Mumbai University: मुंबई विद्यापीठाच्या दूरस्थ व ऑनलाइन शिक्षण केंद्रात प्रवेशासाठी मिळाला आणखी वेळ

उच्च शिक्षणासाठी दूरस्थ आणि ऑनलाईन माध्यमातून शिक्षण घेण्याची इच्छा असलेल्या विद्यार्थ्यांसाठी मुंबई विद्यापीठाने महत्त्वाचा निर्णय घेतला आहे. पदवी आणि पदव्युत्तर अभ्यासक्रमांच्या प्रवेश प्रक्रियेस मुदतवाढ देण्यात आली असून, इच्छुक विद्यार्थ्यांना आता 20 ऑगस्ट 2026 पर्यंत ऑनलाईन अर्ज करता येणार आहे. त्यामुळे विविध कारणांमुळे अर्ज करता न आलेल्या उमेदवारांना आणखी एक संधी उपलब्ध झाली आहे.

मुंबई विद्यापीठाच्या सेंटर फॉर डिस्टन्स अँड ऑनलाईन एज्युकेशन (CDOE) अंतर्गत राष्ट्रीय शैक्षणिक धोरण (NEP 2020) नुसार अनेक पदवी आणि पदव्युत्तर अभ्यासक्रम राबविण्यात येत आहेत. या अभ्यासक्रमांसाठी पात्र विद्यार्थ्यांना थेट ऑनलाईन प्रवेशाची सुविधा उपलब्ध करून देण्यात आली आहे.

हेही वाचा – BJP News: भाजपाला मोठा धक्का? बड्या नेत्याचा तडकाफडकी राजीनामा ; कारण अद्याप अस्पष्ट 

विद्यापीठ प्रशासनाकडून मिळालेल्या माहितीनुसार, अनेक विद्यार्थ्यांनी प्रवेशासाठी अधिक वेळ देण्याची विनंती केली होती. त्या पार्श्वभूमीवर प्रवेश अर्ज भरण्याची अंतिम मुदत वाढविण्याचा निर्णय घेण्यात आला आहे. त्यामुळे इच्छुक विद्यार्थ्यांना आवश्यक कागदपत्रांसह अर्ज पूर्ण करण्यासाठी अतिरिक्त वेळ मिळणार आहे.

CDOE मार्फत कला, वाणिज्य, व्यवस्थापन तसेच इतर विविध शाखांतील अभ्यासक्रम उपलब्ध आहेत. नियमित महाविद्यालयात प्रवेश घेणे शक्य नसलेले विद्यार्थी, नोकरी करणारे उमेदवार आणि स्पर्धा परीक्षांची तयारी करणाऱ्यांसाठी ही शिक्षणपद्धती उपयुक्त ठरत आहे. प्रवेशासाठी अर्ज करताना विद्यार्थ्यांनी आवश्यक शैक्षणिक पात्रता, कागदपत्रे आणि प्रवेशाशी संबंधित सर्व अटी काळजीपूर्वक तपासाव्यात. प्रवेश प्रक्रियेबाबतची अधिक माहिती आणि ऑनलाईन अर्जाची सुविधा मुंबई विद्यापीठाच्या CDOE च्या अधिकृत संकेतस्थळावर उपलब्ध आहे. विद्यापीठाने विद्यार्थ्यांना शेवटच्या क्षणापर्यंत प्रतीक्षा न करता २० ऑगस्ट २०२६ पूर्वीच अर्ज प्रक्रिया पूर्ण करण्याचे आवाहन केले आहे, जेणेकरून कोणत्याही तांत्रिक अडचणींमुळे प्रवेश प्रक्रियेत अडथळा येऊ नये.