Sanjay Raut: "हिंदू मंदिरांवर हल्ले करण्यासाठी दान…?", मुंबई महापौर निवडीनंतर राऊतांचे मुख्यमंत्र्यांना खडे सवाल

मुंबईच्या राजकारणात नवा अध्याय सुरू होत असताना भारतीय जनता पार्टी ने बृहन्मुंबई महानगरपालिका साठी महापौरपदाच्या उमेदवार म्हणून रितु तावडे यांच्या नावाची अधिकृत घोषणा केली आहे. दीर्घकाळ नगरसेविका म्हणून कार्यरत असलेल्या तावडे या नगरपालिका राजकारणातील अनुभवी चेहरा मानल्या जातात. त्यांच्या नावाची चर्चा यापूर्वीपासूनच महापौरपदासाठी आघाडीवर होती आणि अखेर पक्षाने त्यावर शिक्कामोर्तब केले.

रितु तावडे यांनी अलीकडे झालेल्या बीएमसी निवडणुकीत वार्ड क्रमांक 132, घाटकोपर परिसरातून विजय मिळवला. हा त्यांचा सलग तिसरा विजय ठरला आहे. स्थानिक पातळीवरील कामकाज, संघटनशक्ती आणि सातत्यपूर्ण संपर्क यामुळे त्यांना मतदारांनी पुन्हा एकदा पसंती दिली. पक्षांतर्गत समन्वय आणि नेतृत्वगुण लक्षात घेता त्यांची निवड महत्त्वाची मानली जात आहे.

महापौरपदासाठी नाव जाहीर झाल्यानंतर त्यांनी मुंबईतून बांगलादेशी नागरिकांना बाहेर काढण्याबाबत भूमिका मांडल्याची चर्चा रंगली. यानंतर राजकीय वर्तुळात प्रतिक्रिया उमटू लागल्या. संजय राऊत यांनी सोशल मीडियावरून भाष्य करत राज्याचे मुख्यमंत्री देवेंद्र फडणवीस यांना उद्देशून पुढील विधान केले आहे. 

हेही वाचा: Akshata Tendulkar Ambulance Controversy : भाजपच्या पदाधिकाऱ्याकडून रुग्णवाहिकेचा बेकायदेशीर वापर?, सायरन सुरू ठेवून…

“मुंबईच्या होणाऱ्या महापौर ऋतू तावडे यांनी मुंबईतून बांगलादेशींना घालण्याची घोषणा केली!
छान,
फक्त त्यांनी एक करावे पंतप्रधान मोदी याना दिल्लीत जाऊन विचारावे की कालच्या अर्थ संकल्पात बांगलादेशला कोट्यावधी रुपयांचे दान का दिले?
बंगला देशातील हिदू मंदिरांवर हल्ले करण्यासाठी आणि हिंदूंच्या कत्तली करण्यासाठी हे दान दिले काय?”

राऊत यांच्या या वक्तव्यामुळे राजकीय वातावरण आणखी तापले आहे. स्थानिक स्वराज्य संस्थेच्या नेतृत्वाबाबत सुरू असलेली चर्चा आता राज्य आणि केंद्राच्या धोरणांपर्यंत पोहोचल्याचे चित्र दिसत आहे. विशेषतः बांगलादेशाशी संबंधित विषयावरून सत्ताधारी आणि विरोधक आमनेसामने येण्याची शक्यता व्यक्त होत आहे.

दरम्यान, महापौरपदाच्या निमित्ताने मुंबईतील राजकारणात नव्या समीकरणांची चाचपणी सुरू झाली आहे. विकास, कायदा-सुव्यवस्था आणि स्थानिक प्रश्न यांसह राष्ट्रीय मुद्द्यांची छाया या निवडीवर पडताना दिसत आहे. पुढील काही दिवसांत या प्रकरणावर आणखी प्रतिक्रिया उमटण्याची शक्यता असून, मुंबईच्या राजकीय पटावर घडामोडी वेगाने बदलताना दिसत आहेत.

हेही वाचा: PM Modi On Pakistan: ‘नो डबल स्टँडर्ड, नो कॉम्प्रोमाइज’; पाकिस्तानवर निशाणा साधत मोदींचे खडेबोल