Sanjay Shirsat: ‘सरकारचा पैसा आहे, आपल्या बापाचं काय जातं?’ संजय शिरसाट यांच्या वादग्रस्त वक्तव्याने नवा वाद
Sanjay Shirsat: राज्यातील महायुती सरकारमधील मंत्र्यांची वादग्रस्त विधाने सातत्याने चर्चेचा विषय ठरत आहेत. मुख्यमंत्री एकनाथ शिंदे यांनी मंत्र्यांना वक्तव्य करताना संयम बाळगण्याचे स्पष्ट आदेश दिले असतानाही, हे आदेश कितपत पाळले जातात यावर मोठा प्रश्न निर्माण झाला आहे. याचाच ताजा नमुना म्हणजे राज्याचे सामाजिक न्याय मंत्री संजय शिरसाट यांचे अकोल्यातील एका कार्यक्रमात केलेले वक्तव्य.अकोल्यात सामाजिक न्याय भवनाच्या उद्घाटन कार्यक्रमात बोलताना संजय शिरसाट यांनी म्हटले की, ‘वसतिगृहासाठी तुम्ही 5, 10 किंवा 15 कोटी रुपये मागा, आपण लगेच मंजूर करू. सरकारचा पैसा आहे… आपल्या बापाचं काय जातं?’ हे वक्तव्य करताना त्यांच्या चेहऱ्यावर हलकासा हसू आणि आत्मविश्वास होता. मात्र, हीच ओळ राजकीय आणि सामाजिक वर्तुळात वादाला कारणीभूत ठरत आहे.
सरकारी निधी म्हणजे जनतेच्या कराच्या पैशातून उभा राहणारा स्रोत. अशावेळी मंत्रीपदावर असलेल्या व्यक्तीने ‘आपल्या बापाचं काय जातं’ अशा प्रकारची भाषा वापरणं अत्यंत गैरजबाबदार आणि असंवेदनशील असल्याचे अनेकांचे मत आहे. विरोधी पक्षांनी या विधानावर जोरदार प्रतिक्रिया दिल्या असून, सरकारकडे अशा मंत्र्यांवर कारवाई करण्याची मागणी केली आहे.विशेष म्हणजे, या कार्यक्रमात उपस्थित राष्ट्रवादी काँग्रेसचे आमदार अमोल मिटकरी यांना मंचावरच शिरसाट यांनी सल्ला देताना म्हटले, ‘तुमच्यामुळे माध्यमांना चांगला टीआरपी मिळतो. पण तुम्ही जास्त बोलू नका, नाहीतर आमच्यासारखेच हाल होतील.’ एका मंत्र्याकडून अशा स्वरूपाचा सल्ला देणे म्हणजे बोलण्याच्या स्वातंत्र्यावर अप्रत्यक्ष दबाव असल्याचेही मत नोंदवले जात आहे.
यापूर्वीही संजय शिरसाट यांनी विविध कार्यक्रमांतून वादग्रस्त विधानं केली आहेत. त्यामुळे त्यांच्या अशा वक्तव्यांमुळे महायुती सरकारची प्रतिमा डागाळत असल्याचा आरोप विरोधक करत आहेत. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी अशा वक्तव्यांकडे गांभीर्याने पाहून तातडीने हस्तक्षेप करण्याची गरज आहे, अशी मागणी राजकीय विश्लेषकांकडून केली जात आहे.
मुख्यमंत्र्यांनी कडक तंबी दिल्यानंतरही राज्यातल्या महायुती सरकारमधल्या मंत्र्यांच्या वादग्रस्त विधानं काही केल्या थांबता थांबत नाहीत आता परत नव्याने राज्याचे सामाजिक न्याय मंत्री संजय शिरसाट यांच्या एका वादग्रस्त वक्तव्याचा शुक्लकाष्ठ सरकारच्या मागं लागण्याची चिन्ह आहेत.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.