मुंबई MHADA लॉटरीला तुफान प्रतिसाद; 2,640 घरांसाठी हजारो अर्जदारांची झुंबड, किती जणांनी भरली अनामत रक्कम?

मुंबईतील घरांच्या वाढत्या मागणीचे आणखी एक मोठे उदाहरण समोर आले आहे. महाराष्ट्र गृहनिर्माण व क्षेत्र विकास प्राधिकरण (MHADA) यांच्या मुंबई गृहनिर्माण लॉटरी 2026 मध्ये 2,640 घरांसाठी अभूतपूर्व प्रतिसाद मिळाला आहे.

अधिकृत आकडेवारीनुसार या लॉटरीसाठी आतापर्यंत 82,000 हून अधिक अर्ज दाखल झाले आहेत. तसेच यातील मोठ्या संख्येने इच्छुकांनी पुढील प्रक्रियेसाठी आवश्यक असलेली  ( अनामत रक्कम देखील भरली आहे, जी सुमारे 57,000 हून अधिक अर्जदारांकडून जमा झाली आहे.  मुंबईतील महागड्या घरांच्या तुलनेत परवडणारी घरे उपलब्ध करून देण्यासाठी MHADA कडून ही लॉटरी काढण्यात आली होती. मात्र या आकडेवारीतून स्पष्ट होते की शहरात परवडणाऱ्या घरांसाठी प्रचंड स्पर्धा आहे.

अर्ज भरणाऱ्यांची संख्या वाढली 

अर्ज प्रक्रिया सुरू झाल्यानंतर सुरुवातीला काही हजार अर्ज आले होते, पण अंतिम टप्प्यात ही संख्या वेगाने वाढत जाऊन 80 हजारांच्या पुढे गेली.  विशेष म्हणजे, 2,640 घरांसाठी इतक्या मोठ्या प्रमाणावर अर्ज आल्यामुळे प्रत्येक घरासाठी अनेक अर्जदार स्पर्धेत आहेत.

 मुंबईतील घरांची वाढती मागणी

तज्ज्ञांच्या मते, मुंबईतील रिअल इस्टेटच्या वाढत्या किमती आणि मर्यादित उपलब्धता यामुळे MHADA लॉटरीसारख्या योजनांना मोठा प्रतिसाद मिळतो. त्यामुळे मध्यम आणि कमी उत्पन्न गटासाठी हे एक महत्त्वाचे पर्याय ठरते.

पुढील प्रक्रिया

आता अर्जांची छाननी आणि पात्र अर्जदारांची अंतिम यादी तयार करण्याची प्रक्रिया सुरू होणार आहे. त्यानंतर संगणकीकृत सोडतीद्वारे विजेत्यांची निवड केली जाईल. म्हाडाकडून सोडतीसाठी प्राप्त अर्जांची प्रारूप यादी 10 जून पर्यंत दुपारी 03 वाजता https://housing.mhada.gov.in या संकेतस्थळावर प्रसिद्ध केली जाणार आहे. यानंतर 12 जून रोजी दुपारी 03 वाजेपर्यंत प्रारूप यादी प्रसिद्ध झाल्यापासून ऑनलाईन दावे-हरकती दाखल करता येणार आहेत. म्हाडा त्यानंतर16 जूनला दुपारी 03 वाजता सोडतीसाठी स्विकृत अर्जांची अंतिम यादी म्हाडाच्या संकेतस्थळावर प्रसिद्ध करणार आहे.