Ravindra Chavan: रवींद्र चव्हाण बॅकफूटवर; लातूरमधील विलासराव देशमुखांवरील त्या वादग्रस्त वक्तव्यासाठी मागितली जाहीर माफी
छत्रपती संभाजीनगर: आगामी महानगरपालिका निवडणुकांच्या तोंडावर लातूरचे राजकीय वातावरण एका वादग्रस्त विधानाने पेटले आहे. भारतीय जनता पक्षाचे प्रदेशाध्यक्ष रवींद्र चव्हाण यांनी राज्याचे दिवंगत लोकनेते आणि माजी मुख्यमंत्री दिवंगत विलासराव देशमुख यांच्याबद्दल केलेल्या विधानामुळे काँग्रेसने भाजपवर टीकेची झोड उठवली आहे. कार्यकर्त्यांचा उत्साह पाहून “विलासरावांच्या आठवणी या शहरातून नक्कीच पुसल्या जातील,” असे विधान चव्हाण यांनी लातूरमध्ये केले होते, ज्याचे तीव्र पडसाद आता संपूर्ण महाराष्ट्रात उमटत आहेत.
लातूरमधील एका प्रचारसभेत दिवंगत लोकनेते विलासराव देशमुख यांच्या संदर्भात केलेल्या विधानावरून निर्माण झालेला वाद आता निवळण्याची शक्यता आहे. भाजप प्रदेशाध्यक्ष रवींद्र चव्हाण यांनी आज छत्रपती संभाजीनगर येथे घेतलेल्या पत्रकार परिषदेत आपल्या विधानावर स्पष्टीकरण देत जाहीर दिलगिरी व्यक्त केली आहे. “विलासराव देशमुख यांचे चिरंजीव अमित देशमुख माझे चांगले मित्र आहेत, माझ्या वक्तव्यामुळे त्यांच्या भावना दुखावल्या असतील तर मी त्यांची माफी मागतो,” अशा शब्दांत चव्हाणांनी या वादावर पडदा टाकण्याचा प्रयत्न केला.
काय म्हणाले रवींद्र चव्हाण?
पत्रकार परिषदेत बोलताना रवींद्र चव्हाण म्हणाले की, “माझा उद्देश विलासराव देशमुख यांच्यावर वैयक्तिक टीका करण्याचा किंवा त्यांचा अपमान करण्याचा कधीच नव्हता. विलासरावजींनी लातूरमध्ये केलेल्या विकासकामांच्या जोरावर काँग्रेस आजही मते मागत आहे. मला केवळ हे सांगायचे होते की, आता काळ बदलला असून लातूरकरांनी पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या नेतृत्वाखालील विकासाला प्राधान्य दिले पाहिजे.”
मैत्रीचा दिला हवाला
काँग्रेस नेते अमित देशमुख यांनी चव्हाणांच्या विधानाचा तीव्र निषेध केला होता. त्यावर भाष्य करताना चव्हाण म्हणाले, “अमित देशमुख आणि माझे स्नेहाचे संबंध आहेत. राजकीय मतभेद असले तरी वैयक्तिक पातळीवर आम्ही मित्र आहोत. जर माझ्या शब्दांमुळे त्यांना किंवा त्यांच्या कुटुंबाला यातना झाल्या असतील, तर मी मनापासून दिलगिरी व्यक्त करतो. राजकारणात कोणाचेही उपकार किंवा आठवणी पुसणे हा माझा स्वभाव नाही.”
लातूर आणि संभाजीनगरच्या विकासाचे आवाहन
रवींद्र चव्हाण यांनी यावेळी लातूरच्या मतदारांना विकासाच्या मुद्द्यावर साद घातली. “लातूरला आता नवीन उंचीवर न्यायचे असेल, तर भाजपच्या विकासाच्या व्हिजनला साथ देणे गरजेचे आहे,” असे ते म्हणाले. तसेच, छत्रपती संभाजीनगरमधील विकासकामांचा पाढा वाचत, आगामी महापालिका निवडणुकीत जनतेने भारतीय जनता पक्षालाच कौल द्यावा, असे आवाहनही त्यांनी यावेळी केले.
गेल्या दोन दिवसांपासून लातूरमध्ये या मुद्द्यावरून काँग्रेस आक्रमक झाली होती आणि भाजपने विलासरावांचा अपमान केल्याचा आरोप केला जात होता. मात्र, प्रदेशाध्यक्षांनी स्वतःहून माफी मागितल्यामुळे आता काँग्रेस यावर काय भूमिका घेते, हे पाहणे महत्त्वाचे ठरेल.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.