FASTag बँक बदलायची आहे? आता टॅग न बदलताच करता येणार पोर्ट; पाहा स्टेप बाय स्टेप प्रोसेस

FASTag वापरणाऱ्या वाहनचालकांसाठी एक महत्त्वाची सुविधा सुरू झाली आहे. आता FASTag बदलण्यासाठी वाहनाच्या काचेवर चिकटवलेला जुना टॅग काढून नवीन टॅग घेण्याची गरज राहणार नाही. 'OneTag' या नव्या सुविधेमुळे मोबाइल नंबर पोर्ट केल्याप्रमाणे FASTagचा issuer bank बदलता येणार आहे. ही सुविधा NHAIच्या Rajmargyatra अॅपवर उपलब्ध करण्यात आली आहे.

OneTag म्हणजे काय?

आतापर्यंत एखाद्या वाहनधारकाला FASTagशी संबंधित बँक बदलायची असल्यास जुन्या FASTagची प्रक्रिया बंद करून नवीन बँकेकडून नवीन FASTag घेण्याची आवश्यकता असायची. आता OneTagमुळे ही प्रक्रिया डिजिटल पद्धतीने करता येणार आहे. विशेष म्हणजे वाहनाच्या विंडस्क्रीनवर आधीपासून लावलेला FASTag तसाच राहणार आहे.

या सुविधेमध्ये FASTagचा विद्यमान Tag ID आणि वाहनाची नोंदणी कायम राहते. बदल होतो तो FASTag जारी करणाऱ्या बँकेचा आणि संबंधित वॉलेटचा. OneTag ही सुविधा NHAIशी संबंधित IHMCL आणि NPCI यांच्या संयुक्त पुढाकारातून तयार करण्यात आली आहे.

बँक बदलायची असेल तर काय करायचं?

सर्वप्रथम वाहनधारकाने Rajmargyatra अॅपमध्ये लॉगिन करावे. त्यानंतर वाहनाचा Registration Number टाकून FASTag पोर्ट करण्यासाठी वाहन पात्र आहे का, हे तपासता येते.

पुढील टप्प्यात सध्याच्या FASTag issuerकडून मिळणारा सहा अंकी Mobile Verification Code (MVC) टाकावा लागतो. त्यानंतर नवीन issuer bank निवडून आवश्यक KYC आणि wallet onboarding प्रक्रिया पूर्ण करावी लागते. प्रक्रिया पूर्ण झाल्यानंतर नवीन बँक FASTagशी जोडली जाते; मात्र वाहनावरील प्रत्यक्ष टॅग बदलण्याची आवश्यकता नसते.

जुन्या FASTagमधील पैशांचं काय?

बँक बदलल्यानंतर जुन्या issuerकडील FASTag wallet बंद करण्याची प्रक्रिया केली जाते. उपलब्ध शिल्लक रक्कम लागू असलेल्या समायोजनानंतर ग्राहकाला परत केली जाते. त्यामुळे बँक बदलण्यापूर्वी जुन्या FASTagमध्ये असलेल्या रकमेची माहिती तपासणे महत्त्वाचे आहे.

पुन्हा कधी बँक बदलता येईल?

OneTagमध्ये वारंवार issuer बदलण्यावर मर्यादा आहे. एकदा FASTag दुसऱ्या बँकेत पोर्ट केल्यानंतर पुन्हा पोर्ट करण्यापूर्वी सहा महिन्यांचा cooling period लागू होतो. त्यामुळे बँक निवडताना ही बाब लक्षात घेणे आवश्यक आहे.

NHAIने 17 सप्टेंबर 2026 रोजी Rajmargyatra अॅपवर OneTag सुविधा उपलब्ध झाल्याची माहिती दिली आहे. या अॅपवर FASTag Annual Pass, Local Pass आणि 1033 आपत्कालीन हेल्पलाइनसारख्या सुविधाही उपलब्ध आहेत.

म्हणजेच, FASTagची बँक बदलण्यासाठी आता नवीन स्टिकर घेण्याचा त्रास कमी होणार आहे. वाहनावर लावलेला टॅग कायम ठेवून issuer bank बदलण्याची सुविधा OneTagमुळे उपलब्ध झाली आहे.