West Bengal Election 2026: ‘बॅटल फॉर बंगाल’चा ‘सिक्रेट’ रिपोर्ट लीक! निकालात मोठा ट्विस्ट; एक्झिट पोलचे आकडे पाहून बड्या नेत्यांनाही टेंशन
पश्चिम बंगालच्या राजकीय आखाड्यात सध्या मे महिन्याच्या तापमानापेक्षाही राजकीय 'तापमान' अधिक वाढल्याचे पाहायला मिळत आहे. 4 मे च्या आसपास जसजशी निकालाची धाकधूक वाढत आहे, तसतसे राजकीय दावे-प्रतिदावे अधिक तीव्र होत आहेत. एकीकडे 'टुडेज चाणक्य'सारख्या संस्थांनी राज्यात 192 जागांचा मोठा आकडा देत 'भगवे वादळ' येणार असल्याची भविष्यवाणी केली आहे, तर दुसरीकडे, 'बंगालची वाघीण' म्हणून ओळखल्या जाणाऱ्या मुख्यमंत्री ममता बॅनर्जी यांनी हे सर्व आकडे हवेत भिरकावून देत त्यांच्या विजयाचा नगारा आत्मविश्वासाने वाजवला आहे. या सर्व राजकीय कोलाहलात एक्झिट पोलचे आकडे आणि वास्तव्य यात 'जमीन-अस्मानाचा' फरक असल्याचे एका अत्यंत खळबळजनक अंतर्गत अहवालातून समोर आले आहे.
'द वॉल' (thewall.in) या पोर्टलने तृणमूल काँग्रेसच्या 'कालीघाट' आणि 'कॅमक स्ट्रीट' या दोन प्रमुख सत्ताकेंद्रांमधील गोपनीय अहवालांचा संदर्भ देत एक नवा राजकीय बॉम्बगोळा टाकला आहे. या अहवालानुसार, टीएमसीने राज्यातील सर्व 294 जागांचे अत्यंत 'मायक्रो-लेव्हल' विश्लेषण केले आहे. खुद्द ममता दीदींचे निवासस्थान असलेल्या कालीघाटच्या 'सेफ' गणितानुसार, अत्यंत वाईट परिस्थितीतही पक्ष 174 जागांचा जादुई आकडा सहज पार करेल. त्यांच्या सर्वेक्षणानुसार, 43 जागांवर 'काँटे की टक्कर' (ग्रे झोन) असली तरी, थोडेसे पारडे फिरल्यास यातील निम्म्या जागा टीएमसीच्या खात्यात जमा होतील. तर दुसरीकडे, भाजपला 71 जागांच्या पुढे मजल मारता येणार नाही, असा ठाम विश्वास या अहवालात व्यक्त करण्यात आला आहे. कालीघाटमध्ये सध्या चिंता 'पराभवाची' नसून, विजयाचे 'मार्जिन' किती असेल, याचीच चर्चा रंगली आहे.
पक्षाचे 'ट्रबलशूटर' आणि सरचिटणीस अभिषेक बॅनर्जी यांच्या नेतृत्वाखालील 'कॅमक स्ट्रीट' गटाचा अहवाल तर याहूनही अधिक धक्कादायक आणि आक्रमक आहे. या गोटाच्या अंदाजानुसार, तृणमूल काँग्रेस चक्क 209 ते 229 जागांचा डोंगर सर करून एक 'ऐतिहासिक' विजय मिळवणार आहे. या विजयामागे तीन प्रमुख 'ब्रह्मास्त्रे' काम करत असल्याचे सांगण्यात आले आहे. पहिले म्हणजे, मुस्लिम मतदारांचे झालेले अभूतपूर्व एकत्रीकरण; ज्याच्या जोरावर मुर्शिदाबादमधील सर्वच्या सर्व 17 जागा जिंकण्याचा पक्षाचा दावा आहे. दुसरे म्हणजे 'सायलेंट व्होटर'. 'लक्ष्मी भंडार' सारख्या थेट आर्थिक लाभ देणाऱ्या योजनांमुळे राज्यातील महिला मतदारांनी उघडपणे दीदींनाच कौल दिल्याचे मानले जात आहे. आणि तिसरे म्हणजे, सीमावर्ती भागात भाजपने आणलेला 'नागरिकत्वाचा' मुद्दा आणि ध्रुवीकरणाचे राजकारण पूर्णपणे फोल ठरल्याचे हा अहवाल अधोरेखित करतो.
विजयाच्या या दाव्यांना बळकटी देण्यासाठी जिल्ह्यानिहाय मांडलेली समीकरणे राजकीय तज्ज्ञांनाही थक्क करणारी आहेत. प्रस्थापितविरोधी लाट (अँटी-इन्कंबन्सी) थोपवण्यासाठी टीएमसीने हुगळी जिल्ह्यात 10 नव्या चेहऱ्यांना मैदानात उतरवण्याचा जो 'धाडसी' प्रयोग केला होता, तो यशस्वी ठरल्याचे दिसत आहे. हुगळीतील 18 पैकी तब्बल 15 जागांवर पक्ष विजयाची पताका फडकवण्याची शक्यता आहे. यासोबतच, कोलकात्यातील 11 पैकी 10, दक्षिण 24 परगण्यातील 31 पैकी 30 आणि हावड्यात 16 पैकी 16 अशा 'क्लीन स्वीप' विजयाचा दावा टीएमसीने केला आहे. एकेकाळी काँग्रेस आणि डाव्या पक्षांचे अभेद्य बालेकिल्ले मानल्या जाणाऱ्या मुर्शिदाबाद आणि मालदासारख्या जिल्ह्यांमध्ये आता पूर्णपणे 'तृणमूल'चा प्रभाव असून, तिथे भाजपचा अश्वमेध रोखण्यात यश आल्याचे हे सर्वेक्षण ठामपणे सांगते.
ग्राऊंड लेव्हलची परिस्थिती आणि बसून काढलेले 'एक्झिट पोल' यात मोठी तफावत असते, हाच इतिहास बंगालमध्ये पुन्हा एकदा दुमदुमणार असा तृणमूलला ठाम विश्वास आहे. म्हणूनच, शेवटचे मत मोजून होईपर्यंत मतमोजणी केंद्रांवर डोळ्यात तेल घालून पहारा देण्याचे 'कडक' आदेश ममता बॅनर्जी यांनी त्यांच्या कार्यकर्त्यांना दिले आहेत. बंगालच्या जनतेने दिल्लीच्या दबावाला न जुमानता पुन्हा एकदा 'त्यांची मुलगी'च (ममता बॅनर्जी) निवडली आहे, असा ठाम विश्वास टीएमसीच्या गोटातून व्यक्त होत असून, आता प्रतीक्षा आहे ती केवळ अधिकृत निकालांची!
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.