Salary Increment Report: वेतनवाढीत देशाची आर्थिक राजधानी मुंबई पिछाडीवर; ‘ही’ दोन शहरे अव्वल स्थानी, विद्युत अभियंत्यांना सर्वाधिक फायदा
Salary Increment Report : देशातील प्रमुख कंपन्यांकडून चालू आर्थिक वर्षात नोकरदारांना मिळणाऱ्या वेतनवाढीबाबत एक अत्यंत रंजक अहवाल समोर आला आहे. 'टीमलीज' या नामांकित संस्थेने आर्थिक वर्ष 2026-27 साठीचा रोजगार आणि वेतन अहवाल जाहीर केला आहे. या अहवालानुसार, यंदा देशाची आर्थिक राजधानी असलेल्या मुंबईला मागे टाकत चेन्नईने अव्वल स्थान पटकावले आहे. चेन्नईमध्ये सर्वाधिक 9.7 टक्के वाढ होण्याची शक्यता आहे. तर महाराष्ट्रचे सांस्कृतिक आणि आयटी हब असलेले पुणे शहर 9.6 टक्क्यांसह हैदराबादसोबत दुसऱ्या क्रमांकावर आहे. या चालू वर्षात संपूर्ण देशातील सरासरी वेतनवाढ ही 9.6 ते 10.2 टक्के यादरम्यान राहण्याचा अंदाज वर्तवण्यात आला आहे.
इलेक्ट्रिक वाहने आणि तंत्रज्ञान क्षेत्रातील नोकऱ्यांमध्ये बंपर वाढ
यंदाच्या आर्थिक वर्षात काही विशिष्ट क्षेत्रांमध्ये विकासाची मोठी गती पाहायला मिळत आहे, ज्याचा थेट फायदा तिथल्या कर्मचाऱ्यांच्या पगारावर होणार आहे. प्रामुख्याने इलेक्ट्रिक वाहने व त्यांच्याशी निगडित पायाभूत सुविधा, वित्ततंत्रज्ञान (फिनटेक), आरोग्यसुविधा व औषधनिर्माण आणि ऊर्जा व इंधन या क्षेत्रांमध्ये सर्वाधिक पगारवाढ अपेक्षित आहे. या अहवालानुसार देशातील प्रमुख नोकऱ्यांमधील वाढीचा कल पाहायला गेल्यास विद्युत अभियंत्यांच्या वेतनात यंदा देशभरात सर्वाधिक 11.2 टक्के इतकी घसघशीत वाढ होईल. गुणवत्ता नियंत्रण निरीक्षकांच्या पगारात 10.9 टक्के वाढ अपेक्षित आहे. माहिती तंत्रज्ञान म्हणजेच आयटी (IT) क्षेत्रातील कर्मचाऱ्यांना 10.3 टक्के वेतनवाढ मिळण्याचा अंदाज आहे. गुणवत्ता हमी अभियंते आणि प्रकल्प अभियंते यांना 10.2 टक्के वाढ मिळू शकते.
पुणे आणि मुंबईच्या यंदाच्या वेतनवाढीच्या अंदाजात घसरण
गेल्या आर्थिक वर्षाच्या तुलनेत यंदा महाराष्ट्रातील पुणे आणि मुंबई या दोन्ही महत्त्वाच्या शहरांमधील वेतनवाढीच्या टक्केवारीत काही प्रमाणात घट नोंदवण्यात आली आहे. आर्थिक वर्ष 2025-26 मध्ये पुणे शहर संपूर्ण देशात 10.4 टक्के अपेक्षित वाढीसह पहिल्या स्थानावर होते, जे आता 9.6 टक्क्यांवर आले आहे. मुंबई शहरातही गेल्या वर्षी 10.2 टक्के वेतनवाढ अपेक्षित धरली गेली होती, जी आता घसरून 9.3 टक्क्यांवर पोहोचली आहे. असे असूनही, पुण्यातील आयटी क्षेत्रात सर्वाधिक 11.3 टक्के, तर इलेक्ट्रिक वाहने, पायाभूत सुविधा आणि बँकिंग क्षेत्रात प्रत्येकी 10.3 टक्के वाढीचा ट्रेंड कायम आहे.
हेही वाचा – NEET UG Paper Leak: नीट-UG चा पेपर पुन्हा फुटला? सोशल मीडियावरील 'त्या' व्हिडिओवर NTA चा मोठा खुलासा
विविध व्यापारी क्षेत्रांमधील पगारवाढीचा सरासरी आलेख
अहवालानुसार, देशातील सर्वच क्षेत्रांमध्ये सारखी वेतनवाढ नसून काही ठिकाणी हा दर अतिशय स्थिर आहे, तर काही पारंपरिक क्षेत्रांमध्ये मंदावला आहे. वाहननिर्मिती, किरकोळ विक्री (रिटेल), विमा आणि बीपीओ या क्षेत्रांमधील वेतनवाढीचा दर यंदा स्थिर असून तो 8.9 ते 9.5 टक्के एवढा राहील. याउलट बँकिंग, बांधकाम व स्थावर मालमत्ता (रिअल इस्टेट), दूरसंचार आणि वस्त्रोद्योग या क्षेत्रांना या वर्षी काहीशा मंदीचा फटका बसू शकतो. या क्षेत्रांमधील पगारवाढीचा आलेख घसरून तो केवळ 8.6 ते 8.8 टक्के एवढाच नोंदवला जाण्याची दाट शक्यता आहे.
भारतातील प्रमुख शहरांचा शहरनिहाय वेतनवाढ दर
देशातील लहान-मोठ्या शहरांमध्ये कंपन्यांकडून दिल्या जाणाऱ्या वेतनवाढीची आकडेवारी पाहिल्यास प्रादेशिक समतोल बदलत असल्याचे दिसते. टीमलीजच्या अहवालानुसार भारतातील प्रमुख शहरांचा टक्केवारीनुसार क्रम खालीलप्रमाणे निश्चित करण्यात आला आहे:
– चेन्नई – 9.7 टक्के
– पुणे आणि हैदराबाद – 9.6 टक्के
– अहमदाबाद, विशाखापट्टणम – 9.5 टक्के
– बंगळुरू, कोलकाता, नागपूर – 9.4 टक्के
– दिल्ली आणि मुंबई – 9.3 टक्के
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.