Rajiv Gandhi Case AG Perarivalan : राजीव गांधी हत्याप्रकरणी फाशीची शिक्षा सुनावलेला गुन्हेगार आता बनला वकील! 31 वर्षांच्या तुरुंगवासानंतर कायापालट
AG Perarivalan Lawyer Madras High Court : ज्या न्यायव्यवस्थेने एकेकाळी त्यांना फाशीची शिक्षा सुनावली होती, आज त्याच व्यवस्थेत ए. जी. पेरारीवलन एक वकील म्हणून नवी कारकीर्द सुरू करत आहेत. भारताचे माजी पंतप्रधान दिवंगत राजीव गांधी यांच्या हत्या प्रकरणात दोषी ठरलेल्या पेरारीवलन यांनी आयुष्यातील तब्बल 31 वर्षे तुरुंगाच्या चार भिंतींच्या आड घालवली. फाशीची शिक्षा, नंतर जन्मठेप आणि अखेर सर्वोच्च न्यायालयाच्या ऐतिहासिक निर्णयामुळे झालेली मुक्तता असा खडतर प्रवास केल्यानंतर, आता 54 वर्षीय पेरारीवलन मद्रास उच्च न्यायालयात वकिलीची सनद घेऊन दाखल झाले आहेत. अर्थातच, इतका मोठा बदल एका व्यक्तीमध्ये घडल्यामुळे याची मोठी चर्चा सुरू झाली आहे.
तुरुंगातून बाहेर पडताच शिक्षणाचा ध्यास
मे 2022 मध्ये सर्वोच्च न्यायालयाने राज्यघटनेच्या आर्टिकल 142 अंतर्गत विशेष अधिकारांचा वापर करून पेरारीवलन यांची मुक्तता केली होती. तुरुंगातून बाहेर आल्यानंतर त्यांनी वेळ न घालवता बंगळुरू येथील डॉ. बी. आर. आंबेडकर लॉ कॉलेजमध्ये प्रवेश घेतला. 2025 मध्ये कायद्याची पदवी संपादन केल्यानंतर त्यांनी ऑल इंडिया बार कौन्सिलची परीक्षा उत्तीर्ण केली. ज्या व्यक्तीने तीन दशके कैदी म्हणून न्यायव्यवस्थेचा अनुभव घेतला, तीच व्यक्ती आता कायद्याचा अभ्यास करून इतरांना न्याय मिळवून देण्यासाठी सज्ज झाली आहे.
राजीव गांधी हत्या खटल्याची पार्श्वभूमी
1991 साली श्रीपेरूंबुदुर येथे झालेल्या आत्मघाती हल्ल्यात राजीव गांधी यांची हत्या झाली होती, ज्यामध्ये पेरारीवलन यांच्यासह 7 जणांना अटक करण्यात आली होती. प्रदीर्घ कायदेशीर लढा आणि त्यांच्या आई अर्पुथम अम्मल यांनी मुलाच्या सुटकेसाठी केलेले सातत्यपूर्ण प्रयत्न यामुळे हे प्रकरण देशभर गाजले. सुरुवातीला फाशीची शिक्षा सुनावण्यात आली असली तरी, नंतरच्या काळात त्यांच्यावरील दहशतवादाचे आरोप हटवण्यात आले होते आणि शिक्षा जन्मठेपेत बदलण्यात आली होती. अखेर ३१ वर्षांनंतर त्यांची निर्दोष मुक्तता झाली.
गरीब कैद्यांसाठी लढण्याचा निर्धार
पेरारीवलन यांना मोठे किंवा श्रीमंत वकील होण्याची मुळीच इच्छा नाही. इंडियन एक्स्प्रेसशी बोलताना त्यांनी आपले ध्येय स्पष्ट केले की, ज्या कैद्यांना गरिबीमुळे कायदेशीर मदत मिळत नाही, त्यांच्यासाठी त्यांना काम करायचे आहे. विशेषतः जन्मठेपेची शिक्षा भोगत असलेले असे कैदी जे केवळ आर्थिक टंचाईमुळे तुरुंगात खितपत पडले आहेत, त्यांना बाहेर काढणे हे त्यांचे मुख्य उद्दिष्ट आहे. तुरुंगातील अनेक वर्षे जवळून पाहिल्यामुळे कैद्यांच्या व्यथा त्यांना चांगल्या प्रकारे ठाऊक आहेत.
भविष्यातील नवी भूमिका
ए. जी. पेरारीवलन यांची मद्रास उच्च न्यायालयात वकील म्हणून झालेली नियुक्ती ही केवळ एका व्यक्तीची प्रगती नसून, जिद्द आणि संघर्षाचे प्रतीक मानली जात आहे. वयाच्या 54 व्या वर्षी सुरू झालेली ही दुसरी इनिंग अनेकांसाठी प्रेरणादायी ठरत आहे. कायद्याच्या मदतीपासून वंचित राहिलेल्यांना आधार देणे, हाच त्यांच्या जीवनाचा आता नवा मार्ग असणार आहे. एका माजी कैद्याने वकील बनून त्याच न्यायालयात उभे राहणे, ही भारतीय न्यायव्यवस्थेच्या इतिहासातील एक दुर्मिळ आणि लक्षवेधी घटना ठरली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.