Maharashtra Politics: चंद्रशेखर बावनकुळे यांनी घेतली राज ठाकरेंची भेट; शिवतीर्थावरील भेटीनंतर राजकीय चर्चांना उधाण

मुंबईतील ‘शिवतीर्थ’ या निवासस्थानी महाराष्ट्र नवनिर्माण सेनेचे अध्यक्ष राज ठाकरे आणि राज्याचे महसूल मंत्री चंद्रशेखर बावनकुळे यांच्यात झालेल्या भेटीने राज्याच्या राजकीय वर्तुळात चर्चांना उधाण आले आहे. अचानक झालेल्या या भेटीमुळे महाराष्ट्राच्या राजकारणात काही मोठ्या हालचाली सुरू आहेत का, असा प्रश्न उपस्थित केला जात आहे. भाजपचे वरिष्ठ नेते असलेले बावनकुळे यांनी राज ठाकरे यांच्या निवासस्थानी जाऊन त्यांची भेट घेतली. दोन्ही नेत्यांमध्ये काही काळ चर्चा झाल्याची माहिती समोर आली असली, तरी या भेटीमागचं नेमकं कारण अद्याप स्पष्ट झालेलं नाही. विशेष म्हणजे भेटीनंतर ना राज ठाकरे यांनी माध्यमांशी संवाद साधला, ना बावनकुळे यांनी कोणती प्रतिक्रिया दिली. त्यामुळे या भेटीभोवतीचं गूढ आणखी वाढलं आहे.

राज ठाकरे हे महाराष्ट्राच्या राजकारणातील प्रभावी व्यक्तिमत्त्व मानले जातात. त्यांच्या पक्षाला अलीकडच्या निवडणुकांमध्ये मोठं यश मिळालं नसले, तरी त्यांच्या सभांना मोठ्या प्रमाणावर गर्दी होताना दिसते. विशेषतः तरुण वर्गात त्यांचा प्रभाव कायम आहे. मराठी भाषा, स्थानिकांचा प्रश्न आणि महाराष्ट्राच्या अस्मितेशी संबंधित मुद्द्यांवर ते नेहमी आक्रमक भूमिका घेताना दिसतात. अलीकडेच राज्यात मराठी भाषेच्या मुद्द्यावरून मोठी चर्चा रंगली होती. या पार्श्वभूमीवर बावनकुळे आणि राज ठाकरे यांची भेट झाल्याने राजकीय अंदाजांना अधिकच उधाण आलं आहे. काही राजकीय जाणकारांच्या मते, आगामी निवडणुका आणि बदलत्या राजकीय समीकरणांच्या दृष्टीने ही भेट महत्त्वाची ठरू शकते.

मनसे आणि भाजप यांच्यात भविष्यात काही राजकीय सहकार्य होणार का, याबाबतही चर्चा सुरू झाल्या आहेत. याआधीही विविध मुद्द्यांवर दोन्ही पक्षांमध्ये जवळीक दिसून आली होती. मात्र, या भेटीनंतर आता त्या चर्चांना आणखी बळ मिळालं आहे.