Crime News: पैशाच्या लालसेपोटी देशाशी गद्दारी! सुरक्षा दलांचे व्हिडिओ-फोटो टिपणारी टोळी जेरबंद
उत्तर प्रदेशातील गाझियाबाद येथील कौशांबी पोलीस ठाण्याच्या पोलिसांनी राष्ट्रविरोधी कारवायांमध्ये सहभागी असलेल्या एका टोळीचा पर्दाफाश करत सहा जणांना अटक केली आहे. या कारवाईदरम्यान पोलिसांनी आरोपींकडून गुन्ह्यात वापरलेले आठ मोबाईल फोन जप्त केले आहेत. संवेदनशील ठिकाणांचे व्हिडिओ आणि फोटो तयार करून ते इतरांना पाठवल्याचा आरोप या आरोपींवर आहे.
पोलिसांनी दिलेल्या माहितीनुसार, शनिवारी मिळालेल्या गुप्त माहितीच्या आधारे ही कारवाई करण्यात आली. भोवापूर परिसरातील काही युवक रेल्वे स्थानक आणि सुरक्षा दलांशी संबंधित संवेदनशील ठिकाणांचे व्हिडिओ तयार करून ते विविध लोकांना पाठवत असल्याची माहिती पोलिसांना मिळाली होती. तसेच पैशांचे आमिष दाखवून इतर युवकांनाही या कामात सहभागी करून घेतल्याचा संशय व्यक्त करण्यात आला होता.
या माहितीनंतर कौशांबी पोलिसांनी भोवापूर टी-पॉइंट परिसरात सापळा रचत कारवाई केली आणि पाच आरोपींना ताब्यात घेतले. पुढील चौकशीतून मिळालेल्या माहितीनुसार पोलिसांनी साने इरम उर्फ महक या आणखी एका आरोपीला आनंद विहार सीमेच्या परिसरातून अटक केली.
प्राथमिक चौकशीत असे उघड झाले आहे की आरोपी मोबाईल फोन आणि चॅटच्या माध्यमातून संवेदनशील ठिकाणांचे फोटो व व्हिडिओ तयार करून ते पाठवत होते आणि त्याबदल्यात पैसे घेत होते. इतकेच नव्हे तर इतर लोकांनाही अशा प्रकारच्या कृत्यांमध्ये सहभागी होण्यासाठी प्रवृत्त केले जात होते.
पोलिसांच्या मते, या प्रकारच्या कारवायांमुळे धार्मिक सलोखा तसेच देशाची एकता आणि अखंडता धोक्यात येण्याची शक्यता होती. त्यामुळे या प्रकरणाकडे अत्यंत गंभीरतेने पाहिले जात आहे.
या प्रकरणात अटक करण्यात आलेल्या आरोपींमध्ये सुहेल मलिक, साने इरम उर्फ महक, प्रवीन, राज वाल्मीकि, शिवा वाल्मीकि आणि रितिक गंगवार यांचा समावेश आहे. पोलिसांनी आरोपींविरुद्ध भारतीय न्याय संहितेच्या कलम 152/61(2) तसेच शासकीय गोपनीयता कायद्याच्या कलम 3 आणि 5 अंतर्गत गुन्हा दाखल केला असून पुढील तपास सुरू आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.