Amruta Fadnavis: ‘अ‍ॅक्सिस बँकेतही नाशिकच्या टीसीएससारख्या घटना घडल्या’, अमृता फडणवीस यांचा गौप्यस्फोट

शहरातील टीसीएस (TCS) बीपीओ सेंटरमध्ये महिला कर्मचाऱ्यांशी संबंधित गंभीर गैरप्रकार उघडकीस आल्याने मोठी खळबळ उडाली आहे. या प्रकरणात काही वरिष्ठ पदांवरील कर्मचाऱ्यांसह अनेक जण संशयित असल्याची माहिती समोर येत असून, या संदर्भात नऊहून अधिक गुन्हे नोंदवण्यात आल्याचे सांगितले जात आहे. या पार्श्वभूमीवर विविध स्तरातून प्रतिक्रिया उमटत असताना, राज्याचे मुख्यमंत्री देवेंद्र फडणवीस यांच्या पत्नी अमृता फडणवीस यांनीही यावर भाष्य केले आहे.

अमृता फडणवीस यांनी या प्रकरणाबाबत बोलताना अशा घटनांबद्दल तीव्र नाराजी व्यक्त केली. कॉर्पोरेट क्षेत्रात काम करताना अशा स्वरूपाच्या तक्रारी पूर्वीही समोर आल्याचे त्यांनी नमूद केले. त्या म्हणाल्या की, त्या बँकिंग क्षेत्रात कार्यरत असताना काही प्रकरणांमध्ये तातडीने कारवाई करण्यात आली होती. त्यामुळे अशा घटनांवर नियंत्रण ठेवण्यासाठी त्वरित आणि कठोर पावले उचलणे अत्यंत आवश्यक असल्याचे त्यांनी स्पष्ट केले. तसेच, अशा प्रसंगी संबंधितांनी आपल्या वरिष्ठांना माहिती देणे महत्त्वाचे असल्याचेही त्यांनी सांगितले. वेळेत तक्रार केल्यास आणि व्यवस्थापनाने योग्य प्रतिसाद दिल्यास अशा घटना रोखता येऊ शकतात, असे त्यांनी अधोरेखित केले. महिलांनीही सतर्क राहणे आणि आपल्या सुरक्षिततेबाबत जागरूक असणे गरजेचे असल्याचे त्यांनी नमूद केले.
या प्रकरणाच्या अनुषंगाने सामाजिक मुद्द्यांवर बोलताना त्यांनी आजच्या तरुण पिढीत संभ्रम निर्माण होत असल्याचेही सांगितले. पारंपरिक मूल्ये आणि संस्कृती यांची योग्य माहिती नसल्याने काहीवेळा चुकीच्या गोष्टींना बळी पडण्याची शक्यता वाढते, असे मत त्यांनी व्यक्त केले. त्यामुळे शिक्षणासोबतच भारतीय संस्कृतीवर आधारित मूल्यांची जाणीव देणेही तितकेच महत्त्वाचे असल्याचे त्यांनी सांगितले.