Dharmendra Pradhan: विद्यार्थीदशेत आंदोलन ते केंद्रीय मंत्री; 29 वर्षांपूर्वी धर्मेंद्र प्रधानांनीच फुंकले होते पेपरफुटीविरोधात रणशिंग, काय होतं नेमकं प्रकरण?

Dharmendra Pradhan 1997 Protest: सध्या NEET-UG परीक्षेतील कथित अनियमितता आणि पेपरफुटीच्या मुद्द्यावरून देशभरात सुमारे 22 लाख विद्यार्थ्यांच्या भवितव्याचा प्रश्न ऐरणीवर आला आहे. या पार्श्वभूमीवर विरोधक आणि विविध विद्यार्थी संघटनांकडून केंद्रीय शिक्षण मंत्री धर्मेंद्र प्रधान यांच्या राजीनाम्याची जोरदार मागणी केली जात आहे. मात्र, योगायोग असा की ज्या पेपरफुटीच्या मुद्द्यावरून आज धर्मेंद्र प्रधान यांच्यावर टीका होत आहे, तब्बल 29 वर्षांपूर्वी (1997 मध्ये) याच पेपरफुटीविरोधातील एका ऐतिहासिक आंदोलनातून एक आक्रमक विद्यार्थी नेता म्हणून त्यांचा उदय झाला होता.

1997 चे ओडिशातील सचिवालय आंदोलन
1997 मध्ये ओडिशामध्ये काँग्रेस पक्षाचे सरकार असून जानकी वल्लभ पटनायक हे राज्याचे मुख्यमंत्री होते. त्यावेळी अखिल भारतीय विद्यार्थी परिषदेचे (ABVP) राष्ट्रीय सचिव म्हणून कार्यरत असणाऱ्या अवघ्या 28 वर्षांच्या धर्मेंद्र प्रधान यांनी राज्यस्तरीय परीक्षांमधील पेपरफुटीच्या विरोधात राज्य सरकारविरुद्ध रान उठवले होते. भुवनेश्वर येथील राज्य सचिवालयासमोर (Secretariat) सुमारे 1,500 विद्यार्थ्यांचा मोर्चा घेऊन ते धडकले. या आंदोलनाचे थेट नेतृत्व धर्मेंद्र प्रधान करत होते आणि या घटनेमुळेच संपूर्ण राज्यात एक अभ्यासू व आक्रमक विद्यार्थी नेता म्हणून त्यांची ओळख निर्माण झाली.

हेही वाचा – CJP Vijeta Dahiya : "माझ्याच लोकांनी मला बळीचा बकरा केला" CJP च्या प्रवक्तेपदावरून हकालपट्टी झालेल्या दहियाचे गंभीर आरोप

पोलिसांचा लाठीमार अन् 2 ठिकाणी फ्रॅक्चर
धर्मेंद्र प्रधान यांचे तत्कालीन सहकारी आणि उत्कल युनिव्हर्सिटीतील ज्युनिअर प्रशांत रौत यांनी दिलेल्या माहितीनुसार, सचिवालयापुढील ते आंदोलन सुरुवातीला शांततापूर्ण मार्गाने सुरू होते. परंतु, जमाव नियंत्रित करण्यासाठी पोलिसांनी अचानक आंदोलकांवर भीषण लाठीचार्ज केला. या लाठीमारात धर्मेंद्र प्रधान यांना अत्यंत क्रूरपणे मारहाण करण्यात आली, ज्यामध्ये त्यांच्या शरीराची दोन हाडे फ्रॅक्चर झाली होती. याशिवाय, महाविद्यालयीन निवडणुकांच्या वेळीही सत्ताधारी पक्षाच्या गुंडांकडून त्यांच्यावर प्राणघातक हल्ला झाला होता, तरीही त्यांनी आपला लढा सुरूच ठेवला.

विद्यार्थी चळवळीतून भाजपचे ज्येष्ठ नेते
वयाच्या 18 व्या वर्षापासून राष्ट्रीय स्वयंसेवक संघाची (RSS) विद्यार्थी शाखा असलेल्या ABVP मध्ये सक्रिय असलेल्या धर्मेंद्र प्रधान यांनी चळवळीचा मोठा अनुभव गाठल्यानंतर भाजपमध्ये अधिकृत प्रवेश केला. ओडिशामध्ये भाजपचे संघटन मजबूत करण्यात त्यांचा अत्यंत मोठा आणि महत्त्वाचा वाटा राहिला आहे. पुढे जाऊन 2021 मध्ये त्यांनी केंद्रीय शिक्षण मंत्री म्हणून पदभार स्वीकारला. आज NEET पेपरफुटीवरून चौफेर राजकीय दबाव असला, तरी एकेकाळी स्वतः पेपरफुटीविरोधात रस्त्यावर उतरून पोलिसांच्या लाठ्या खाणारा विद्यार्थी नेता आज देशाची शिक्षण व्यवस्था सांभाळत आहे आणि त्याच व्यक्तीविरोधात पेपरफुटीवरून आंदोलन होत आहे. इतिहासाची वेगळ्या प्रकारची पुनरावृत्ती सध्या चर्चेचा विषय ठरली आहे.

हेही वाचा – Raj Uddhav On CJP Protest : "विद्यार्थ्यांना सरकार नकोसं झालंय", राज-उद्धव यांच्याकडून मुंबईत महामोर्चाची घोषणा