उपमुख्यमंत्री अजित पवार आज नाशिक दौऱ्यावर

नाशिक, ०७ ऑक्टोबर २०२३, प्रतिनिधी: राज्याचे उपमुख्यमंत्री अजित पवार शनिवारी (दि. ७) नाशिक जिल्हा दौऱ्यावर येत असून, त्यांच्या उपस्थितीत विविध कार्यक्रमांचे आयोजन करण्यात आले आहे. कळवण येथे शेतकरी मेळावा होणार असून, नाशिक शहरातील राष्ट्रवादी भवनात ते पक्षाचे पदाधिकारी व कार्यकत्यांशी संवाद साधणार असल्याने आगामी निवडणुकांच्या पार्श्वभूमीवर अजित पवार यांचा हा दौरा महत्त्वपूर्ण मानला जात आहे.

राष्ट्रवादी काँग्रेसमधील फुटीनंतर नाशिक जिल्हा काबीज करण्यासाठी शरद पवार व अजित पवार गटात संघर्ष सुरू झाला आहे. जिल्ह्यावर वर्चस्व मिळवण्यासाठी नाशिकमध्ये शरद पवार व अजित पवार समर्थकांमधील संघर्ष टोकाला गेला आहे. या पार्श्वभूमीवर उपमुख्यमंत्री अजित पवार यांच्या नाशिक जिल्हा दौऱ्याकडे सर्वांचे लक्ष लागले आहे. शनिवारी सकाळी ९.४० वाजता त्यांचे नाशिकच्या ओझर विमानतळावर आगमन होईल. याठिकाणी विधानसभेतील उपाध्यक्ष आमदार नरहरी झिरवाळ हे त्यांचे स्वागत करणार आहेत. त्यानंतर कळवणच्या दिशेने ते प्रस्थान करतील. या मार्गात दिंडोरी, अवनखेड, वणी, लखमापूर फाटा, वणी चौफुली तसेच कळवण तालुक्यातील नांदुरी येथे त्यांचे स्वागत केले जाईल. कळवण येथील नाकोडा रोडवरील साई लॉन्स येथे आमदार नितीन पवार यांनी आयोजित केलेल्या शेतकरी व कृतज्ञता सोहळ्यात ते मार्गदर्शन करतील. यावेळी विविध विकासकामांचे उद्घाटनही उपमुख्यमंत्र्यांच्या हस्ते केले जाणार आहे.

दुपारी ३ वाजता ते दिंडोरीतील सह्याद्री अॅग्रो फार्मला भेट देणार आहेत. त्यानंतर सायंकाळी ६ वाजता नाशिक शहरातील मुंबई नाका येथील राष्ट्रवादी भवनात ते पक्षाचे पदाधिकारी आणि निवडक कार्यकर्त्यांशी संवाद साधणार आहेत.