Auto Sales December : ऑटो क्षेत्रात विक्रीचा नवा उच्चांक! डिसेंबर 2025 मध्ये मारुती, टाटा आणि महिंद्राचा धमाका सेल

Auto Sales Increased in December : जीएसटी दरातील कपातीचा सकारात्मक परिणाम ऑटोमोबाईल क्षेत्रावर दिसून आला असून, 2025 या वर्षाच्या शेवटच्या महिन्यात गाड्यांच्या विक्रीत मोठी वाढ झाली आहे. देशातील आघाडीच्या कंपन्यांनी आपली विक्रीची आकडेवारी जाहीर केली असून, त्यात मारुति सुझुकी, टाटा मोटर्स आणि महिंद्रा यांसारख्या दिग्गज कंपन्यांनी वार्षिक स्तरावर चांगली प्रगती साधली आहे. ग्राहकांचा वाढता कल आणि सवलतींमुळे शोरूम्समध्ये ग्राहकांची मोठी गर्दी पाहायला मिळाली.

भारतातील सर्वात मोठी कार उत्पादक कंपनी मारुति सुझुकी इंडियाने डिसेंबर 2025 मध्ये 2,17,854 युनिट्सची एकूण विक्री केली आहे. गेल्या वर्षी याच महिन्यात हा आकडा 1,78,248 इतका होता, म्हणजेच कंपनीने 22.21% ची वाढ नोंदवली आहे. मारुतिच्या 'ऑल्टो' आणि 'एस-प्रेसो' सारख्या छोट्या कारची विक्री 14,225 युनिट्सवर पोहोचली आहे, जी डिसेंबर 2024 मध्ये केवळ 7,418 होती. तसेच स्विफ्ट, बलेनो आणि डिझायर यांसारख्या कॉम्पॅक्ट कार्सनी 78,704 युनिट्सचा टप्पा गाठला आहे.

महिंद्रा अँड महिंद्राचा विक्रमी खप
महिंद्रा अँड महिंद्राने देखील आपली घोडदौड कायम ठेवत एकूण 86,090 वाहनांची विक्री केली आहे, ज्यात 25% वाढ झाली आहे. विशेषतः एसयूव्ही (SUV) श्रेणीमध्ये कंपनीने 50,946 युनिट्स विकले असून वार्षिक स्तरावर यात 23% वाढ झाली आहे. कमर्शियल वाहनांच्या विक्रीतही 34% वाढ होऊन ती 24,786 युनिट्सवर पोहोचली असली, तरी कंपनीच्या निर्यातीत मात्र 9% घट होऊन ती 2,820 युनिट्सवर स्थिरावली आहे.

हेही वाचा – UIDAI Hackathon 2026: UIDAI कडून दोन लाख रुपये जिंकण्याची संधी, काय आहे नविन उपक्रम?

टाटा मोटर्सची घोडदौड
टाटा मोटर्सने प्रवासी आणि व्यावसायिक अशा दोन्ही विभागांत आपले वर्चस्व सिद्ध केले आहे. टाटाच्या प्रवासी वाहनांची विक्री 14.1% ने वाढून 50,519 युनिट्स झाली आहे. तसेच, इलेक्ट्रिक वाहनांच्या (EV) क्षेत्रात कंपनीने 24.2% ची वाढ मिळवत 6,906 युनिट्सची विक्री केली आहे. टाटा मोटर्सच्या कमर्शियल वाहनांच्या विक्रीत 25% वाढ झाली असून हा आकडा 42,508 वर पोहोचला आहे, ज्यात जड ट्रक्सच्या विक्रीत सर्वाधिक 31% वाढ दिसून आली आहे.

ह्युंदाई आणि किआ इंडियानेही दाखवली चुणूक
ह्युंदाई आणि किआ इंडिया या कंपन्यांनीही आपली चमक दाखवली आहे. ह्युंदाईने एकूण 58,702 गाड्यांची विक्री केली, जी गेल्या वर्षीच्या तुलनेत 6.6% जास्त आहे. दुसरीकडे, किआ इंडियासाठी डिसेंबर महिना ऐतिहासिक ठरला असून त्यांनी 18,659 युनिट्सची विक्री केली, जी डिसेंबर 2024 मधील 8,957 युनिट्सच्या तुलनेत दुपटीहून अधिक आहे. संपूर्ण 2025 वर्षात किआने एकूण 2,80,286 वाहने विकण्याचा विक्रम प्रस्थापित केला आहे.

हेही वाचा – Ayushman Bharat Scheme: आयुष्मान कार्डधारकांसाठी महत्त्वाची बातमी; आता 'या' लोकांना मिळणार नाही मोफत उपचार