ZP Election 2026 : जिल्हा परिषदेच्या निवडणुकीसाठी भाजपने कंबर कसली; मुख्यमंत्र्यांच्या 7 दिवसांत 22 जाहीर सभा

ZP Election 2026 : राज्यातील 29 महानगरपालिकांचा निकाल लागल्यानंतर आता सत्तेचा पेच ग्रामीण भागात सरकला आहे. जिल्हा परिषद आणि पंचायत समित्यांच्या निवडणुकीसाठी भारतीय जनता पक्षाने आपली कंबर कसली असून, खुद्द मुख्यमंत्री देवेंद्र फडणवीस प्रचाराच्या मैदानात उतरणार आहेत. अवघ्या 7 दिवसांच्या कालावधीत मुख्यमंत्री राज्याच्या विविध भागांत 22 सभांचा धडाका लावून भाजपचे पारडे जड करण्याचा प्रयत्न करणार आहेत.

मुख्यमंत्र्यांचा ‘सुपरफास्ट’ दौरा: 28 जानेवारीपासून प्रारंभ

जिल्हा परिषदेच्या निवडणुकांसाठी मुख्यमंत्र्यांचा झंझावाती दौरा 28 जानेवारीपासून सुरू होत असून 3 फेब्रुवारीपर्यंत चालणार आहे. 28 जानेवारीला रत्नागिरी, सिंधुदुर्ग आणि रायगड या कोकण पट्ट्यातून प्रचाराचा नारळ फुटणार आहे. एकूण 12 जिल्हा परिषदांच्या क्षेत्रात मुख्यमंत्री मतदारांशी संवाद साधतील. ग्रामीण भागातील भाजप कार्यकर्त्यांना बळ देण्यासाठी मुख्यमंत्री 7 दिवसांत एकूण 22 सभांना संबोधित करतील.

हेही वाचा – Ambadas Danve : उदय सामत यांच्या ऑफरवर अंबादास दानवेंची प्रामाणिक कबुली, म्हणाले…

केवळ 12 जिल्हा परिषदांमध्येच का होणार मतदान?

राज्यात 32 जिल्हा परिषदांच्या निवडणुका प्रलंबित असल्या तरी, सर्वत्र मतदान होणार नाही. सर्वोच्च न्यायालयाने 50 टक्के आरक्षणाची मर्यादा ओलांडलेल्या संस्थांच्या निवडणुकांना स्थगिती दिली आहे. त्यामुळे सध्या केवळ 12 जिल्हा परिषदा आणि 125 पंचायत समित्यांसाठी निवडणूक प्रक्रिया पार पडत आहे.

निवडणुकीचे वेळापत्रक आणि तयारी

मतदान: 5 फेब्रुवारी 2026 रोजी मतदान होईल.
निकाल: 7 फेब्रुवारी 2026 रोजी मतमोजणी होऊन चित्र स्पष्ट होईल.
मतदार यादी: या निवडणुकीसाठी 1 जुलै 2025 ची मतदार यादी ग्राह्य धरण्यात आली आहे.
आचारसंहिता: 13 जानेवारीपासूनच आचारसंहिता लागू झाली असून प्रशासकीय यंत्रणा सज्ज झाली आहे.

महापालिका निवडणुकांनंतर आता ग्रामीण महाराष्ट्रात आपले वर्चस्व सिद्ध करण्यासाठी भाजपने ‘मिशन जिल्हा परिषद’ हाती घेतले असून, मुख्यमंत्र्यांचा हा दौरा त्यासाठी निर्णायक ठरणार आहे.