Sujit Bose : बंगालमध्ये सत्तांतर होताच ईडी ॲक्शन मोडमध्ये; माजी मंत्री सुजित बोस यांना अटक, टीएमसीला मोठा हादरा

Former TMC minister Sujit Bose arrested by ED : पश्चिम बंगालमध्ये सुवेंदू अधिकारी यांच्या नेतृत्वाखाली भाजपाचे सरकार येताच राजकीय वातावरणात मोठी खळबळ उडाली आहे. सत्ता स्थापन होऊन अवघ्या 1 आठवडा उलटत नाही तोच सक्तवसुली संचालनालयाने (ED) तृणमूल काँग्रेसचे (TMC) दिग्गज नेते आणि माजी मंत्री सुजित बोस यांना सोमवारी रात्री उशिरा अटक केली. नगरपालिकांमधील भरती प्रक्रियेत झालेल्या मोठ्या आर्थिक गैरव्यवहार आणि मनी लाँड्रिंग प्रकरणी ही कारवाई करण्यात आली आहे. एका वृत्तसंस्थेच्या वृत्तानुसार, आज 12 मे रोजी त्यांना विशेष न्यायालयात हजर केले जाणार असून, ईडी त्यांच्या कोठडीसाठी न्यायालयात मागणी करणार आहे.

दिवसभराच्या चौकशीनंतर अटक
63 वर्षीय सुजित बोस यांची सॉल्ट लेक येथील सीजीओ कॉम्प्लेक्समध्ये ईडीच्या अधिकाऱ्यांनी सखोल चौकशी केली. मात्र, दिवसभराच्या या चौकशीत बोस यांनी दिलेल्या उत्तरांमध्ये मोठी विसंगती आढळून आली. तपासादरम्यान त्यांनी अधिकाऱ्यांना सहकार्य न केल्याने आणि प्रश्नांची उत्तरे टाळल्याने अखेर त्यांना मनी लाँड्रिंग कायद्यांतर्गत ताब्यात घेण्यात आले. यापूर्वी ऑक्टोबर 2025 मध्येच त्यांच्या निवासस्थानी आणि त्यांच्या मुलाच्या व्यवसायावर छापे टाकून ईडीने अनेक महत्त्वाची कागदपत्रे जप्त केली होती.

काय आहेत नेमके आरोप?
हा संपूर्ण घोटाळा पश्चिम बंगालमधील विविध नगरपालिकांमध्ये झालेल्या मजूर, सफाई कामगार, लिपिक आणि ड्रायव्हर यांसारख्या पदांच्या भरतीशी संबंधित आहे. ज्यावेळी सुजित बोस दक्षिण दमदम नगरपालिकेचे उपाध्यक्ष होते, तेव्हा त्यांनी सुमारे 150 उमेदवारांना बेकायदेशीरपणे नोकऱ्या मिळवून दिल्याचे प्राथमिक तपासात समोर आले आहे. या नोकऱ्यांच्या बदल्यात त्यांनी मोठी लाच घेतल्याचा संशय तपास यंत्रणेला आहे. तपासादरम्यान बोस यांच्याशी संबंधित काही फ्लॅट्स आणि बँक खात्यांमध्ये संशयास्पद व्यवहार झाल्याचेही पुरावे ईडीच्या हाती लागले आहेत.

हेही वाचा – Work From Home: पुन्हा वर्क फ्रॉम होम? पंतप्रधानांच्या आवाहनानंतर IT संघटनेचे सरकारला थेट पत्र; केली 'ही' मोठी मागणी

सुजित बोस यांचा राजकीय आलेख
सुजित बोस हे एकेकाळी माकपचे नेते सुभाष चक्रवर्ती यांचे निकटवर्तीय होते, परंतु 2000 च्या दशकात त्यांनी तृणमूल काँग्रेसमध्ये प्रवेश केला. 2009 मध्ये ते पहिल्यांदा विधानसभेवर निवडून गेले आणि त्यानंतर बिधाननगर मतदारसंघातून ते 3 वेळा आमदार म्हणून निवडून आले होते. ममता बॅनर्जी यांच्या सरकारमध्ये त्यांनी अग्निशमन मंत्री म्हणून काम पाहिले असून, कोलकातामधील श्रीभूमी स्पोर्टिंग क्लबच्या भव्य दुर्गा पूजेचे आयोजक म्हणूनही ते प्रसिद्ध आहेत. नुकत्याच झालेल्या निवडणुकीत भाजपाच्या शरदवत मुखर्जी यांनी त्यांना 37,000 हून अधिक मतांनी पराभूत केले होते.

बंगालच्या राजकारणात खळबळ
राज्यात भाजपाची सत्ता आल्यानंतर झालेली ही पहिलीच मोठी कारवाई असल्याने तृणमूल काँग्रेसच्या गोटात चिंतेचे वातावरण आहे. भ्रष्टाचाराच्या जुन्या प्रकरणांचा तपास आता वेगाने सुरू झाल्याचे या अटकेवरून दिसून येत आहे. ही केवळ सुरुवात असून आगामी काळात तृणमूलच्या आणखी काही मोठ्या नेत्यांवर केंद्रीय तपास यंत्रणांकडून कारवाई केली जाण्याची शक्यता वर्तवण्यात येत आहे. सत्तापालटानंतर अवघ्या काही दिवसातच घडलेल्या या घडामोडींमुळे बंगालचे राजकारण पुन्हा एकदा ढवळून निघाले आहे.

हेही वाचा – CM J. Vijay : 'व्यसनमुक्त' तामिळनाडूच्या दिशेने पहिलं पाऊल; मुख्यमंत्री विजय यांचे मंदिरे, शाळा, बसस्थानकांच्या परिसरात दारू बंदीचे आदेश