Shivsena – MNS Alliance : मुंबईवर ठाकरेंची मोहोर! उद्धव-राज युतीची अधिकृत घोषणा होणार? महापालिका निवडणुकीसाठी रणनिती आखणार
मुंबई महानगरपालिकेच्या सत्तेची गणिते जुळवण्यासाठी राज्याच्या राजकारणात एक ऐतिहासिक वळण येण्याची शक्यता निर्माण झाली आहे. गेल्या अनेक दिवसांपासून चर्चेत असलेली उद्धव ठाकरे आणि राज ठाकरे यांची युती आता प्रत्यक्षात येण्याच्या मार्गावर आहे. खासदार संजय राऊत यांनी दिलेल्या संकेतांनुसार, मंगळवारी या 'महायुती'ची अधिकृत घोषणा होऊ शकते. 23 डिसेंबरपासून उमेदवारी अर्ज भरण्यास सुरुवात होत असल्याने, दोन्ही पक्षांकडे वेळ अत्यंत कमी आहे. याच पार्श्वभूमीवर सोमवारी दिवसभर 'मातोश्री' ते 'शिवतीर्थ' अशी राजकीय नेत्यांची धावपळ सुरू होती, ज्यामध्ये जागावाटपाच्या गुंतागुंतीच्या प्रश्नांवर निर्णायक चर्चा करण्यात आली.
या संभाव्य युतीमध्ये जागावाटपाचा तिढा प्रामुख्याने मुंबईतील मराठीबहुल पट्ट्यांमध्ये अडकला होता. शिवडी, दादर, माहीम, भांडुप आणि विक्रोळी या मतदारसंघांतील जागांवरून दोन्ही पक्षांमध्ये प्रतिष्ठेची लढाई सुरू होती. राज ठाकरे यांनी सामंजस्याची भूमिका घेत कार्यकर्त्यांना 'जास्त न ताणण्याच्या' सूचना दिल्या होत्या. परिणामी, सोमवार संध्याकाळपर्यंत शिवडीतील तीनपैकी दोन जागा ठाकरेंच्या शिवसेनेला आणि एक जागा मनसेला देण्यावर एकमत झाले. तसेच दादरमधील प्रभाग क्रमांक 192 आणि 194 चा पेचही चर्चेतून सोडवण्यात आला आहे. मात्र, भांडुप आणि विक्रोळीमधील काही जागांवर अद्यापही खलबतं सुरू आहेत.
केवळ मनसेला सोबत घेऊनच नव्हे, तर महाविकास आघाडीची वीण अधिक घट्ट करण्यासाठी संजय राऊत यांनी कंबर कसली आहे. मुंबई काँग्रेसने जरी स्वबळाचा नारा दिला असला, तरी संजय राऊत यांनी थेट राहुल गांधींशी संपर्क साधून त्यांना आघाडीत सामील होण्यासाठी गळ घातल्याचे खात्रीलायक वृत्त आहे. दुसरीकडे, शरद पवार यांच्या राष्ट्रवादी काँग्रेसने सन्मानजनक 50 जागांचा प्रस्ताव ठाकरे बंधूंना पाठवला आहे. यापैकी 30 जागांवर आगामी एक-दोन दिवसांत सविस्तर चर्चा होऊन अंतिम निर्णय घेतला जाईल, असे समजते.
विरोधकांकडून या संभाव्य युतीला 'राजकीय नाटक' किंवा 'नौटंकी' म्हणून हिणवण्यात येत असताना, संजय राऊत यांनी आपल्या खास शैलीत उत्तर दिले आहे. "हे नाटक नसून, मुंबईच्या हितासाठी झालेला प्रीतिसंगम आहे," असे विधान राऊतांनी केले आहे. या युतीमुळे मुंबईच्या राजकारणात 'मराठी मतांचे विभाजन' रोखणे आणि भाजपला रोखणे हे प्रमुख उद्दिष्ट असल्याचे राजकीय विश्लेषकांचे मत आहे.
ठाकरे बंधूंच्या या नव्या समीकरणाची घोषणा एका मोठ्या शक्तिप्रदर्शनाद्वारे होण्याची शक्यता आहे. दोन्ही पक्षांच्या कार्यकर्त्यांमध्ये सध्या प्रचंड उत्साह असून, संयुक्त मेळावा किंवा रॅलीच्या माध्यमातून हे शक्तिप्रदर्शन केले जाऊ शकते. मात्र, उमेदवारी अर्ज भरण्यासाठी हातात असलेला अत्यल्प वेळ पाहता, युतीची अधिकृत घोषणा आणि एबी फॉर्मचे वाटप या प्रक्रियेत दोन्ही नेत्यांची मोठी कसोटी लागणार आहे.
एकूणच, मंगळवारचा सूर्योदय मुंबईच्या राजकारणात कोणते नवे रंग घेऊन येतो, याकडे संपूर्ण राज्याचे लक्ष लागले आहे. राज आणि उद्धव ठाकरे यांच्यातील ही जवळीक केवळ निवडणुकीपुरती मर्यादित राहते की, महाराष्ट्राच्या राजकारणाला नवी दिशा देते, हे येणारा काळच ठरवेल.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.