Massive Fire : भीषण आगीचे तांडव! महिलेसह 2 लहान मुलींचा होरपळून मृत्यू; हाका मारत राहिल्या, पण..

Delhi Lodhi Colony Fire : दक्षिण दिल्लीतील लोधी कॉलनी परिसरात मंगळवारी सकाळी एका निवासी इमारतीच्या तिसऱ्या मजल्यावर अचानक भीषण आग लागल्याची काळीज पिळवटून टाकणारी घटना घडली. या दुर्दैवी घटनेमध्ये एका महिलेसह 2 लहान मुलींचा होरपळून दुर्दैवी मृत्यू झाला. इमारतीच्या तिसऱ्या मजल्यापुरतीच ही आग मर्यादित राहिली. यामुळे इतर मजल्यांवरील लोक सुरक्षित राहिले. मात्र, आगीच्या लोळांनी क्षणात रौद्ररुप धारण केल्याने बाधितांना बाहेर पडण्याची संधीच मिळाली नाही. या आगीचे नेमके कारण काय होते, याचा शोध सध्या प्रशासनाकडून घेतला जात आहे.

अग्निशमन दलाची धाव आणि अग्निशमन मोहीम
दिल्ली अग्निशमन दलाला (Delhi Fire Service) या दुर्घटनेबाबत सकाळी 10:20 AM वाजता आपत्कालीन कॉल प्राप्त झाला होता. माहिती मिळताच अग्निशमन दलाच्या गाड्या तातडीने घटनास्थळी दाखल झाल्या आणि बचावकार्य सुरू करण्यात आले. अग्निशमन दलाच्या जवानांनी अथक प्रयत्न करून सकाळी सुमारे 11 च्या सुमारास आगीवर पूर्णपणे नियंत्रण मिळवले. मात्र, या दुर्घटनेत एक महिला आणि 2 लहान मुली अशा एकूण 3 जणांचा मृत्यू झाला. आग इमारतीच्या तिसऱ्या मजल्यावर मर्यादित राहिली. आगीचे कारण अद्याप अस्पष्ट असून तपास सुरू आहे.

हरी नगरमध्ये सिलिंडरचे स्फोट आणि 8 जणांची सुटका
मंगळवारीच घडलेल्या दुसऱ्या एका घटनेत, दिल्लीतील हरी नगर येथील फतेह नगर (जेल रोड, रणबीर बेकरीजवळ) परिसरातील एका निवासी इमारतींच्या पार्किंग क्षेत्रात सकाळी अचानक मोठी आग लागली. या आगीच्या उष्णतेमुळे तेथे 2 गॅस सिलिंडरचे जोरदार स्फोट झाले, ज्यामध्ये पार्किंगमध्ये उभ्या असलेल्या 4 वाहनांचे मोठे नुकसान झाले. घटनेची माहिती मिळताच आपत्कालीन सेवांनी त्वरित घटनास्थळी धाव घेतली आणि आगीच्या ज्वाळांमध्ये अडकलेल्या 8 नागरिकांना सुखरूप बाहेर काढले. अग्निशमन दलाच्या साहाय्यक विभागीय अधिकाऱ्यांनी (ADO) दिलेल्या माहितीनुसार, जवानांच्या सतर्कतेमुळे मोठा अनर्थ टळला.

हेही वाचा – CJP Protest : दिल्ली पोलिसांकडून जबर लाठीचार्ज, एक तरुणी थेट आयसीयुमध्ये दाखल; अभिजीत दीपकेंनी पोस्ट करत दिली धक्कादाय माहिती

फत्तेपूर बेरी परिसरातील गोदामाला भीषण आग
यापूर्वी रविवारी फत्तेपूर बेरी पोलीस ठाण्याच्या हद्दीतील स्वरूप कॉलनी येथे इव्हेंट मॅनेजमेंटचे साहित्य ठेवलेल्या एका गोदामाला भीषण आग लागल्याची घटना घडली होती. या टीन-शेडच्या गोदामात लागलेली आग एवढी भीषण होती की ती शेजारील इमारतीमध्येही पसरली. या घटनेची माहिती मिळताच दिल्ली पोलीस आणि कॅट्स (CATS) रुग्णवाहिकांसह एकूण 15 अग्निशमन गाड्या घटनास्थळी दाखल झाल्या होत्या. ही 'कॅटेगरी 4' ची आग असल्याचे अधिकाऱ्यांनी सांगितले असून सुदैवाने यात कोणतीही जीवितहानी झाली नाही. या गोदामातील आग आटोक्यात आणल्यानंतर ती पुन्हा आग भडकू नये म्हणून अग्निशमन दलाकडून कुलिंग ऑपरेशन (Cooling Operation) राबवण्यात आले. 

राजधानीत आगीच्या वाढत्या घटनांमुळे चिंता
दिल्लीतील या लागोपाठ घडलेल्या आगीच्या घटनांमुळे निवासी आणि व्यापारी भागांतील सुरक्षेचा प्रश्न पुन्हा एकदा ऐरणीवर आला आहे. राजधानीत विविध ठिकाणी लागलेल्या आगीच्या घटनांमुळे सुरक्षा मानकांचे कडक पालन करण्याचे आवाहन प्रशासनाकडून केले जात आहे.

हेही वाचा – Flood Landslide In India : देशातील या राज्यांमध्ये मुसळधार पावसाचा कहर; जनजीवन विस्कळीत, मृतांचा आकडा 22 वर