आलिया भट्ट आणि शर्वरी वाघ यांची मुख्य भूमिका असलेल्या ‘अल्फा’ (Alpha) या आगामी चित्रपटाच्या टीझरने सोशल मीडियावर चांगलीच चर्चा निर्माण केली आहे. याचे कारण केवळ त्यातील थरारक दृश्ये हेच नाही, तर बुधवारी टीझर प्रदर्शित झाल्यानंतर लगेचच, अनेक प्रेक्षकांनी या चित्रपटातील काही महत्त्वाच्या प्रसंगांची तुलना ल्यूक बेसन यांच्या 1990 मधील ‘ला फेम निकिता’ (La Femme Nikita) या फ्रेंच थ्रिलर चित्रपटाशी करण्यास सुरुवात केली. काहींनी ‘अमेरिकन स्नायपर’ (American Sniper) मधील एका प्रसिद्ध संवादाशी याचे साम्य असल्याचे निदर्शनास आणून दिले आहे. टीझरची सुरुवात आलिया आणि बॉबी देओल यांच्या एकत्र जेवणाच्या दृश्याने होते. तिच्या 18 व्या वाढदिवसानिमित्त तिला शुभेच्छा देताना, बॉबी तिला एका खोलीचा क्रमांक असलेले कार्ड देतो आणि सांगतो की, आता तिच्या अनेक वर्षांच्या प्रशिक्षणाचा उपयोग करण्याची वेळ आली आहे. त्यानंतर टीझरमध्ये ॲक्शन दृश्यांची मालिका (मोंटाज) पाहायला मिळते. ज्यातून असे सूचित होते की बॉबीच्या पात्राने तिला एक अत्यंत कुशल आणि घातक गुप्तहेर म्हणून घडवण्यासाठी अनेक वर्षे खर्ची घातली आहेत. चित्रपटाच्या सुरुवातीच्या याच भागामुळे ‘ला फेम निकिता’ (La Femme Nikita) या चित्रपटाशी याची तुलना केली जाते. ल्युक बेसन दिग्दर्शित या फ्रेंच क्लासिक चित्रपटाची कथा निकिता या एका अशा तरुणीभोवती फिरते. जिच्या आयुष्यात अनेक समस्या असतात. खुनाच्या आरोपाखाली अटक झाल्यानंतर एका सरकारी संस्थेद्वारे तिला गुप्तपणे भरती करून घेतले जाते. तिचा मृत्यू झाल्याचे भासवले जाते आणि त्यानंतर अनेक वर्षे कठोर प्रशिक्षण घेऊन ती एक कुशल मारेकरी म्हणून समोर येते, जिच्यावर गुप्त मोहिमा पार पाडण्याची जबाबदारी सोपवली जाते.
दोन्ही चित्रपटांमधील रेस्टॉरंटमधील दृश्यांमध्ये असलेले साम्य प्रेक्षकांच्या त्वरित लक्षात आले. ‘अल्फा’ (Alpha) मध्ये, बॉबी देओलचे पात्र आलिया भट्टने साकारलेल्या आपल्या मुलीला तिच्या 18 व्या वाढदिवसानिमित्त एका आलिशान रेस्टॉरंटमध्ये घेऊन जाते, जिथे तिला तिची पहिली मोहीम (मिशन) सोपवली जाते. वाढदिवसाचे सेलिब्रेशन होईल अशी सुरुवातीला अपेक्षा असताना तिला निराशा पदरी पडते, मात्र अखेरीस ती ती मोहीम स्वीकारते. ‘ला फेम निकिता’ (La Femme Nikita) या चित्रपटातही अशाच प्रकारचा एक प्रसंग असल्याचे चाहत्यांच्या लक्षात आले. या फ्रेंच चित्रपटात, त्शकी कार्यो (Tchky Karyo) यांनी साकारलेली ‘बॉब’ची व्यक्तिरेखा ॲन पॅरिलॉड (Anne Parillaud) यांनी साकारलेल्या ‘निकिता’ला एका उच्चभ्रू रेस्टॉरंटमध्ये घेऊन जाते. बाहेर फिरण्यासाठी म्हणून सुरू झालेली ती संध्याकाळ लवकरच एका ‘मिशन ब्रीफिंग’मध्ये बदलते.
Alpha is fully copied of french movie La Femme Nikita https://t.co/oO2PHBkHbW pic.twitter.com/lpDRrPlsJ4 — nysa (@chalkalaana) June 10, 2026
हे साम्य लगेचच नेटकऱ्यांसाठी चर्चेचा विषय बनला आहे. एका सोशल मीडिया वापरकर्त्याने ‘ला फेम निकिता’मधील एक दृश्य शेअर केले आणि लिहिले, “बीबीएनजीने #अल्फा टीझरमधील एका दृश्याची नक्कल केल्याचे नमूद केले आहे. महत्त्वाचा शब्द आहे ‘ढोबळपणे नक्कल’. सुरुवातीचे दृश्य ल्यूक बेसनच्या अॅक्शन क्लासिक ‘ला फेम निकिता’मधील दृश्याची ढोबळपणे नक्कल आहे.” दुसऱ्या एका वापरकर्त्याने दावा केला, “सुरुवातीचे दृश्य ल्यूक बेसनच्या अॅक्शन क्लासिक ‘ला फेम निकिता’मधील दृश्याची 90 टक्के नक्कल आहे. कथानकही सारखेच आहे.” या टीझरमुळे बॉबी देओलच्या पात्राने आलियाच्या हेर-पात्राला प्रशिक्षण देताना वापरलेल्या ‘लांडगा आणि मेंढी’च्या उपमेवरूनही चर्चा सुरू झाली आहे. काही प्रेक्षकांच्या मते, हा संवाद क्लिंट ईस्टवुड यांच्या 2014 मधील ‘अमेरिकन स्नायपर’ (ज्यात ब्रॅडली कूपरची मुख्य भूमिका होती) या युद्धविषयक चित्रपटातील अशाच प्रकारच्या उपमेची आठवण करून देणारा आहे.
