Manipur Violence: मणिपूर पुन्हा पेटले; हिंसाचारात महिला आणि मुलांची सुरक्षित स्थळी धाव, इंटरनेट सेवा बंद
उखरूल: ईशान्येकडील मणिपूर राज्यात शांततेची प्रतीक्षा असतानाच, आता उखरूल जिल्ह्याला हिंसाचाराच्या वणव्याने वेढले आहे. तांगखुल नागा समुदायातील एका व्यक्तीवर झालेल्या हल्ल्यानंतर सुरू झालेला हा वाद मंगळवारी दुसऱ्या दिवशीही निवळण्याचे नाव घेत नव्हता. उखरूलमधील लिटन सारेखोंग परिसरात मंगळवारी सकाळी सशस्त्र गटांकडून प्रचंड गोळीबार करण्यात आला आणि अनेक रिकाम्या घरांना आगीच्या हवाली करण्यात आले. आकाशात झेपावणारे धुराचे लोट आणि गोळ्यांच्या आवाजाने संपूर्ण परिसर हादरून गेला आहे.
या हिंसाचाराची पाळेमुळे मागील काही दिवसांतील घडामोडींत दडलेली आहेत. 'कथो लाँग' आणि 'कथो काटामनाव लाँग' या दोन तांगखुल नागा संघटनांनी उखरूल आणि शेजारील कामजोंग जिल्ह्यांमध्ये कुकी समुदायाच्या प्रवेशावर बंदी घातली होती. या निर्णयानंतर अवघ्या 24 तासांत लिटन सारेखोंगमध्ये जाळपोळीच्या घटना घडल्या. व्हायरल झालेल्या व्हिडिओंमध्ये घरांना लागलेली आग आणि विस्थापित नागरिकांची धावपळ स्पष्टपणे दिसत असून, यामुळे प्रशासनाच्या सुरक्षेच्या दाव्यांवर प्रश्नचिन्ह उभे राहिले आहे.
परिस्थिती हाताबाहेर जाऊ नये आणि अफवांना चाप बसावा, यासाठी राज्य सरकारने तातडीने पावले उचलली आहेत. उखरूल जिल्ह्याच्या महसूल क्षेत्रात पुढील पाच दिवसांसाठी सर्व प्रकारच्या इंटरनेट सेवांवर बंदी घालण्यात आली आहे. यामध्ये ब्रॉडबँड, व्हीपीएन (VPN) आणि व्हीएसएटी (VSAT) सेवांचा समावेश असून, हा 'डिजिटल ब्लॅकआउट' प्रतिबंधात्मक उपाय म्हणून लागू करण्यात आल्याचे पोलिसांनी स्पष्ट केले. "परिस्थिती कमालीची तणावपूर्ण असली तरी सुरक्षा दल ती नियंत्रणात आणण्यासाठी शर्थीचे प्रयत्न करत आहेत," असे एका वरिष्ठ पोलीस अधिकाऱ्याने सांगितले.
हिंसाचाराच्या या आगीत निष्पाप नागरिक भरडले जात असून, मागील दोन दिवसांत शेकडो कुटुंबांना घरे सोडून सुरक्षित स्थळी स्थलांतर करावे लागले आहे. लिटन सारेखोंग आणि लगतच्या कुकी गावांमधून प्रामुख्याने महिला, वृद्ध आणि बालकांनी कांगपोक्पी जिल्ह्यातील मोटबुंग आणि सैकुल परिसरात आश्रय घेतला आहे. उघड्या माळावर किंवा तात्पुरत्या छावण्यांमध्ये आश्रयाला आलेल्या या विस्थापितांच्या डोळ्यांत भविष्याबद्दलची मोठी भीती आणि प्रशासनाबद्दलचा संताप दिसून येत आहे.
सर्वात खेदजनक बाब म्हणजे, ज्या सुरक्षा दलांवर संरक्षणाची जबाबदारी आहे, त्यांच्या कामगिरीवरच आता प्रश्नचिन्ह उपस्थित केले जात आहे. "आमची घरे जळत असताना आणि गोळीबार होत असताना सुरक्षा यंत्रणांनी बघ्याची भूमिका घेतली," असा गंभीर आरोप आपले सर्वस्व गमावलेल्या ग्रामस्थांनी केला आहे. शांततेची आशा धुसर होत असताना, मणिपूरमधील हा वांशिक संघर्षाचा तिढा अधिकच गुंतागुंतीचा होताना दिसत आहे. आता सरकार यावर नियंत्रण मिळवण्यासाठी कोणते ठोस पाऊल उचलते, याकडे सर्वांचे लक्ष लागले आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.