Bill Gates: धक्कादायक! ‘इंडिया AI समिट’मधून बिल गेट्स यांची माघार; ऐनवेळी माघार घेण्याचे कारण काय?

नवी दिल्ली: इंडिया एआय इम्पॅक्ट समिट 2026 सुरू असतानाच मोठी घडामोड घडली असून मायक्रोसॉफ्टचे सहसंस्थापक बिल गेट्स यांनी नियोजित मुख्य तज्ञांच्या भाषणातून माघार घेतली आहे. गेट्स फाउंडेशनने गुरुवारी अधिकृत निवेदन जारी करत “सखोल विचारांती आणि परिषदेमधील मुख्य उद्दिष्टांवर लक्ष केंद्रित राहावे यासाठी” बिल गेट्स समिटमध्ये भाषण करणार नसल्याचे स्पष्ट केले. विशेष म्हणजे, अवघ्या एका दिवसापूर्वीच त्यांच्या उपस्थितीची पुष्टी करण्यात आली होती.

भारत मंडपम येथे होणाऱ्या या परिषदेत बिल गेट्स यांचे प्रमुख भाषण नियोजित होते. मात्र आता गेट्स फाउंडेशनतर्फे आफ्रिका आणि भारत विभागाचे अध्यक्ष अंकुर वोरा हे संस्थेचे प्रतिनिधित्व करत समिटमध्ये संबोधन करणार आहेत. भारतातील आरोग्य आणि विकास क्षेत्रातील सहकार्याबाबत फाउंडेशनची बांधिलकी कायम असल्याचेही निवेदनात नमूद करण्यात आले आहे.

हेही वाचा: Sunetra Pawar : शब्द जड झाले, कंठ दाटून आला; उपमुख्यमंत्री झाल्यानंतर सुनेत्रा पवार यांचं शिवनेरीवर पहिलंच भाषण

दरम्यान, जेफ्री एपस्टीन प्रकरणाशी संबंधित दस्तऐवजांमध्ये नाव समोर आल्यामुळे बिल गेट्स यांच्यावर जागतिक स्तरावर टीका आणि सोशल मीडियावर विरोध वाढत असल्याच्या पार्श्वभूमीवर हा निर्णय घेतल्याची चर्चा रंगली आहे. लैंगिक गुन्ह्यांमध्ये दोषी ठरलेला एपस्टीन 2019 मध्ये तुरुंगात मृत्यूमुखी पडला होता. या प्रकरणाशी संबंधित आरोपांना गेट्स यांनी यापूर्वीच “पूर्णपणे खोटे आणि निराधार” असल्याचे म्हटले आहे.

भारत दौऱ्यादरम्यान आंध्र प्रदेश सरकारने गन्नावरम विमानतळावर बिल गेट्स यांचे औपचारिक स्वागत केले होते. राज्याचे मंत्री नारा लोकेश यांनी सोशल मीडिया पोस्टद्वारे त्यांचे स्वागत करत अमरावती भेटीचा उल्लेख केला होता. मात्र त्यांच्या भारत भेटीवर काही गटांकडून टीकाही करण्यात आली होती.

इंडिया एआय इम्पॅक्ट समिट 2026 च्या चौथ्या दिवशी आता पंतप्रधान नरेंद्र मोदी, फ्रान्सचे राष्ट्रपती इमॅन्युएल मॅक्रॉन तसेच संयुक्त राष्ट्रांचे महासचिव अँटोनियो गुटेरेस यांची भाषणे होणार आहेत. याशिवाय तंत्रज्ञान आणि उद्योग क्षेत्रातील दिग्गज सॅम ऑल्टमन आणि मुकेश अंबानी यांचीदेखील उपस्थिती या परिषदेला जागतिक महत्त्व प्राप्त करून देत आहे.

एकूणच, बिल गेट्स यांच्या अचानक माघारीमुळे परिषदेत चर्चेला वेगळे वळण मिळाले असून, कृत्रिम बुद्धिमत्ता (Artificial Intelligence, AI) क्षेत्रातील जागतिक सहकार्याच्या चर्चांदरम्यान ही घडामोड विशेष लक्षवेधी ठरली आहे.

हेही वाचा: BMC On Mumbai Roads: ना पाऊस, ना पूर; तरीही मुंबईचे रस्ते होणार ओलेचिंब! नेमकं काय आहे पालिकेचं ‘स्वच्छता धोरण’