"मी हताश झालोय, मला वाचवा!" युक्रेनच्या तावडीत सापडलेल्या गुजरातच्या तरुणाची पंतप्रधान मोदींना साद

Ukrainian Army Held Gujarat Student : गुजरातच्या मोरबी जिल्ह्यातील एक 23 वर्षीय तरुण सध्या रशिया-युक्रेन युद्धाच्या भयंकर स्थितीत अडकला आहे. रशियाकडून लढताना युक्रेनच्या सैन्याने त्याला बंदी बनवले असून, त्याने आता पंतप्रधान नरेंद्र मोदी यांच्याकडे मदतीसाठी हृदयद्रावक आवाहन केले आहे.
शिक्षणासाठी गेला आणि युद्धभूमीवर पोहोचला

मोरबीच्या कालिका प्लॉट परिसरातील रहिवासी असलेला साहिल मोहम्मद हुसेन माजोठी, 10 जानेवारी 2024 रोजी रशियन भाषा आणि संस्कृतीचा अभ्यास करण्यासाठी ‘स्टुडंट व्हिसा’वर रशियाला गेला होता. सेंट पीटर्सबर्ग येथील ITMO विद्यापीठात तो शिक्षण घेत होता. मात्र, तिथे त्याला एका पोलीस प्रकरणात गोवण्यात आले आणि तुरुंगात टाकण्यात आले. त्यानंतर त्याला रशियाकडून युद्धात लढण्याची सक्ती करण्यात आली आणि रशियन सैन्यातून लढताना युक्रेनच्या सैन्याने त्याला पकडले.

पंतप्रधान मोदी आणि परराष्ट्र मंत्र्यांना विनंती
युक्रेनच्या प्रशासनाकडून साहिलच्या कुटुंबाला रविवारी रात्री एक व्हिडिओ संदेश प्राप्त झाला. या व्हिडिओमध्ये साहिल अत्यंत चिंताग्रस्त दिसत असून तो म्हणतो, “मी सध्या युक्रेनमध्ये युद्धकैदी म्हणून अडकलो आहे. भविष्यात माझे काय होईल, हे मला माहीत नाही, मी आता पूर्णपणे हताश झालो आहे. मी पंतप्रधान नरेंद्र मोदी आणि परराष्ट्र मंत्री एस. जयशंकर यांना विनंती करतो की, शक्य असल्यास कृपया माझी येथून सुटका करा.” हा व्हिडिओ अलीकडचा असावा, कारण त्यात त्याने 4 आणि 5 डिसेंबर रोजी झालेल्या पुतिन यांच्या दौऱ्याचा संदर्भ दिला आहे.

हेही वाचा – H1B Visa Update: सावधान! तुमची सोशल मीडिया पोस्ट ठरू शकते व्हिसा नाकारण्याचे कारण; वाचा सविस्तर अपडेट

भारतीय तरुणांना दिला सतर्कतेचा इशारा
आपल्या व्हिडिओ संदेशात साहिलने उच्च शिक्षण किंवा नोकरीसाठी रशियाला जाणाऱ्या भारतीय नागरिकांना सावध राहण्याचे आवाहन केले आहे. तो म्हणतो की, ‘इथे अनेक फसवणूक करणारे (Scammers) सक्रिय आहेत. तुम्हाला ड्रग्ज किंवा इतर बेकायदेशीर गुन्ह्यांमध्ये अडकवले जाऊ शकते. माझ्यासारख्या संकटात सापडू नका आणि स्वतःची काळजी घ्या.’ रशियात जाणाऱ्या तरुणांनी कोणत्याही प्रलोभनाला बळी पडू नये, असा गंभीर इशारा त्याने दिला आहे.

कुटुंबाच्या चिंतेत भर
साहिलच्या अटकेचा व्हिडिओ युक्रेनियन अधिकाऱ्यांनी या महिन्याच्या सुरुवातीला सार्वजनिक केला होता, तेव्हापासून त्याचे कुटुंब दहशतीखाली आहे. साहिलने पाठवलेल्या या ताज्या व्हिडिओमुळे त्याच्या जिवाला असलेल्या धोक्याची तीव्रता स्पष्ट झाली आहे. भारत सरकार आता या प्रकरणात हस्तक्षेप करून साहिलला सुखरूप परत आणणार का, याकडे सर्वांचे लक्ष लागले आहे.

हेही वाचा – Donald Trump: एपस्टीन फाइल्समधून ट्रम्प यांचा फोटो का हटवला होता? अखेर अमेरिकन न्याय विभागाने सत्य सांगितले