पुणे स्लॅब दुर्घटनेप्रकरणी चौघांना अटक

पुण्यात येरवड्यातील बांधकाम सुरू असलेल्या इमारतीचा स्लॅब कोसळून पाच कामगारांचा मृत्यू झाल्याची दुर्दैवी घटना घडली आहे. येरवडायेथील शास्त्रीनगरमध्ये असलेल्या गल्ली क्रमांक आठमध्ये गुरुवारी रात्री अकरा वाजताच्या सुमारास ही घटना घडली. या दुर्घटनेमध्ये ५ कामगारांचा मृत्यू झाला आहेत तर पाच कामागर गंभीर जखमी झाले आहेत. याप्रकरणी पुणे पोलिसांनी तत्काळ कारवाई केली असून चौघांना अटक केली आहे.

काय आहे घटना?

पुण्यातील येरवडायेथील शास्त्रीनगरमध्ये एका मॉलचे बांधकाम सुरू होते. गुरुवारी रात्री बांधकाम सुरू असताना अचानक स्लॅब कोसळला. या दुर्घटनेमध्ये पाच कामगारांचा मृत्यू झाला तर पाच कामगार गंभीर जखमी झाले आहेत. या घटनेची माहिती मिळताच पोलिस आणि अग्निशमन दलाचे अधिकाऱ्यांनी घटनास्थळी धाव घेतली. स्लॅबचा ढिगाऱ्यात अडकलेल्या कामगारांना पोलिस प्रशासन आणि अग्निशमन दलाकडून बाहेर काढण्यात आले. यावेळी दहा कामगारांना सुरक्षित बाहेर काढण्यात आले. अग्निशामक दलाच्या चार ते सहा गाड्यांच्या मदतीने हे बचाव कार्य करण्यात आले. तर दुर्घटनेमध्ये मृत्यू झालेल्यांची ओळख पटवण्याचे काम पोलिस प्रशासनाकडून सुरू आहे. मृत्यू झालेल्यांचे मृतदेह ससून रुग्णालयात नेण्यात आले असून पाच गंभीर जखमींवर रुग्णालयात उपचार सुरू असल्याची माहिती पोलिसांनी दिली आहे.