Delhi Blast Update: अल-फलाह विद्यापीठाची ‘A ग्रेड’ मान्यता खोटी? विद्यापीठाविरोधात दोन गुन्हे दाखल

Delhi Blast Update: लाल किल्ला मेट्रो स्थानकाजवळ झालेल्या भीषण स्फोटाने संपूर्ण देश हादरलेला असताना, या प्रकरणाशी संबंधित मोठी माहिती समोर आली आहे. दिल्ली पोलिसांनी हरियाणातील फरीदाबाद येथे असलेल्या अल-फलाह विद्यापीठावर दोन स्वतंत्र एफआयआर दाखल केले आहेत. पोलिसांच्या माहितीनुसार, पहिला गुन्हा फसवणुकीशी संबंधित आहे, तर दुसरा बनावट किंवा खोट्या मान्यता दाव्यांबाबत नोंदवण्यात आला आहे.

कागदपत्रांची मागणी

शनिवारी दिल्ली गुन्हे शाखेचे पथक ओखला येथील विद्यापीठाच्या कार्यालयात पोहोचले. विद्यापीठाला अधिकृत नोटीस देत आवश्यक कागदपत्रे जमा करण्याचे निर्देश देण्यात आले आहेत. पोलिसांनी स्पष्ट केले की, विद्यापीठाच्या मान्यतेबाबत गंभीर अनियमितता आढळल्याने कारवाई अपरिहार्य ठरली आहे.

UGC–NAAC ची ठपका व कारणे दाखवा नोटीस

विद्यापीठ अनुदान आयोग (UGC) आणि राष्ट्रीय मूल्यांकन व मान्यता परिषद (NAAC) यांनी विद्यापीठाविरुद्ध तपास सुरू केला आहे. NAAC ने जाहीर केले आहे की अल-फलाह विद्यापीठाकडे कोणतीही NAAC मान्यता नाही, तसेच त्यांनी मान्यता मिळवण्यासाठी कधीच अर्जही केलेला नाही. तरीदेखील विद्यापीठाने त्यांच्या वेबसाइटवर A ग्रेड मान्यता असल्याचा दावा सार्वजनिकरित्या प्रसिद्ध केला होता.

हेही वाचा – Maharashtra Bhushan : मूर्तिकार राम सुतार यांच्या निवासस्थानी महाराष्ट्र सरकार दाखल; नोएडामध्ये प्रदान केला 'महाराष्ट्र भूषण' पुरस्कार!

NAAC च्या नोटीसमध्ये नमूद आहे की, “अल-फलाह विद्यापीठाने जनतेची, विद्यार्थ्यांची आणि पालकांची दिशाभूल केली आहे. त्यांच्या वेबसाइटवरील माहिती खोटी आणि गोंधळ निर्माण करणारी आहे.” विद्यापीठाने स्वतःला ‘अल-फलाह चॅरिटेबल ट्रस्ट’चा एक उपक्रम म्हणून दाखवत, त्यांच्या तीन महाविद्यालयांना NAAC कडून A ग्रेड असल्याचा उल्लेख केला होता. NAAC नुसार ही माहिती भ्रामक आणि हेराफेरी करणारी आहे.

हेही वाचा – DPDP Rules 2025: तुमचा डेटा, तुमचा हक्क!; सरकारच्या 'या' नव्या नियमांनी डिजिटल गोपनीयतेला मिळाले नवे कवच

लाल किल्ला स्फोट प्रकरणातील तपासादरम्यान तीन डॉक्टरांना अटक झाल्यानंतर, त्यांचे अल-फलाह विद्यापीठाशी संबंध असल्याची शक्यता व्यक्त करण्यात आली आहे. अधिकाऱ्यांच्या मते, विद्यापीठ काही संशयितांसाठी “सुरक्षित आश्रयस्थान” झाले होते का याचा तपास सुरू आहे.

विद्यापीठाचा पार्श्वभूमी

अल-फलाह चॅरिटेबल ट्रस्टद्वारे चालवले जाणारे हे संस्थान सुरुवातीला एक अभियांत्रिकी महाविद्यालय होते. 2013 मध्ये त्याला A ग्रेड मान्यता मिळाल्याचा दावा करण्यात आला होता, तर 2014 मध्ये हरियाणा सरकारने त्याला विद्यापीठाचा दर्जा दिला.