WinZO Money Laundering Case : विन्झो गेमिंग प्लॅटफॉर्मचे संस्थापक सौम्या सिंह आणि पावन नंदा यांना ईडीकडून अटक; 505 कोटींची मालमत्ता गोठवली

WinZO Money Laundering Case : प्रसिद्ध रिअल-मनी गेमिंग प्लॅटफॉर्म WinZO च्या समोरील अडचणी वाढल्या आहेत. अंमलबजावणी संचालनालयाने (ED) मनी लॉन्ड्रिंग (PMLA) च्या आरोपाखाली WinZO चे सह-संस्थापक सौम्या सिंग राठोड आणि पावन नंदा यांना अटक केली आहे. अधिकाऱ्यांनी दिलेल्या माहितीनुसार, या दोघांना 26 नोव्हेंबर रोजी बंगळूर येथील ईडीच्या विभागीय कार्यालयात चौकशीसाठी बोलावण्यात आले होते आणि चौकशीनंतर त्यांना ताब्यात घेण्यात आले. नंतर स्थानिक न्यायालयाने त्यांना एका दिवसाची कोठडी सुनावली आहे.

ईडीच्या कारवाईत 505 कोटींची मालमत्ता गोठवली
या अटकेपूर्वी, चालू महिन्याच्या सुरुवातीला ईडीने दिल्ली आणि गुरुग्राम येथील WinZO च्या चार ठिकाणांवर छापे टाकले होते. यावेळी प्रीव्हेन्शन ऑफ मनी लॉन्ड्रिंग ॲक्ट (PMLA) च्या कलम 17 (1A) अंतर्गत बँक शिल्लक, बॉण्ड्स, मुदत ठेवी आणि म्युच्युअल फंडच्या स्वरूपात सुमारे 505 कोटी रुपयांची मालमत्ता गोठवण्यात आली होती. WinZO व्यतिरिक्त, ईडीने त्यांच्या तपासाचा भाग म्हणून गेम्सक्राफ्ट आणि निर्देशा नेटवर्क्स (Pocket52) शी संबंधित सुमारे 18.75 कोटी रुपये असलेल्या 8 बँक खात्यांवरही निर्बंध लादले आहेत.

अल्गोरिदमद्वारे फसवणूक केल्याचा आरोप
ईडीने 24 नोव्हेंबर रोजी खुलासा केला की, त्यांच्या तपासात WinZO ने 'गुन्हेगारी आणि अनैतिक कृत्ये' केल्याचे आढळले आहे. WinZO रिअल-मनी गेम्समध्ये ग्राहकांना 'अल्गोरिदम' (Algorithm) किंवा सॉफ्टवेअरसोबत खेळायला लावत होते, परंतु याबद्दल ग्राहकांना माहिती दिली जात नव्हती. ते खऱ्या मानवांसोबत खेळत आहेत, असा त्यांचा गैरसमज करून दिला जात होता. याशिवाय, कंपनीने खेळाडूंच्या वॉलेटमध्ये असलेली रक्कम काढण्यावर बंदी घातली किंवा मर्यादा घातली. 22 ऑगस्ट पासून रिअल मनी गेम्सवर बंदी असतानाही, कंपनीने सुमारे 43 कोटी रुपये खेळाडूंना परत न करता स्वतःकडे ठेवले आहेत, असे तपास यंत्रणेने म्हटले आहे.

हेही वाचा – Gold-Silver Rate Today: एका दिवसात सोन्याच्या दरात मोठा बदल; चांदीनेही गाठला नवा उच्चांक, आजचे ताजे दर जाणून घ्या

परदेशी बाजारपेठांमध्येही अनियमित व्यवहार
तपासात असेही आढळून आले आहे की, WinZO भारताच्या याच प्लॅटफॉर्मचा वापर करून युनायटेड स्टेट्स (United States), जर्मनी आणि ब्राझीलसारख्या बाजारपेठांमध्ये रिअल मनी गेम्स चालवत होते. WinZO US Inc. च्या नावावर अमेरिकेतील एका बँक खात्यात सुमारे 55 दशलक्ष डॉलर्स (489.90 कोटी रुपये) जमा करण्यात आले आहेत. ईडीने या यूएस (US) कंपनीला 'शेल कंपनी' (Shell Company) म्हणून संबोधले आहे, कारण तिचे सर्व कामकाज, दैनंदिन व्यवहार आणि बँक खाते व्यवस्थापन भारतातूनच हाताळले जात होते.

कंपनीचे स्पष्टीकरण आणि कायद्याची स्थिती
एका वृत्तसंस्थेने दिलेल्या वृत्तानुसार, या कारवाईबाबत WinZO शी संपर्क साधला असून WinZO ने 24 नोव्हेंबर रोजी एका निवेदनात म्हटले होते की, कंपनी तपास यंत्रणेशी पूर्ण सहकार्य करत आहे आणि यापुढेही प्रक्रिया पूर्णपणे पाळेल. त्यांनी 'निष्पक्षता आणि पारदर्शकता' हा WinZO च्या कार्याचा मूळ आधार असल्याचे सांगत, ते सर्व लागू कायद्यांचे पूर्णपणे पालन करत असल्याचे स्पष्ट केले आहे. दरम्यान, देशात ऑनलाइन गेमिंग कायदा अजूनही लागू व्हायचा आहे. 2 ऑक्टोबर रोजी जारी केलेल्या नियमांनुसार, कायदा लागू झाल्यानंतर गेमिंग कंपन्यांना 180 दिवसांच्या आत वापरकर्त्यांचे देणे असलेले पैसे परत करणे बंधनकारक असेल.

हेही वाचा – Share Market Updates: निफ्टी 50 ने नवे शिखर गाठले; सेंसेक्समध्येही 250 पेक्षा जास्त अंकांची वाढ