UH3H Helicopter: आकाशातून किनाऱ्यापर्यंत; विशाखापट्टणम बीच रोडवर उभारलं UH-3H हेलिकॉप्टर संग्रहालय

Helicopter Museum: भारतीय नौदलाच्या इतिहासात मोलाचा ठसा उमटवलेलं UH-3H हेलिकॉप्टर आता संग्रहालयाच्या रूपाने पर्यटकांना भेटणार आहे. 2024 मध्ये भारतीय नौदलाच्या एअर स्क्वॉड्रन 350 मधून हे विमान सेवामुक्त करण्यात आलं होतं. आता शहराच्या बीच रोडवर खास पायथ्यावर ठेवून त्याचं संग्रहालय सर्वांसाठी खुले करण्यात आलं आहे.

विशेष क्रेन आणि अभियंते तसेच नौदल अधिकाऱ्यांच्या देखरेखीखाली हे हेलिकॉप्टर समुद्रकिनारी उभारण्यात आलं. संग्रहालयाच्या आत छायाचित्रं, माहितीफलक आणि ऑडिओ-व्हिज्युअल सामग्रीद्वारे नौदल वैमानिकांच्या जबाबदाऱ्या आणि कार्यपद्धती पर्यटकांना समजावल्या जातात. शेवटी हेलिकॉप्टरचं आतील स्वरूप पाहण्यासाठी पर्यटकांना प्रवेश दिला जातो. येथे कॉकपिट व क्रू-कंपार्टमेंट प्रत्यक्ष अनुभवता येतात.

हेही वाचा: KP Sharma Oli On Nepal Violence: जनरेशन झेडमुळे नव्हे तर 'या' कारणांमुळे झाला नेपाळमध्ये हिंसाचार; केपी ओलींनी सांगितलं खरं कारण

UH-3H ची निर्मिती मूळतः अमेरिकन कंपनी सिकॉर्स्कीने यूएस नेव्हीसाठी केली होती. भारतीय नौदलाने INS जलाश्वासोबत 2009 मध्ये सहा सुधारित UH-3H हेलिकॉप्टर खरेदी करून INS डेगा येथे तैनात केली होती. त्यांना ‘सारस’ या नावाने ओळखलं जायचं. आंध्र प्रदेश आणि ओडिशातील चक्रीवादळ व पुरपरिस्थितीत शोध व बचाव कार्य, तसेच मानवी मदतीच्या मोहिमांमध्ये या विमानांनी महत्त्वाची भूमिका बजावली.

विशाखापट्टणममध्ये आधीच INS कुरसुरा पाणबुडी संग्रहालय, TU-142 विमान संग्रहालय, सी-हॅरिअर संग्रहालय आणि विशाखा मेरीटाइम संग्रहालय अशी अनेक ठिकाणं आहेत. UH-3H हेलिकॉप्टर संग्रहालयामुळे या शहराचा ‘सागरी संग्रहालय सर्किट’ अधिक समृद्ध झाला आहे. आता एकाच किनाऱ्यावर जमिनीपासून आकाशापर्यंतच्या नौदल वारशाचा संपूर्ण मागोवा घेण्याची संधी पर्यटकांना उपलब्ध झाली आहे.