BSNL Recruitment 2026: BSNL मध्ये करिअरची मोठी संधी; अर्जाची, परीक्षेची तारीख आणि पात्रता निकष पाहा एका क्लिकवर

नवी दिल्ली: सरकारी क्षेत्रात करिअर घडवण्याची इच्छा असलेल्या तरुणांसाठी भारत संचार निगम लिमिटेड (BSNL, Bharat Sanchar Nigam Limited) कडून एक महत्त्वाची संधी उपलब्ध झाली आहे. कंपनीने वर्ष 2026 साठी सीनियर एक्झिक्युटिव ट्रेनी पदांसाठी भरती प्रक्रिया सुरू केली आहे. या भरतीद्वारे एकूण 120 पदे भरली जाणार असून अभियांत्रिकी तसेच वित्तीय क्षेत्रातील पात्र उमेदवारांना सरकारी दूरसंचार क्षेत्रात प्रवेश करण्याची संधी मिळणार आहे. अर्ज प्रक्रिया 5 फेब्रुवारी 2026 पासून सुरू झाली असून इच्छुक उमेदवारांना 7 मार्च 2026 पर्यंत ऑनलाइन अर्ज सादर करता येणार आहेत.

या भरतीमध्ये दोन प्रमुख प्रवाह निश्चित करण्यात आले आहेत. टेलिकॉम आणि फायनान्स. त्यापैकी 95 पदे टेलिकॉम स्ट्रीमसाठी राखीव आहेत, तर 25 पदे फायनान्स स्ट्रीमसाठी निश्चित करण्यात आली आहेत. त्यामुळे तांत्रिक क्षेत्रातील अभियंते तसेच वित्तीय व्यवस्थापनाशी संबंधित व्यावसायिक पात्रता असलेल्या उमेदवारांसाठी ही भरती विशेष महत्त्वाची मानली जात आहे.

अर्ज प्रक्रिया पूर्ण झाल्यानंतर उमेदवारांना अर्जातील चुका दुरुस्त करण्याची संधी देखील दिली जाणार आहे. 8 मार्च ते 15 मार्च 2026 या कालावधीत ‘करेक्शन विंडो’ खुली राहणार आहे. या काळात उमेदवार अर्जातील माहितीमध्ये आवश्यक बदल करू शकतील. त्यानंतर निवड प्रक्रियेचा मुख्य टप्पा असलेली संगणक आधारित परीक्षा 29 मार्च 2026 रोजी आयोजित केली जाण्याची शक्यता आहे.

हेही वाचा: Viral Video: जिगरी मित्राचा अफगाणिस्तान युद्धादरम्यान मृत्यू; अंत्यसंस्काराला चमकदार निऑन ड्रेस घालून पोहोचला मित्र,कारण वाचून तुमच्याही डोळ्यात येईल पाणी

टेलिकॉम स्ट्रीमसाठी अर्ज करणाऱ्या उमेदवारांकडे पूर्णवेळ बीई किंवा बीटेक पदवी असणे आवश्यक आहे. ही पदवी किमान 60 टक्के गुणांसह पूर्ण केलेली असावी. इलेक्ट्रॉनिक्स, टेलिकम्युनिकेशन, कॉम्प्युटर सायन्स, आयटी किंवा इलेक्ट्रिकल इंजिनिअरिंग या शाखांमधील पदवीधर या पदांसाठी पात्र मानले जातील. अंतिम वर्षात शिकत असलेल्या विद्यार्थ्यांनाही अर्ज करण्याची संधी देण्यात आली आहे, मात्र त्यांनी निश्चित वेळेत आपली पदवी पूर्ण करणे आवश्यक राहील.

फायनान्स स्ट्रीमसाठी उमेदवारांकडे चार्टर्ड अकाउंटंट  किंवा कॉस्ट अँड मॅनेजमेंट अकाउंटंट ही व्यावसायिक पात्रता असणे बंधनकारक आहे. या भरतीसाठी किमान वय 21 वर्षे आणि कमाल वय 30 वर्षे निश्चित करण्यात आले आहे. आरक्षित प्रवर्गातील उमेदवारांना केंद्र सरकारच्या नियमानुसार वयोमर्यादेत सवलत दिली जाईल.

निवड प्रक्रिया दोन टप्प्यांत पार पडणार आहे. पहिल्या टप्प्यात संगणक आधारित परीक्षा घेतली जाईल, ज्यामध्ये बहुपर्यायी प्रश्न विचारले जातील. या परीक्षेत यशस्वी ठरलेल्या उमेदवारांना पुढील टप्प्यात कागदपत्र पडताळणीसाठी बोलावले जाईल. सर्व शैक्षणिक आणि वैयक्तिक कागदपत्रे योग्य असल्याची खात्री झाल्यानंतर अंतिम नियुक्तीची प्रक्रिया पूर्ण केली जाईल.

इच्छुक उमेदवार बीएसएनएलच्या अधिकृत संकेतस्थळाला भेट देऊन ऑनलाइन अर्ज करू शकतात. अर्ज भरताना सर्व माहिती अचूक देणे अत्यंत महत्त्वाचे आहे, कारण चुकीची माहिती आढळल्यास अर्ज नाकारला जाऊ शकतो. त्यामुळे अर्ज करण्यापूर्वी अधिकृत सूचना काळजीपूर्वक वाचूनच प्रक्रिया पूर्ण करण्याचा सल्ला देण्यात आला आहे.

हेही वाचा: Mumbai MHADA Homes: अखेर गिरणी कामगारांना न्याय मिळाला! त्या 324 सदनिकांची पुन्हा निघणार सोडत; हायकोर्टाचा म्हाडाला 'नव्या सोडती'चा आदेश