. दुसरीकडे, गुजरातमधील सुरतसारख्या अनेक प्रमुख शहरांमध्ये पूरसदृश परिस्थिती निर्माण झाली आहे. तिथले निवासी भाग आणि रस्ते अजूनही जलमय असून, लोक गुडघाभर अस्वच्छ व साचलेल्या पाण्यातून प्रवास करत आहेत. घरांमध्ये पाणी शिरल्याने नागरिकांच्या साहित्याचे अतोनात नुकसान झाले असून रस्ते वाहतूक पूर्णपणे कोलमडली आहे.

राजस्थानात अतिवृष्टीचा इशारा आणि प्रशासनाची धडपड
राजस्थानातही मोसमी पावसाने जोरदार हजेरी लावली असून तेथील कोटा आणि भरतपूर विभागांत हवामान विभागाने अतिशय मुसळधार पावसाचा कडक इशारा दिला आहे. राज्यातील चित्तोडगडमधील बडेसर व निम्बाहेरा, तसेच भरतपूरमधील बयाना भागात 90 मिमी इतका मुसळधार पाऊस पडल्याची नोंद झाली आहे. वेगवेगळ्या राज्यांत सोसाट्याच्या वाऱ्यासह झालेल्या या पावसामुळे रस्ते ब्लॉक झाले असून वाहनांचेही मोठे नुकसान झाले आहे. विस्कळीत झालेले जनजीवन पुन्हा रुळावर आणण्यासाठी आणि ठिकठिकाणची परिस्थिती सामान्य करण्यासाठी स्थानिक प्रशासनाला मोठी धडपड करावी लागत आहे.

हेही वाचा – Mumbai-Pune Railway: मुंबई-पुणे रेल्वे प्रवाशांसाठी दिलासा! अनेक गाड्या रद्द, पण 'या' महत्त्वाच्या ट्रेन सुरूच; संपूर्ण यादी पाहा