Kangana Ranaut on CJP Protest: ‘जनतेने सरकारला निवडलंय,ते ठरवतील…’, जंतर-मंतर आंदोलनावर कंगना रणौत यांची प्रतिक्रिया

 राजधानी दिल्लीतील जंतर-मंतर येथे 'कॉकरोच जनता पार्टी'तर्फे आयोजित करण्यात आलेल्या निदर्शनांवर अभिनेत्री आणि भाजपच्या खासदार कंगना रणौत यांनी प्रतिक्रिया दिली आहे. संसद अधिवेशनाच्या पहिल्याच दिवशी प्रसारमाध्यमांशी संवाद साधताना त्यांनी विरोधी पक्षाची भूमिका, संसदेचे कामकाज आणि सरकारच्या जबाबदाऱ्यांबाबत आपले मत स्पष्ट केले.

प्रसारमाध्यमांनी देशातील विविध राजकीय घडामोडी आणि जंतर-मंतरवरील आंदोलनाबाबत प्रश्न विचारल्यानंतर कंगना रणौत म्हणाल्या की, संसदेचे अधिवेशन हे लोकशाहीतील सर्वात महत्त्वाचे व्यासपीठ असून देशाशी संबंधित प्रत्येक महत्त्वाच्या विषयावर तेथे सखोल चर्चा होणे अपेक्षित आहे. विरोधी पक्षाने सरकारसमोर आपले प्रश्न आणि आक्षेप मांडावेत, त्याचे सरकार स्वागत करते. मात्र, संसदीय कामकाजात सतत गोंधळ घालणे किंवा कामकाज ठप्प करण्याचा प्रयत्न करणे हा लोकशाहीचा योग्य मार्ग नसल्याचे त्यांनी नमूद केले.

कंगना म्हणाल्या, "संसदेची अधिवेशने ही प्रत्येक मुद्द्यावर चर्चा करण्यासाठी असतात. विरोधी पक्षाने आमच्यासमोर सर्व प्रश्न मांडावेत याचे आम्ही स्वागत करतो, परंतु गोंधळ घालणे आणि संसदीय कामकाज विस्कळीत करणे ही योग्य पद्धत नाही. देशातील जनतेने या सरकारला निवडून दिले आहे आणि देशाचा कारभार सुरळीत चालवणे तसेच संसदीय कामकाज प्रभावीपणे पार पाडणे ही सरकारची जबाबदारी आहे. कोणाला काम करायला मिळेल आणि कोणाला नाही, याचा निर्णय सरकार घेईल; कारण देशातील जनतेने सरकारला निवडून दिले आहे आणि हा निर्णय त्यांच्याच हाती आहे.

यावेळी त्यांनी सरकारला मिळालेल्या जनादेशाचाही उल्लेख केला. जनतेने बहुमत देऊन सरकारची निवड केली असल्याने प्रशासन चालविण्याची जबाबदारी सरकारवर आहे. त्यामुळे कोणत्या मुद्द्यावर कशाप्रकारे काम करायचे, कोणत्या निर्णयाला प्राधान्य द्यायचे आणि कोणत्या विषयावर पुढे जायचे, याचा निर्णय घेण्याचा अधिकार सरकारकडे असल्याचे त्यांनी स्पष्ट केले. दरम्यान, संसद अधिवेशनाच्या पार्श्वभूमीवर सत्ताधारी आणि विरोधी पक्ष यांच्यात विविध मुद्द्यांवर राजकीय आरोप-प्रत्यारोप सुरू आहेत. अशा परिस्थितीत संसदेत महत्त्वाच्या विषयांवर चर्चा होणार की गदारोळामुळे कामकाजावर परिणाम होणार, याकडे सर्वांचे लक्ष लागले आहे. या पार्श्वभूमीवर कंगना रणौत यांच्या वक्तव्याचीही राजकीय वर्तुळात चर्चा सुरू झाली आहे.