Bhargavi Chirmule Mother : पुणे पोलिसांची मोठी कामगिरी! अभिनेत्री भार्गवी चिरमुलेच्या आईची सायबर फसवणुकीतील रक्कम वर्षभराने परत
Bhargavi Chirmule Mother Online Bank Fraud Money Recovered: मराठी सिनेसृष्टीतील प्रसिद्ध अभिनेत्री भार्गवी चिरमुले हिच्या आईची मागील वर्षी एका सायबर भामट्याची फसवणूक केली होती. ऑगस्ट महिन्यात त्यांच्या मातोश्रींना MNGL गॅस कनेक्शनच्या बिलाबाबत एक अनोळखी व्हिडिओ कॉल आला होता. समोरच्या व्यक्तीने दिलेल्या सूचनेनुसार पावले उचलत असताना, सायबर चोरट्यांनी त्यांच्या बँक खात्यावर डल्ला मारला. सायबर गुन्हेगारांनी कोणतीही पूर्वकल्पना न देता बँक खात्यातून तब्बल 35 हजार रुपये परस्पर काढून घेतले होते.
वारजे पोलिसांचा तांत्रिक तपास आणि कारवाई
आपली फसवणूक झाल्याचे लक्षात येताच चिरमुले यांच्या कुटुंबीयांनी तातडीने या प्रकरणाची तक्रार सायबर पोलिसांकडे नोंदवली होती. त्यानंतर हे संवेदनशील प्रकरण पुढील तपासासाठी वारजे पोलीस ठाण्याकडे वर्ग करण्यात आले. वारजे येथील सायबर पथकाने अत्यंत कौशल्याने तांत्रिक विश्लेषण केले आणि तपासाच्या आधारे फसवणूक करणाऱ्या गुन्हेगारांच्या बँक खात्याचा अचूक माग काढला. पोलिसांनी तत्परता दाखवत संबंधित बँक खाते तात्काळ फ्रीज (गोठवले) केले आणि फसवणूक झालेली रक्कम सुरक्षित केली.
न्यायालयीन प्रक्रियेनंतर रक्कम सुपूर्द
बँक खाते फ्रीज केल्यानंतर पोलिसांनी आवश्यक ती सर्व न्यायालयीन प्रक्रिया कायदेशीररीत्या पूर्ण केली. त्यानंतर जवळपास 1 वर्षाच्या कालावधीनंतर फसवणूक झालेली 35 हजार रुपयांची संपूर्ण रक्कम मूळ तक्रारदारांना परत मिळवून देण्यात पोलिसांना यश आले. अभिनेत्री भार्गवी चिरमुले आणि त्यांच्या आईने पोलीस ठाण्यात जाऊन आपली हक्काची रक्कम स्वीकारली. कष्टाचे पैसे परत मिळाल्याबद्दल चिरमुले कुटुंबीयांनी वारजे पोलिसांचे मनापासून आभार मानले आहेत.
सायबर पोलिसांचे नागरिकांना आवाहन
या यशस्वी कारवाईनंतर वारजे पोलिसांनी नागरिकांच्या सुरक्षेसाठी एक महत्त्वाचा सल्ला जारी केला आहे. कोणत्याही अनोळखी व्यक्तीने केलेल्या व्हिडिओ कॉलवर किंवा त्यांनी पाठवलेल्या संशयास्पद लिंक्सवर नागरिकांनी अजिबात विश्वास ठेवू नये, असे आवाहन पोलिसांनी केले आहे. तसेच, अनोळखी व्यक्तींच्या सांगण्यावरून मोबाईलमध्ये कोणतेही अनोळखी ॲप डाऊनलोड करू नका, अन्यथा आर्थिक फसवणुकीला सामोरे जावे लागू शकते, असा इशाराही सायबर पथकाने दिला आहे.
हेही वाचा – KBC 18 Premiere: 'कौन बनेगा करोडपती 18' च्या प्रीमियरची तारीख जाहीर; अमिताभ बच्चन यांचे धमाकेदार पुनरागमन
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.