Thackeray Alliance: माहीम ते वरळी… 67 प्रभागांत भाजप-शिंदे गटाची धाकधूक वाढली; काय आहे ठाकरेंच्या युतीचं गणित?
मुंबई: राज्यातील 29 महानगरपालिकांच्या निवडणुकांचे बिगुल वाजताच महाराष्ट्राचे राजकीय वातावरण कमालीचे तापले आहे. 15 जानेवारीला होणारे मतदान आणि 16 जानेवारीला लागणारा निकाल हे राज्याच्या भविष्यातील राजकारणाची दिशा ठरवणारे असतील. मात्र, या निवडणुकीत सर्वात मोठी आणि ऐतिहासिक घोषणा झाली आहे, ती म्हणजे मनसे अध्यक्ष राज ठाकरे आणि शिवसेना (UBT) प्रमुख उद्धव ठाकरे यांच्या युतीची. बुधवारी झालेल्या या अधिकृत घोषणेनंतर मुंबईच्या राजकीय समीकरणांनी अचानक कूस बदलली असून, त्याचे पडसाद आता राज्यात उमटू लागले आहेत.
ठाकरे बंधूंच्या या युतीचा सर्वात मोठा तडाखा मुंबईतील 67 निर्णायक प्रभागांना बसण्याची शक्यता आहे. विधानसभा निवडणुकीच्या प्रभागनिहाय आकडेवारीचे विश्लेषण केले असता, मराठीबहुल पट्ट्यात ही युती महायुतीसाठी 'गेमचेंजर' ठरू शकते.
वरळी, शिवडी, माहीम, घाटकोपर, विक्रोळी आणि भांडुप यांसारख्या विभागांमध्ये मराठी मतांचे होणारे विभाजन आता थांबणार असून, त्याचे थेट रूपांतर विजयात होण्याची चिन्हे आहेत. गेल्या काही वर्षांपासून मराठी मतांच्या फुटीचा फायदा घेणाऱ्या प्रतिस्पर्धी पक्षांसाठी हे नवे समीकरण मोठी टेंशन ठरणार आहे.
आकडेवारीचा विचार केल्यास, ज्या 67 प्रभागांवर सर्वांचे लक्ष आहे, त्यातील 39 प्रभागांमध्ये महाविकास आघाडीने यापूर्वीच आपली पकड मजबूत केली होती. उर्वरित 28 प्रभागांमध्ये महायुतीचे वर्चस्व दिसत असले, तरी आता मनसेची मते ठाकरे गटाकडे वळल्यास महायुतीचा हा गड कोसळण्याची भीती व्यक्त होत आहे. विशेषतः माहीम विधानसभा मतदारसंघातील उदाहरण बोलके आहे. तेथे सदा सरवणकर यांना मिळालेल्या मतांपेक्षा मनसे आणि ठाकरे गटाच्या उमेदवारांच्या मतांची बेरीज दुपटीहून अधिक आहे. हाच 'माहीम पॅटर्न' आता संपूर्ण मुंबईत राबवण्याची रणनीती ठाकरे बंधूंनी आखली आहे.
केवळ वरळी किंवा माहीमच नव्हे, तर दिंडोशी आणि इतर उपनगरांतील अनेक प्रभागांमध्ये मनसे आणि शिवसेना (UBT) यांची एकत्रित ताकद विरोधकांना आस्मान दाखवण्यासाठी पुरेशी आहे. ही युती केवळ जागावाटपापुरती मर्यादित नसून, ती मुंबईतील 'मराठी अस्मितेच्या' राजकारणाला पुन्हा एकदा नवसंजीवनी देणारी ठरू शकते. मराठी मतदारांमध्ये या एकत्रिकरणाबद्दल असलेली उत्सुकता महायुतीला आपली रणनीती मुळापासून बदलण्यास भाग पाडणार आहे.
थोडक्यात सांगायचे तर, मुंबई महानगरपालिकेची सत्ता काबीज करण्यासाठी राज आणि उद्धव ठाकरे यांनी टाकलेले हे पाऊल भाजप आणि शिंदे गटासाठी मोठे आव्हान ठरणार आहे. 'मराठी माणूस' या एकाच मुद्द्यावर हे दोन्ही पक्ष एकत्र आल्याने मुंबईच्या राजकारणात 'ठाकरे' नावाचा प्रभाव पुन्हा एकदा पूर्वीसारखाच निर्णायक ठरू शकतो. आता या युतीचा करिष्मा प्रत्यक्ष मतदानात किती प्रभावी ठरतो, हे पाहणे औत्सुक्याचे ठरेल.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.