Oscar New Rules: आता ऑस्करचे नविन नियम भारतीयांच्या पथ्यावर! पात्र कलाकाराचा होणार योग्य तो सन्मान आणि AI आधारित…

ऑस्कर हा मनोरंजन क्षेत्रातील प्रतिष्ठित पुरस्कार मानला जातो. अकॅडमी ऑफ मोशन पिक्चर आर्ट्स अँड सायन्सेसने 2027 च्या ऑस्कर पुरस्कारांसाठी आंतरराष्ट्रीय फीचर फिल्म श्रेणीचे नियम बदलले आहेत. याचा परिणाम भारतासारख्या देशांवर होऊ शकतो, जिथे दरवर्षी ऑस्कर प्रवेशिका वादाचा विषय ठरल्या आहेत. नवीन नियमांनुसार, ऑस्कर पुरस्कारासाठी विचारात घेतले जाण्याचा एकमेव मार्ग यापुढे देशाची अधिकृत प्रवेशिका राहणार नाही.

अकॅडमी ऑफ मोशन पिक्चर आर्ट्स अँड सायन्सेसच्या नवीन मार्गदर्शक तत्त्वांनुसार, जर एखाद्या चित्रपटाने कान्स, व्हेनिस, टोरोंटो, बर्लिन, सनडान्स किंवा बुसान यांसारख्या आंतरराष्ट्रीय चित्रपट महोत्सवांमध्ये सर्वोच्च पुरस्कार जिंकला, तर तो थेट ऑस्करच्या 'इंटरनॅशनल फीचर' श्रेणीसाठी पात्र ठरू शकतो. याचा अर्थ असा की, तो चित्रपट आपल्या देशाची अधिकृत प्रवेशिका असण्याची गरज भासणार नाही.

ऑस्करच्या नियमांमध्ये तंत्रज्ञानावर आधारित बदल केले आहेत. आजकाल, चित्रपटांमध्ये अनेक प्रसंगी गोष्टी प्रगत दाखवण्यासाठी किंवा एखादी उणीव भरून काढण्यासाठी एआयचा (AI) वापर केला जातो. पूर्वी, अशा कामगिरीचा ऑस्करसाठी विचार केला जात असे. मात्र, नवीन नियमानुसार आता हे शक्य होणार नाही.

ऑस्करच्या नियमांमधील सर्वात मोठा बदल म्हणजे आता कोणत्याही अभिनेत्याला एकाच श्रेणीमध्ये एकापेक्षा जास्त वेळा नामांकन मिळू शकते. यापूर्वी ऑस्करमध्ये ही सुविधा नव्हती. पूर्वी, एखाद्या कलाकाराला एका विशिष्ट श्रेणीमध्ये फक्त एकदाच नामांकन मिळू शकत होते. पण आता, त्यांना दोनदा नामांकन मिळू शकते. उदाहरणार्थ, जर एखाद्या अभिनेत्याच्या एका वर्षात दोन सर्वोत्कृष्ट भूमिका असतील आणि त्या दोन्हींना जोरदार मते मिळाली, तर त्याचे दोन्ही चित्रपट त्या विशिष्ट श्रेणीमध्ये समाविष्ट केले जाऊ शकतात.

तसेच 'सर्वोत्कृष्ट आंतरराष्ट्रीय चित्रपट' ही श्रेणीबाबतीतही काही बदल केले आहेत. या बदलामुळे आता कोणताही देश आपल्या अधिकृत निवड समितीमार्फत ऑस्करसाठी एकापेक्षा जास्त चित्रपट सादर करू शकतो. पूर्वी असे नव्हते. पूर्वी, कोणत्याही देशातून कोणत्याही श्रेणीमध्ये ऑस्करसाठी फक्त एकच चित्रपट सादर केला जाऊ शकत होता. मात्र, आता एकाच श्रेणीमध्ये दोन चित्रपट नामांकनासाठी सादर केले जाऊ शकतात. असे झाल्यास, ही भारतासाठी एक आनंदाची बातमीच असेल. नवीन मार्गदर्शक तत्त्वांनुसार, आंतरराष्ट्रीय फीचर पुरस्काराचे श्रेय आता देशाऐवजी चित्रपटाच्या दिग्दर्शकाला दिले जाईल. शिवाय, एकाच देशातील अनेक चित्रपट ऑस्करच्या शर्यतीत पोहोचण्याची शक्यता वाढली आहे.