आतिशी मार्लेना सिंग झाल्या दिल्लीच्या मुख्यमंत्री
नवी दिल्ली : मै आतिशी… असं म्हणत आम आदमी पार्टीच्या आतिशी मार्लेना सिंग यांनी दिल्लीच्या मुख्यमंत्रिपदाची शपथ घेतली. नायब राज्यपालांनी त्यांना शपथ दिली.
मद्य धोरण घोटाळ्यातून मिळवलेल्या पैशांद्वारे गैरव्यवहार केल्याचा आरोप झाल्यानंतर अरविंद केजरीवाल यांना काही काळ तुरुंगात जावे लागले. अलिकडेच त्यांना जामीन मिळाला. पण आरोपींच्या यादीत केजरीवालांचे नाव कायम आहे. या पार्श्वभूमीवर केजरीवालांनी राजीनामा दिला. यानंतर आम आदमी पार्टीने एकमताने आतिशी यांची मुख्यमंत्रिपदासाठी निवड केली. अखेर शनिवारी २१ सप्टेंबर रोजी आतिशी यांनी ईश्वराला साक्षी ठेवून मुख्यमंत्रिपदाची शपथ घेतली.
दिल्ली विधानसभेच्या आमदार असलेल्या आतिशी मार्लेना सिंग यांनी केजरीवाल यांच्या मंत्रिमंडळात सार्वजनिक बांधकाम, पर्यटन, सांस्कृतिक मंत्रालय, महिला व बालकल्याण, शिक्षण अशा वेगवेगळ्या खात्यांच्या जबाबदाऱ्या हाताळल्या आहेत.
आतिशी मार्लेना सिंग यांची राजकीय कारकिर्द
- आम आदमी पार्टीच्या संस्थापक सदस्य
- लोकसभेच्या २०१९ च्या निवडणुकीत पराभव
- दिल्ली विधानसभेच्या २०२० पासून आमदार, दक्षिण दिल्लीतील कालकाजी मतदारसंघाच्या लोकप्रतिनिधी
- केजरीवाल सरकारमध्ये २०२३ पासून कॅबिनेट मंत्री
- दिल्लीच्या मुख्यमंत्री
दिल्ली विधानसभा निवडणूक – कालकाजी विधानसभा मतदारसंघ – २०२०
- आतिशी मार्लेना सिंग, आम आदमी पार्टी – एकूण मते ५५ हजार ८९७
- धरमबीर, भाजपा – एकूण मते ४४ हजार ५०४
- आतिशी मार्लेना सिंग ११ हजार ३९३ मतांनी विजयी
आतिशी मार्लेना सिंगच्या निवडीवर भाजपाची प्रतिक्रिया
- दिल्लीच्या मुख्यमंत्रिपदी आतिशीच्या रुपाने अरविंद केजरीवाल एक बाहुली आणून बसवत आहेत. आतिशीकरवी मद्य धोरण घोटाळ्यातील सर्व आरोपींच्या सुटकेसाठी प्रयत्न करण्याचा डाव केजरीवाल आखत आहेत.
- आतिशीच्या आईवडिलांनी अतिरेकी अफझल गुरुला वाचवण्यासाठी न्यायालयात याचिका केली होती. अफझल गुरु हा संसद हल्ल्याच्या कटात सहभागी असलेला अतिरेकी होता.
- दिल्लीच्या शिक्षणमंत्री म्हणून आतिशी पुरत्या अपयशी ठरल्या आहेत.
- आतिशीवर तथ्यहीन आरोप केल्याप्रकरणी न्यायालयात सुनावणी सुरू आहे. या याचिकवेर १९ सप्टेंबर रोजी पुढील सुनावणी होणार आहे.
- आतिशीचे आडनाव मार्लेना आहे. पण २०१९ च्या लोकसभा निवडणुकीआधी आतिशीने स्वतःचे आडनाव सिंग असल्याचे सांगायला सुरुवात केली.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.