Gilbert Mendonca Passed Away : मिरा-भाईंदर मतदारसंघाचे पहिले आमदार गिल्बर्ट मेंडोंसा यांचं निधन

मुंबई : महाराष्ट्र विधानसभेचे माजी सदस्य गिल्बर्ट जॉन मेंडोंसा यांचे सोमवार, 18 ऑगस्ट रोजी ठाण्यात अल्पशा आजाराने निधन झाले असल्याची माहिती त्यांच्या कुटुंबियांनी दिली. गिल्बर्ट मेंडोंसा यांनी वयाच्या 72 वर्षी अखेरचा श्वास घेतला. मेंडोंका यांनी 2009 मध्ये राष्ट्रवादी काँग्रेस पक्षाचे आमदार म्हणून मीरा भाईंदर विधानसभा मतदारसंघाचे प्रतिनिधित्व केले होते. नंतर ते शिवसेनेशी जोडले गेले. मेंडोंसा हे एका व्यापारी कुटुंबातील होते. त्यांचा राजकीय प्रवास 1978 मध्ये मीरा-भाईंदरचे सरपंच म्हणून निवडून आल्यापासून सुरू झाला. त्यानंतर 1990 मध्ये ते मीरा-भाईंदर नगरपरिषदेचे अध्यक्ष झाले.

हेही वाचा : Mumbai Rain Update : मुंबई उपनगरातील वाहतूक मंदावली, जागोजागी पाणी साचल्यानं प्रवासात अडथळा

2009 मध्ये राष्ट्रवादी काँग्रेस पक्षाच्या तिकिटावर विधानसभा निवडणूक लढवून आणि नव्याने तयार झालेल्या मीरा भाईंदर मतदारसंघातून पहिले आमदार बनून मेंडोंसा प्रसिद्धीच्या झोतात आले. मीरा रोड रेल्वे स्थानकावरून लोकल ट्रेन सेवा सुरू करण्याच्या मोहिमेसह, या प्रदेशात वाहतूक कनेक्टिव्हिटी सुधारण्यासाठी प्रयत्न सुरू केल्याबद्दल मेंडोंसा यांना मोठ्या प्रमाणात श्रेय देण्यात आले.