Supriya Sule Demands Special Maharashtra Legislature Session: मराठा आरक्षणावर तोडगा काढण्यासाठी सुप्रिया सुळे यांची विशेष अधिवेशन बोलावण्याची मागणी

Supriya Sule Demands Special Maharashtra Legislature Session: मराठा आरक्षणाचा प्रश्न पुन्हा एकदा राज्याच्या राजकीय पटलावर गंभीर बनला असून आंदोलकांचा दबाव दिवसेंदिवस वाढत आहे. राष्ट्रवादी काँग्रेस (शरद पवार गट)च्या नेत्या आणि खासदार सुप्रिया सुळे यांनी रविवारी महाराष्ट्र सरकारला विधिमंडळाचे विशेष अधिवेशन बोलावण्याची मागणी केली. त्याचबरोबर या गुंतागुंतीच्या प्रश्नावर तोडगा काढण्यासाठी सर्वपक्षीय बैठक घेण्याचे आवाहनही सुप्रिया सुळे यांनी केलं आहे. 

सुळे यांनी आज मुंबईतील आझाद मैदानाला भेट दिली, जिथे मराठा आरक्षणासाठी लढा देणारे नेते मनोज जरांगे मागील काही दिवसांपासून उपोषण करत आहेत. भेटीनंतर माध्यमांशी बोलताना सुळे म्हणाल्या, ‘मराठा समाजाच्या आरक्षणाला कोणीही विरोध करत नाही. हा निर्णय मंत्रिमंडळाने घ्यायचा आहे आणि त्यासाठी सरकारने पुढाकार घ्यायला हवा.’ 

हेही वाचा – Manoj Jarange Patil On Raj Thackeray: मराठा आरक्षणाच्या मुद्द्यावरुन मनोज जरांगेंनी राज ठाकरेंना सुनावले

यावेळी आंदोलकांनी सुप्रिया सुळे यांच्या गाडीला अडवून घोषणाबाजी केली. शरद पवार यांच्याविरोधात घोषणाबाजी करत असताना, सुळे यांनी आंदोलकांना शांत करण्याचा प्रयत्न केला. बारामतीच्या खासदार सुप्रिया सुळे यांनी आझाद मैदानातील आंदोलन स्थळी सुधारित प्रकाशयोजना व स्वच्छता व्यवस्थांची मागणीही केली. आंदोलकांना योग्य सुविधा मिळणे हे सरकारचे कर्तव्य असल्याचा उल्लेखही यावेळी सुप्रिया सुळेंनी केला. 

हेही वाचा – Manoj Jarange Patil Health Update : मनोज जरांगेंची प्रकृती खालावली, अनेक आंदोलकही आजारी, जाणून घ्या कशी आहे परिस्थिती

दरम्यान, यावेळी त्यांनी उपमुख्यमंत्री अजित पवार यांच्यावर अप्रत्यक्षपणे टीका केली. सुप्रिया सुळे म्हणाल्या की, ‘शरद पवारांवर निर्णय न घेतल्याचा आरोप करणारे नेतेच काँग्रेस-राष्ट्रवादी काँग्रेसच्या सरकारमध्ये अनेक वर्षे सत्तेत होते. त्यांनी तेव्हा हा प्रश्न का सोडवला नाही?’ मराठा आरक्षणावरुन राज्यात पुन्हा एकदा राजकीय चढाओढ सुरू झाली आहे. सुप्रिया सुळे यांच्या मागणीमुळे आता सरकारवर दबाव वाढला आहे. आंदोलनकर्त्यांचा संताप आणि विरोधकांचा राजकीय आक्रमकपणा पाहता, पुढील काही दिवसांत हा मुद्दा अधिक तीव्र होण्याची शक्यता आहे.