Pakistani Spy Arrested : भारतीय हवाई दलात पाकिस्तानी हेर! आसाममधून अटक; ‘ISI’ ला गोपनीय माहिती पुरवल्याचे समोर

Pakistani Spy Arrested : भारतीय हवाई दलाच्या (IAF) तळावर कार्यरत असलेल्या एका कर्मचाऱ्याला पाकिस्तानसाठी हेरगिरी केल्याच्या आरोपाखाली अटक करण्यात आली आहे. राजस्थान इंटेलिजन्स आणि हवाई दलाच्या गुप्तचर विभागाने संयुक्त कारवाई करत आसाममधील चाबुआ हवाई दलाच्या तळावरून सुमित कुमार याला ताब्यात घेतले. हा कर्मचारी मागील काही काळापासून भारतीय संरक्षण क्षेत्राशी संबंधित अत्यंत गोपनीय माहिती पाकिस्तानी गुप्तचर संस्था ISI च्या हँडलर्सना पुरवत असल्याचे तपासात निष्पन्न झाले आहे. या घटनेमुळे लष्करी तळांवरील अंतर्गत सुरक्षेचा प्रश्न पुन्हा एकदा ऐरणीवर आला आहे.

कोण आहे सुमित कुमार आणि त्याचा गुन्हा काय?
अटक करण्यात आलेला 36 वर्षीय सुमित कुमार हा उत्तर प्रदेशातील प्रयागराज जिल्ह्यातील लाहुरपार येथील रहिवासी आहे. तो आसाममधील चाबुआ एअरफोर्स स्टेशनवर मल्टी टास्किंग स्टाफ (MTS) या पदावर कार्यरत होता. सुमित आपल्या पदाचा गैरवापर करून हवाई दलाची संवेदनशील माहिती गोळा करायचा आणि ती सोशल मीडियाच्या माध्यमातून पाकिस्तानातील हस्तकांना पाठवायचा, अशी माहिती अतिरिक्त पोलीस महासंचालक प्रफुल्ल कुमार यांनी दिली आहे. सुमित हा 2023 सालापासून पाकिस्तानी गुप्तचर संस्थांच्या संपर्कात असल्याचे तपासात समोर आले आहे. एका चतुर्थ श्रेणी कर्मचाऱ्याने थेट लढाऊ विमाने आणि क्षेपणास्त्रांची माहिती शत्रूला पुरवणे, हे भारतीय ऊर्जा आणि संरक्षण सुरक्षेपुढील मोठे आव्हान मानले जात आहे. 

तपासाची चक्रे आणि एका अटकेमुळे लागली लिंक
या मोठ्या हेरगिरी प्रकरणाचा छडा जानेवारी 2026 मध्ये लागला, जेव्हा राजस्थानच्या जैसलमेरमधील झबराराम नावाच्या व्यक्तीला अटक करण्यात आली होती. झबरारामच्या चौकशीदरम्यान सुमित कुमारचे नाव समोर आले. त्यानंतर राजस्थान इंटेलिजन्सने नवी दिल्लीतील हवाई दल गुप्तचर विभागाच्या मदतीने सापळा रचून रविवारी (22 मार्च) त्याला आसाममधून बेड्या ठोकल्या. सुमितला या माहितीच्या बदल्यात पाकिस्तानातून मोठ्या प्रमाणावर पैसे मिळत असल्याचेही स्पष्ट झाले आहे.

हेही वाचा – PM Narendra Modi : 'भारतासमोर अभूतपूर्व आव्हाने, सतर्क राहा, एकजूट राहा'; मध्य पूर्वेतील संघर्षाच्या पार्श्वभूमीवर पंतप्रधान मोदींचे आवाहन

गोपनीय माहितीची पाकिस्तानला विक्री
सुमितने केवळ चाबुआ तळाचीच नव्हे, तर बिकानेरमधील नाल एअरफोर्स स्टेशन आणि इतर सैन्य तळांची महत्त्वाची माहिती शत्रू देशाला पुरवली होती. यामध्ये प्रामुख्याने भारतीय लढाऊ विमानांचे लोकेशन, क्षेपणास्त्र प्रणाली (Missile Systems) आणि लष्करी अधिकारी व कर्मचाऱ्यांची वैयक्तिक माहिती यांचा समावेश होता. इतकेच नाही तर, तो स्वतःच्या मोबाईल नंबरचा वापर करून पाकिस्तानी हँडलर्सना सोशल मीडिया अकाउंट्स तयार करण्यासाठी मदत देखील करत होता. भारतीय संरक्षण व्यवस्थेला खिंडार पाडण्याचा प्रयत्न करणाऱ्या या हेरगिरीच्या जाळ्याचे धागेदोरे आणखी कुठे पसरले आहेत, याचा तपास यंत्रणा करत आहेत.

कठोर कलमान्वये गुन्हा दाखल
अटकेनंतर सुमितवर शासकीय गुप्तता अधिनियम (Official Secrets Act), 1923 आणि भारतीय न्याय संहितेच्या संबंधित कलमान्वये गुन्हा दाखल करण्यात आला आहे. या नेटवर्कमधील इतर सदस्यांची ओळख पटवण्यासाठी सुमितची कसून चौकशी केली जात असून, येत्या काही दिवसांत या प्रकरणात आणखी काही लोकांना अटक होण्याची शक्यता आहे. सुमित कुमारने पैशांच्या हव्यासापोटी देशाची सुरक्षा धोक्यात घातली असून, अशा प्रकारच्या 'हनी ट्रॅप' किंवा आर्थिक आमिषांना बळी पडणाऱ्या कर्मचाऱ्यांवर लक्ष ठेवण्यासाठी आता हवाई दलाने कडक पावले उचलली आहेत. 

हेही वाचा – Apple Security Warning: iPhone आणि iPad वापरकर्त्यांनो सावधान! तुमची वैयक्तिक माहिती धोक्यात? सरकारचा मोठा इशारा