Zilla Parishad Election 2026: सिंधुदुर्गात सजले ‘सखी मतदान केंद्र’; मतदानासाठी महिलांचा उदंड प्रतिसाद
सिंधुदुर्ग: राज्यातील 12 जिल्ह्यांमध्ये जिल्हा परिषद आणि पंचायत समित्यांसाठी आज सकाळी अंडे सात वाजल्यापासून मतदान प्रक्रियेला सुरुवात झाली आहे. ग्रामीण भागात मतदारांचा उत्साह ओसंडून वाहताना दिसत असून, नागरिक मोठ्या संख्येने घराबाहेर पडत मतदानाचा हक्क बजावत आहेत. या निवडणुकीचा निकाल 9 फेब्रुवारीला होणाऱ्या मतमोजणीत स्पष्ट होणार आहे.
सिंधुदुर्गमध्ये ‘महिला सखी केंद्र’ आकर्षणाचा केंद्रबिंदू
महिलांनी अधिकाधिक मतदान करावे, यासाठी सिंधुदुर्ग जिल्ह्यात विशेष ‘महिला सखी केंद्र’ मतदान केंद्र उभारण्यात आले आहे. या केंद्रांवर गुलाबी रंगाची थीम वापरण्यात आली असून, महिला सक्षमीकरणाच्या घोषवाक्यांनी सजलेले आकर्षक पोस्टर्स लावण्यात आले आहेत. फुगे, सजावट आणि प्रेरणादायी संदेशांमुळे वातावरण उत्साही आणि आनंदी दिसत आहे. महिलांसाठी स्वतंत्र आणि सुसज्ज मतदान केंद्राची सुविधा उपलब्ध करून देण्यात आली आहे.
810 मतदान केंद्रांवर प्रक्रिया सुरू
सिंधुदुर्ग जिल्ह्यात एकूण 810 मतदान केंद्रांवर सध्या मतदान सुरू आहे. त्यापैकी सुमारे आठ ते दहा मतदान केंद्रे महिलांसाठी विशेष राखीव ठेवण्यात आली आहेत. महिला मतदार लहान बाळांना सोबत घेऊन मतदानासाठी येताना दिसत असून, त्यांच्यातील उत्साह जाणवत आहे.
ग्रामीण राजकारणाचा कौल 9 फेब्रुवारीला
ग्रामीण भागातील राजकारणाची दिशा ठरवणाऱ्या या निवडणुकीकडे सर्वांचे लक्ष लागले आहे. मतदारांचा वाढता सहभाग लोकशाही प्रक्रियेवरील विश्वास अधोरेखित करत आहे. कणकवली येथून जय महाराष्ट्र न्यूजचे प्रतिनिधी सुरेश कौलगेकर यांनी दिलेल्या माहितीनुसार, मतदान प्रक्रिया शांततेत आणि सुरळीत पार पडत आहे.
लोकशाहीच्या या उत्सवात महिलांचा वाढता सहभाग हे सकारात्मक चित्र असून, राज्यातील राजकीय समीकरणे 9 फेब्रुवारीला स्पष्ट होणार आहेत.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.