Donald Trump: ट्रम्प यांचा इराणला 48 तासांचा अल्टीमेटम; ‘स्ट्रेट ऑफ होर्मुज’ खुला करा अन्यथा वीज प्रकल्प धडाधड उडवू, अमेरिका-इराण युद्ध पेटणार?

वॉशिंग्टन: मध्यपूर्वेत अमेरिका, इस्रायल आणि इराण यांच्यात सुरू असलेल्या संघर्षाला आता तीन आठवडे पूर्ण झाले असून परिस्थिती अधिकच तणावपूर्ण बनली आहे. या पार्श्वभूमीवर अमेरिकेने इराणला थेट इशारा दिला आहे. अमेरिकेचे राष्ट्राध्यक्ष डोनाल्ड ट्रम्प यांनी रविवारी स्पष्ट शब्दांत चेतावणी देत म्हटले की, पुढील 48 तासांत स्ट्रेट ऑफ होर्मुज पुन्हा खुला केला नाही तर अमेरिका इराणमधील अनेक वीज प्रकल्पांवर हल्ला करून त्यांना उद्ध्वस्त करेल.

डोनाल्ड ट्रम्प यांनी सोशल मीडिया प्लॅटफॉर्म ट्रूथवर पोस्ट करत इराणला हा इशारा दिला. अमेरिका-इस्रायलच्या हल्ल्यानंतर आणि त्याला प्रत्युत्तर म्हणून इराणकडून करण्यात आलेल्या कारवाईनंतर इराणी सैन्याने होर्मुजच्या मध्यातून जाणाऱ्या जहाजवाहतुकीवर पूर्णपणे निर्बंध लावले आहेत. हा मार्ग तातडीने खुला करण्याचे आवाहन अमेरिकेने केले आहे.

ट्रम्प यांनी त्यांच्या पोस्टमध्ये स्पष्ट केले की, दिलेल्या वेळेत कोणत्याही अटी किंवा धमक्या न देता जर इराणने स्ट्रेट ऑफ होर्मुज हा महत्त्वाचा समुद्री मार्ग खुला केला नाही, तर अमेरिकेकडून इराणमधील वेगवेगळ्या वीज प्रकल्पांवर हल्ले केले जातील. या कारवाईची सुरुवात इराणच्या सर्वात मोठ्या वीज प्रकल्पापासून करण्यात येईल, असेही त्यांनी नमूद केले.

हेही वाचा: Alka Kerkar: मुंबईच्या माजी उपमहापौर अलका केरकर यांचे दुःखद निधन; राजकीय वर्तुळात शोककळा

दरम्यान, स्ट्रेट ऑफ होर्मुजच्या मध्यातील तणावामुळे जागतिक ऊर्जा बाजारावर मोठा परिणाम होत आहे. जगातील सुमारे पाचव्या भागाचा कच्च्या तेलाचा पुरवठा या मार्गातून होतो. जहाजवाहतुकीला निर्माण झालेल्या धोक्यामुळे आंतरराष्ट्रीय बाजारात कच्च्या तेलाच्या किमती झपाट्याने वाढू लागल्या असून ऊर्जा पुरवठ्यावर दबाव निर्माण झाला आहे.

याच वेळी अमेरिकेच्या प्रशासनाने एक महत्त्वाचा निर्णय जाहीर केला आहे. इराणी तेलावर लादलेले काही निर्बंध तात्पुरते शिथिल करण्याचा निर्णय घेण्यात आला आहे. शुक्रवारीपर्यंत जहाजांवर आधीच लादले गेलेले तेल या सवलतीच्या कक्षेत येणार असल्याचे स्पष्ट करण्यात आले आहे. अमेरिकेचे ट्रेझरी सचिव स्कॉट बेसेंट यांनी सोशल मीडिया प्लॅटफॉर्म एक्सवर पोस्ट करत सांगितले की, या निर्णयामुळे जागतिक बाजारात सुमारे 140 मिलियन बॅरल तेल उपलब्ध होऊ शकते.

दरम्यान, संघर्ष अधिक धोकादायक टप्प्यात पोहोचल्याची चिन्हे दिसू लागली आहेत. इस्रायली अधिकाऱ्यांच्या दाव्यानुसार, इराणने प्रथमच लांब पल्ल्याच्या क्षेपणास्त्रांचा वापर केला आहे. त्यामुळे मध्यपूर्वेच्या बाहेरील प्रदेशांवरही संभाव्य हल्ल्याचा धोका वाढल्याची भीती व्यक्त केली जात आहे. या घडामोडींमुळे जागतिक पातळीवर चिंता वाढली असून पुढील काही दिवसांत परिस्थिती कोणत्या दिशेने जाते, याकडे संपूर्ण जगाचे लक्ष लागले आहे. 

हेही वाचा: Iran Israel US War: इस्रायल रक्ताळले! ‘या’ दोन महत्वाच्या शहरांना इराणने केले लक्ष्य; हल्ल्यात लहान मुलांसह निष्पाप नागरिकांचा करुण अंत