Alibag Nagar Parishad Election 2025: राजकारणातील सर्वांत तरुण नेतृत्व! अलिबागमध्ये अक्षया नाईक नगराध्यक्ष, भाजपला मोठा धक्का
Alibag Nagar Parishad Election 2025: राज्यातील स्थानिक स्वराज्य संस्थांच्या निवडणुकांचे निकाल जाहीर होत असताना अनेक ठिकाणी अनपेक्षित राजकीय चित्र समोर आले आहे. काही वर्षांपासून रखडलेल्या नगरपरिषद आणि नगरपालिकांच्या निवडणुकांचा पहिला टप्पा पूर्ण झाला असून, या निकालांनी राज्याच्या राजकारणात नवे संकेत दिले आहेत. अशाच एका महत्त्वाच्या निकालाने अलिबाग नगरपरिषद निवडणूक विशेष चर्चेत आली आहे.
डावे पक्ष अस्तित्वासाठी संघर्ष करत असताना शेतकरी कामगार पक्षाने अलिबागमधील आपला बालेकिल्ला पुन्हा एकदा अबाधित राखत ताकद दाखवून दिली आहे. अलिबाग नगरपरिषदेत शेकापच्या अक्षया नाईक यांनी दणदणीत विजय मिळवत नगराध्यक्षपद पटकावले आहे. अवघ्या 23 वर्षांच्या अक्षया नाईक या राज्यातील सर्वात तरुण नगराध्यक्ष ठरणार असून, त्यांच्या विजयाने राज्याच्या राजकारणात नव्या पिढीच्या नेतृत्वाची चर्चा सुरू झाली आहे.
हेही वाचा: Kankavli Sandesh Parkar : निलेश राणेंमुळे ठाकरे गटाचा उमेदवार विजयी, नितेश राणेंना धक्का
अलिबाग नगरपरिषद निवडणूक ही केवळ स्थानिक सत्तेसाठीची लढत नव्हती, तर ती राजकीय प्रतिष्ठेची चाचणी ठरली होती. भाजप आणि शिवसेना शिंदे गटाने युती करत शेकाप-काँग्रेस आघाडीसमोर आव्हान उभे केले होते. विशेष म्हणजे, या निवडणुकीच्या निमित्ताने शेतकरी कामगार पक्ष आणि काँग्रेस हे पारंपरिक विरोधी पक्ष पहिल्यांदाच एकत्र आले होते. त्यामुळे ही लढत अधिक चुरशीची झाली होती.
अलिबाग नगरपालिकेवर गेल्या चार दशकांहून अधिक काळ शेकापचे वर्चस्व आहे. या निवडणुकीतही मतदारांनी तोच विश्वास कायम ठेवत भाजपला जोरदार धक्का दिला. अक्षया नाईक यांनी भाजपच्या उमेदवार तनुजा पेरेकर यांचा मोठ्या फरकाने पराभव केला. मिळालेल्या मतांमध्ये स्पष्ट आघाडी घेत अक्षया नाईक यांनी शेकापचा किल्ला किती मजबूत आहे, हे पुन्हा एकदा सिद्ध केले.
नाईक कुटुंबाची अलिबागवरील राजकीय पकड या निकालातून पुन्हा अधोरेखित झाली आहे. अक्षया नाईक या नाईक कुटुंबातील सातव्या नगराध्यक्ष ठरणार आहेत. याआधी माजी नगराध्यक्ष प्रशांत नाईक हे नगरसेवक म्हणून बिनविरोध निवडून आले होते. त्यामुळे आता अलिबाग नगरपरिषदेत ‘लेक नगराध्यक्ष आणि वडील नगरसेवक’ असे वेगळे चित्र पाहायला मिळणार आहे.
या निवडणुकीत एकूण 20 प्रभागांसाठी लढत झाली. बहुतांश प्रभागांमध्ये दुरंगी सामना पाहायला मिळाला. निवडणूक प्रचाराच्या काळात भाजपने शेवटच्या टप्प्यात केलेली रणनीती मात्र प्रभावी ठरली नाही. उद्धव ठाकरे गटातून भाजपमध्ये प्रवेश देत उमेदवारी दिल्याचा प्रयोग मतदारांना फारसा पटला नसल्याचे राजकीय जाणकारांचे मत आहे.
याशिवाय, स्थानिक पातळीवरील राजकीय समीकरणे, नेत्यांमधील वैयक्तिक संबंध आणि प्रचारातील मर्यादा याचा फटका महायुतीला बसल्याची चर्चा आहे. दुसरीकडे, शेकापने पारंपरिक मतदारांबरोबरच तरुण मतदारांचा विश्वासही मिळवला असल्याचे या निकालातून स्पष्ट झाले आहे.
एकूणच, अलिबाग नगरपरिषद निकाल हा शेकापसाठी केवळ विजय नसून, तो राजकीय अस्तित्वाचा आत्मविश्वास वाढवणारा ठरला आहे. तरुण नेतृत्व, भक्कम संघटन आणि स्थानिक प्रश्नांवरील पकड यामुळे शेकापने पुन्हा एकदा अलिबागमध्ये लाल बावटा अभिमानाने फडकावला आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.