BCCI on Rohit Sharma Retirement: 2027 विश्वचषकापूर्वी रोहित शर्माला संघातून वगळणार? BCCI ने दिलं स्पष्टीकरण

२०२७ च्या विश्वचषकापूर्वी रोहित शर्माला भारतीय एकदिवसीय संघातून वगळले जाऊ शकते, अशा चर्चांना भारतीय क्रिकेट नियामक मंडळाच्या (BCCI) वरिष्ठ अधिकाऱ्यांनी फेटाळून लावले आहे. या अनुभवी सलामीवीराच्या भवितव्याबाबत वाढत्या तर्कवितर्कांच्या पार्श्वभूमीवर, वरिष्ठ क्रिकेट पत्रकार विमल कुमार यांनी मंडळाच्या अनेक अधिकाऱ्यांशी केलेल्या चर्चेनंतर हा खुलासा करण्यात आला आहे.

असे वृत्त होते की, आगामी एकदिवसीय विश्वचषकापूर्वी भारतीय निवडकर्ते रोहित शर्माला संघातून वगळून वरच्या फळीत युवा फलंदाजांचा समावेश करण्याचा विचार करत होते. मात्र, कुमार यांच्या मते, बीसीसीआयच्या अधिकाऱ्यांनी असा कोणताही निर्णय घेतल्याचे वृत्त फेटाळून लावले आहे.

अनेक वरिष्ठ अधिकाऱ्यांशी चर्चा केल्यानंतर कुमार यांनी सांगितले की, रोहितला भारताच्या एकदिवसीय संघातून लवकरच वगळले जाणार असल्याच्या वृत्तात कोणतेही तथ्य नाही.

  ते म्हणाले, की, "रोहित शर्माच्या निवृत्तीबाबत मी बीसीसीआयच्या अनेक अधिकाऱ्यांशी चर्चा केली. त्यांनी मला सांगितले की, या केवळ प्रसारमाध्यमांनी पसरवलेल्या अफवा आहेत. रोहित शर्मा २०२७ चा विश्वचषक खेळणार आहे." रोहितचे एकदिवसीय संघातील स्थान धोक्यात असल्याबाबत सोशल मीडिया आणि प्रसारमाध्यमांच्या काही वर्गांमध्ये मोठ्या प्रमाणावर चर्चा सुरू असतानाच त्यांची ही प्रतिक्रिया आली आहे.