Donald Trump: ‘इराणकडे अण्वस्त्रं आली तर जग धोक्यात येईल’; डोनाल्ड ट्रम्प यांनी जर्मनीला सुनावलं; सोशल मीडियावरील पोस्टने वाढवला आंतरराष्ट्रीय तणाव
अमेरिकेचे राष्ट्राध्यक्ष डोनाल्ड ट्रम्प यांनी जर्मनीवर जोरदार टीका करत आंतरराष्ट्रीय राजकारणात खळबळ उडवली आहे. ‘ट्रुथ सोशल’ या सोशल मीडिया प्लॅटफॉर्मवर पोस्ट करत त्यांनी जर्मनीचे चान्सलर फ्रेडरिक मर्ज यांच्या वक्तव्यावर निशाणा साधला.
ट्रम्प यांनी आरोप केला की, मर्ज यांना इराणकडे अण्वस्त्रे असणे मान्य असल्याचा संकेत मिळतो, मात्र हा दृष्टिकोन पूर्णपणे चुकीचा असल्याचे त्यांनी स्पष्ट केले. “इराणकडे अण्वस्त्रे आली तर संपूर्ण जग धोक्यात येऊ शकते,” असा इशाराही त्यांनी दिला. त्यांच्या मते, अशा परिस्थितीत जागतिक सुरक्षेला गंभीर धोका निर्माण होऊ शकतो.
यासोबतच ट्रम्प यांनी जर्मनीच्या आर्थिक आणि राजकीय स्थितीवरही प्रश्नचिन्ह उपस्थित केले. “जर्मनी सध्या अनेक क्षेत्रांत कमकुवत कामगिरी करत आहे,” असा दावा त्यांनी केला. तसेच इराणच्या प्रश्नावर आपण सध्या जे पावले उचलत आहोत, ती इतर देशांनी किंवा माजी राष्ट्राध्यक्षांनी आधीच उचलायला हवी होती, असेही त्यांनी नमूद केले.
दरम्यान, चान्सलर मर्ज यांनी नुकत्याच दिलेल्या एका वक्तव्यात अमेरिकेच्या इराणविरोधी कारवाईवर टीका केली होती. त्यांच्या मते, अमेरिकेकडे या संघर्षातून बाहेर पडण्याची स्पष्ट रणनीती नाही. तसेच त्यांनी इराण अपेक्षेपेक्षा अधिक सक्षम असल्याचेही नमूद केले.
मर्ज यांनी जर्मनीतील राइन-वेस्टफेलिया प्रदेशात बोलताना होर्मुज सामुद्रधुनी या महत्त्वाच्या तेल वाहतूक मार्गाबाबतही चिंता व्यक्त केली. त्यांनी सांगितले की, हा जागतिक अर्थव्यवस्थेसाठी अत्यंत महत्त्वाचा मार्ग असून, तेथे लष्करी सापळ्यांमुळे धोका निर्माण झाला आहे. यामुळे जागतिक तेल पुरवठा आणि अर्थव्यवस्थेवर गंभीर परिणाम होऊ शकतो.
एकूणच, अमेरिकेचे आणि जर्मनीचे हे परस्परविरोधी दृष्टिकोन सध्या आंतरराष्ट्रीय स्तरावर चर्चेचा विषय ठरत आहेत. इराणचा मुद्दा, अण्वस्त्रांचा धोका आणि जागतिक ऊर्जा सुरक्षेच्या पार्श्वभूमीवर या वक्तव्यांना विशेष महत्त्व प्राप्त झाले आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.