Virat Kohli: आयपीएल सुरू असतानाच संघाला ठोकला रामराम, विराट कोहलीच्या डोळ्यांत तरळले अश्रू, ड्रेसिंग रूममध्ये नेमकं काय घडलं?

बंगळूर: गेल्या हंगामात तब्बल 18 वर्षांचा वनवास संपवून पहिल्यांदाच आयपीएलच्या (IPL) ट्रॉफीवर नाव कोरणारा रॉयल चॅलेंजर्स बंगळूर (RCB) संघ यंदाही जबरदस्त फॉर्ममध्ये आहे. आयपीएल 2026 मध्ये आतापर्यंत खेळलेल्या 9 पैकी 6 सामन्यांत विजय मिळवून आरसीबीने प्लेऑफच्या दिशेने भक्कम पावले टाकली आहेत. सलग दुसऱ्यांदा विजेतेपद मिळवण्याच्या निर्धाराने मैदानात उतरलेल्या या संघाला आता प्लेऑफमध्ये पोहोचण्यासाठी केवळ दोन विजयांची गरज आहे. मात्र, अशा निर्णायक वळणावर आरसीबीच्या गोटातून एक मोठी आणि भावूक करणारी बातमी समोर आली आहे. तब्बल 18 वर्षे संघाच्या पाठीशी खंबीरपणे उभ्या असलेल्या एका दिग्गजाने फ्रँचायझीची साथ सोडली आहे.

18 वर्षांची अतूट साथ सुटली

आरसीबीने अधिकृत सोशल मीडिया खात्यावर एक भावूक व्हिडिओ शेअर करत ही माहिती चाहत्यांना दिली आहे. संघाचे मुख्य फिजिओथेरपिस्ट (Head Physio) इवान स्पीचली (Evan Speechly) यांनी आरसीबीचा निरोप घेतला आहे. इवान हे आयपीएलच्या पहिल्या हंगामापासून म्हणजेच 2008 पासून ते 2025 पर्यंत आरसीबीच्या सपोर्ट स्टाफचा अविभाज्य भाग होते. त्यांच्या या एक्झिटमुळे आरसीबीच्या एका सुवर्णयुगाचा अंत झाल्याची भावना व्यक्त केली जात असून, सोशल मीडियावर चाहतेही हळहळ व्यक्त करत आहेत. फ्रँचायझीने इवान यांचा ‘ओरिजिनल गँगस्टर’ (OG) असा गौरवपूर्ण उल्लेख करत त्यांच्या कार्याला सलाम केला आहे.

‘कंठ दाटून आला…’; विराट कोहली भावूक

गेली अनेक वर्षे संघातील खेळाडूंच्या दुखापती आणि फिटनेसची काळजी घेणाऱ्या इवान यांना निरोप देताना आरसीबीचा माजी कर्णधार आणि दिग्गज फलंदाज विराट कोहली अत्यंत भावूक झाला होता. नेहमी मैदानात आक्रमक दिसणाऱ्या विराटचा कंठ यावेळी दाटून आला होता आणि त्याचे डोळे पाणावले होते. एका विशेष निरोप समारंभासाठी इवान स्पीचली मुद्दाम बंगळुरूला आले होते, जिथे संपूर्ण संघाने त्यांना मोठी मानवंदना दिली. या समारंभात विराटने इवान यांच्या सन्मानार्थ एक खास आणि हृदयस्पर्शी भाषण करत जुन्या आठवणींना उजाळा दिला.

हेही वाचा: Tamil Nadu Election 2026: फक्त एका मताने बदलला निवडणुकीचा निकाल, तामिळनाडूत दिग्गज मंत्र्याचा धक्कादायक पराभव, कोणी कोणाला हरवलं?

“तुमची उणीव कायम भासेल…”

त्याच्या भावनांना वाट मोकळी करून देताना विराट म्हणाला, “तुम्ही आम्हाला इथपर्यंत पोहोचण्यासाठी भरपूर साथ दिली आहे. या प्रदीर्घ प्रवासात तुम्ही नेहमी आमच्यासोबत होता. तब्बल 18 वर्षे तुम्ही आमच्या कुटुंबाचा एक भाग म्हणून खेळीमेळीने राहिलात आणि आमची खूप काळजी घेतली.” पुढे बोलताना विराट म्हणाला की, “तुमचा मनमिळाऊ स्वभाव आम्हाला कायम भावला. कठीण काळात तुम्ही ज्या प्रकारे आम्हाला आधार दिला, तसे दुसरे कोणी करू शकेल असे मला वाटत नाही. आम्ही तुम्हाला खूप लांब काळापर्यंत लक्षात ठेवू.” विराटच्या या शब्दांनी उपस्थित सर्वच खेळाडूंचे डोळे पाणावले.

कोण आहेत इवान स्पीचली?

इवान स्पीचली हे मूळचे दक्षिण आफ्रिकेचे रहिवासी असून, ते क्रीडा क्षेत्रातील एक अत्यंत नावाजलेले आणि अनुभवी फिजिओथेरपिस्ट आहेत. 2008 मध्ये जेव्हा जगभरात आयपीएल या नव्या टी-20 लीगची सुरुवात झाली, तेव्हा खेळाडूंच्या फिटनेसला सर्वोच्च प्राधान्य देत प्रत्येक फ्रँचायझीने जागतिक दर्जाच्या सपोर्ट स्टाफची नियुक्ती केली होती. त्याच काळात अनेक परदेशी तज्ज्ञ आयपीएलशी जोडले गेले. आरसीबीनेही पहिल्याच हंगामात स्पीचली यांच्यावर मुख्य फिजिओथेरपिस्ट म्हणून विश्वास टाकला होता. तो विश्वास त्यांनी 18 वर्षे सार्थ ठरवला आणि खेळाडूंना कायम तंदुरुस्त ठेवण्यात मोलाची भूमिका बजावली.

पुढचा प्रवास आव्हानात्मक

खेळाडूंच्या प्रत्येक लहान-मोठ्या दुखापतीवर रामबाण उपाय शोधणारे आणि ड्रेसिंग रूममध्ये नेहमी सकारात्मक ऊर्जा निर्माण करणारे इवान स्पीचली आता आरसीबीच्या डगआऊटमध्ये दिसणार नाहीत. त्यांच्या जाण्याने आरसीबीच्या सपोर्ट स्टाफमध्ये मोठी पोकळी निर्माण झाली आहे यात शंका नाही. मात्र, त्यांनी दिलेली 18 वर्षांची सेवा आणि खेळाडूंना दिलेला फिटनेसचा मंत्र आरसीबीला या हंगामात नक्कीच प्रेरणा देईल. आता इवान यांच्या अनुपस्थितीत संघ कशी कामगिरी करतो आणि प्लेऑफचे तिकीट मिळवून पुन्हा एकदा ट्रॉफी उंचावतो का, हे पाहणे क्रीडाप्रेमींसाठी औत्सुक्याचे ठरणार आहे.

हेही वाचा: Raj Thackeray on Nasrapur Case: ‘महाराष्ट्राचं ‘लक्ष’ आणि ‘लक्ष्य’ विचलित झालं आहे…’, नसरापूर अत्याचारप्रकरणी राज ठाकरे यांचा संताप, शेअर केली पोस्ट