पडद्यामागची सुरत स्वारी

सुरत, २५ एप्रिल २०२४, प्रतिनिधी : सध्या देशात राजकीय घडामोडींना चांगलाच वेग आला आहे. लोकसभा निवडणुकीमुळे सगळं वातावरण राजकारणमय झालं आहे. जो-तो आमचाच विजय होणार, असं ठणकावून सांगतोय. देशात असे काही मतदारसंघ आहेत, ज्यांच्याकडे संपूर्ण देशाचं लक्ष लागलं आहे. सत्ताधारी भाजप आम्ही या निवडणुकीत चारशेपेक्षा अधिक जागा जिंकू असा विश्वास व्यक्त करत आहे. दरम्यान संपूर्ण निकालाला अद्याप वेळ असला तरी भाजपाला एका जागेवर विजय मिळाला आहे.

या निवडणुकीत सुरत लोकसभेतून भाजपचे उमेदवार मुकेश दलाल हे बिनविरोध निवडून आले आहेत. या जागेवर काँग्रेसचे उमेदवार निलेश कुम्भानी यांचा उमेदवारी अर्ज रद्दबातल ठरवण्यात आला आहे. प्रमुख विरोधी उमेदवाराचा उमेदवारी अर्जच बाद झाल्यामुळे दलाल यांचा विजय जवळपास निश्चित मानला जात होता. कुम्भानी यांचा अर्ज रद्दबातल झाल्यानंतर या जागेवर अपक्ष म्हणून उमेदवारी अर्ज भरलेल्या इतर उमेदवारांनीही आपले अर्ज मागे घेतले आहेत. त्यामुळे या जागेवर निवडणूक लढवणारे मुकेश दलाल हे एकमेव उमेदवार असल्याने ते आता बिनविरोध विजयी झाले आहेत. दलाल यांच्या विजयाची सुरतच्या जिल्हाधिकाऱ्यांनी घोषणा केली आहे. विशेष म्हणजे त्यांना खासदारकीचे पत्रही देण्यात आले आहे. अन्य सर्व उमेदवारांनी आपला उमेदवारी अर्ज मागे घेतल्यामुळे आता दलाल प्रत्यक्ष निवडणूक न लढवताच खासदार झाले आहेत.

नेमकं काय घडलं?

सुरतमध्ये निलेश कुम्भानी यांच्या उमेदवारी अर्ज बाद झाला.
अर्जावर तीन सूचकांच्या हस्ताक्षरांवर प्रश्नचिन्ह उपस्थित करण्यात आले.
उमेदवारी अर्जावरील सह्या आमच्या नाहीत, सूचकांनी सांगितलं.
दिनेश जोधानी यांनी निवडणूक अधिकाऱ्याकडे तक्रार केली.
परिणामी कुम्भानी यांचा उमेदवारी अर्ज रद्दबातल.
भाजपचे उमेदवार मुकेश दलाल बिनविरोध निवडून आले.