अहिल्यानगर : कुकडी पाटबंधारे प्रकल्पाच्या डिंभे-माणिकडोह जोडबोगद्याच्या मुद्द्यावरून आपण अजित पवारांसोबत आल्याचे राष्ट्रवादी काँग्रेसचे आमदार दिलीप वळसे-पाटील यांनी भाषणादरम्यान बोलले, तर या कामाला आता स्थगिती दिल्याच्या चर्चांना उधाण आल्याने यावरून महायुतीत ठिणगी पडण्याची शक्यता निर्माण झाली आहे. राष्ट्रवादी काँग्रेसचे आमदार दिलीप वळसे-पाटील आणि स्थानिक शेतकऱ्यांचा या प्रकल्पाला विरोध असून राज्य सरकारने कामाला स्थगिती दिल्याचा देखील दावा केला जात आहे. यावर भाजपचे प्रदेश उपाध्यक्ष आणि अहिल्यानगरचे माजी खासदार सुजय विखे यांनी चांगलीच आक्रमक भूमिका घेत स्थगितीबाबत कोणताही शासन निर्णय माहिती नसल्याचे स्पष्ट केले.
अहिल्यानगरवर वर्षानुवर्षे पाण्यासाठी अन्याय झाला असून आम्ही हक्काच्या पाण्यासाठी लढत राहणार आहे. मात्र या संदर्भात अनेक गोष्टी माझ्याकडे आहे, जेणेकरून या सर्व गोष्टींना वेगळे आयाम मिळेल. मात्र मला वाद निर्माण करायचा नाही. वाद किंवा वादग्रस्त विधान करायचं असेल तर मीही करू शकतो. माझ्याकडेही अनेक कागदपत्रे, पुरावे आहेत. ज्यामध्ये कोणी काय सहमती दिली हे सगळं माझ्याकडे आहे. मुख्यमंत्र्यांनी सर्वांची बाजू ऐकून योग्य न्याय द्यावा, अशी मागणी सुजय विखे यांनी केली.
