Jaipur Neeraj Sharma Case: नीरज शर्मा प्रकरणात धक्कादायक ट्विस्ट; हुशार मुलगी चुलत भावाच्या जाळ्यात अडकली अन् संपत्तीसाठी जन्मदात्या आईचाच काटा काढला?

Jaipur Neeraj Sharma Murder Case: देशभरात सध्या जयपूरमधील नीरज शर्मा हत्याकांड प्रचंड चर्चेत आहे. सुरुवातीला एक साधा रस्ता अपघात वाटणाऱ्या या घटनेमागे एक अत्यंत भयंकर आणि कौटुंबिक कट असल्याचे आता पोलिसांच्या तपासात उघड झाले आहे. 4 जुलै रोजी नीरज शर्मा यांचा एका स्कॉर्पिओ वाहनाने धडक दिल्याने संशयास्पद मृत्यू झाला होता. नीरज यांचे भाऊ राकेश यांनी हा केवळ अपघात नसून घातपात असल्याचा संशय व्यक्त करत पोलिसांत तक्रार दाखल केली. यानंतर पोलिसांनी तपासाची चक्रे फिरवली असता, नीरज शर्मा यांची 23 वर्षांची सख्खी मुलगी आयुषी शर्मा हिनेच 7 लाख रुपयांची मोठी सुपारी देऊन पोटच्या आईचा काटा काढल्याचे निष्पन्न झाले. या संपूर्ण प्रकरणात पोलिसांनी मुख्य आरोपी आयुषी शर्मासह तिचे काका मोहन स्वरूप आणि इतर काही आरोपींना बेड्या ठोकल्या आहेत.

चुलत भावासोबत लिव्ह-इन आणि अनैतिक संबंध
या थरारक हत्याकांडात आता एक अतिशय धक्कादायक माहिती समोर आली आहे. मृत नीरज शर्मा यांच्या भावाच्या वकिलांनी केलेल्या खळबळजनक दाव्यानुसार, आरोपी आयुषी हिचे तिच्या स्वतःच्याच चुलत भावासोबत अनैतिक संबंध होते आणि ती गेल्या 1 वर्षापासून त्याच्यासोबत लिव्ह-इन रिलेशनशिपमध्ये (Live-in Relationship) राहत होती. ती आपली विधवा आई आणि भावापासून वेगळी होऊन चुलत भाऊ बलराज उर्फ रवी याच्यासोबत राहत होती. या दोघांमध्ये अनैतिक संबंध असल्याचाही संशय व्यक्त केला जात आहे. आयुषी मूळची अभ्यासात अत्यंत हुशार होती आणि नेहमी आपल्या आई-वडिलांसोबत राहायची, परंतु बलराजच्या संपर्कात आल्यानंतर तिच्या वागण्यात प्रचंड आणि चिंताजनक बदल झाला.

प्रियकराच्या सांगण्यावरून रचला कट
या संपूर्ण भीषण हत्येचा मुख्य सूत्रधार आयुषीचा चुलत भाऊ आणि प्रियकर बलराज हाच असल्याचे बोलले जात आहे. मृत विजय शर्मा (आयुषीचे वडील) हे न्यायालयात कोर्ट मास्टर म्हणून कार्यरत होते आणि त्यांनीच बलराजला त्याचे 'एलएलबी' (LLB) चे शिक्षण पूर्ण करण्यासाठी मोठी आर्थिक मदत केली होती. शिक्षण पूर्ण होऊनही बलराज काहीही कामधंदा करत नव्हता. बेरोजगार राहिल्यानंतर ज्या कुटुंबाने त्याला आधार दिला, त्याच कुटुंबाची अफाट मालमत्ता हडप करण्याचा कट त्याने रचला. मालमत्तेवर डोळा ठेवून त्याने आधी आपले काका विजय शर्मा यांच्या मृत्यूची योजना आखली आणि त्यानंतर काकू नीरज यांनाही संपवण्याचा कट रचला, ज्यामध्ये त्याने हुशार आयुषीचा बुद्धीभेद करून तिचा वापर करून घेतला, असा दावा आयुषीच्या मामांच्या वकिलांनी केला आहे.

हेही वाचा – Navi Mumbai Crime: अनैतिक संबंधांचा रक्तरंजित शेवट! पत्नी-प्रियकराने पतीची हत्या करून मृतदेहाचे केले तीन तुकडे; 11 महिन्यांनी उलगडलं थरारक रहस्य

नोकरी आणि वडिलोपार्जित संपत्तीचा लोभ
आईची हत्या करण्यामागे आयुषीचा अत्यंत क्रूर आणि स्वार्थी हेतू होता. अनुकंपा तत्त्वावर आईला मिळालेली सरकारी नोकरी कायदेशीररीत्या आपल्याला मिळावी आणि वडिलांची संपूर्ण मालमत्ता आपल्या नावावर व्हावी, अशी आयुषी आणि बलराजची योजना होती. याच संपत्तीच्या हव्यासापोटी तिने 7 लाखांची सुपारी देऊन आपल्याच आईची निर्दयी हत्या घडवून आणली. या कटाचा मुख्य सूत्रधार असलेला मोहन स्वरूप यांचा मुलगा बलराज उर्फ रवी हा सध्या पोलिसांना गुंगारा देऊन फरार झाला आहे आणि पोलीस त्याचा कसून शोध घेत आहेत.

वकिलांचे खळबळजनक दावे आणि पुढील तपास
वकील चंद्रप्रकाश यांच्या दाव्यांमुळे या गुन्ह्याचे संपूर्ण स्वरूप बदलले असून, कौटुंबिक नात्यांना काळीमा फासणाऱ्या या घटनेमुळे जयपूर हादरले आहे. जरी पोलिसांनी मुख्य आरोपींना अटक केली असली, तरी चुलत भावासोबतच्या अनैतिक संबंधांविषयी आणि या हत्येच्या अन्य तांत्रिक बाबींविषयी पोलिसांकडून अद्याप कोणतीही अधिकृत घोषणा झालेली नाही. ज्या कुटुंबाने बलराजला वकील बनवले, त्यांनीच अशा प्रकारे आपल्या डोक्याचा वापर करून संपूर्ण कुटुंबाचा घात केल्याने परिसरात तीव्र संताप व्यक्त केला जात आहे. पोलीस सध्या या प्रकरणाचा पुढील सखोल तपास करत आहेत.

हेही वाचा – Ashok Kharat Case: 100 हून अधिक दिवस जेलमध्ये घालवल्यानंतर अशोक खरातचं जेलमध्ये नवं कांड; पहाटेच्या 'त्या' कृतीने खळबळ